SYAANTOMBELA ooyu ulakonzya kusotoka kuzwa ansi kuya kubwaanda kakunyina penzi lili lyoonse. Pele kuti bwaanda kabutezeleka, inga watezeleka, pesi ulacikonzya kunamatila kubwaanda. Munzila nzi? Ulagwasilizyigwa amucila wakwe.

Amubone kaambo aaka: Ciindi syaantombela nasotoka kuzwa abusena bwamagunyu-gunyu—bwalo bumupa nguzu zyakucikonzya kusotoka—cakusaanguna ulaubamba mubili wakwe alimwi amucila kaulangide ansi. Eeci cilamugwasya kutegwa asotoke kabotu. Kuti naa busena kabutezeleka, syaantombela ulajana penzi alimwi takonzyi kusotoka kabotu pe. Nokuba boobo, ciindi nali mujulu, ulakonzya kuunyona-nyona mubili wakwe kwiinda mukulungumika mucila wakwe mujulu. Bubambe oobu bulagambya kapati. Lipooti yaku University of California, Berkeley, yakaamba kuti: “Basyaantombela beelede kwiinyona kabotu micila yabo kailangide mujulu. Kuti busena kabutezeleka kapati, syaantombela uyandika kuunyona kapati mucili kutegwa acikonzye kunamatila abwaanda.

Mucila wasyaantombela ulabagwasya basikupanga mincini iigwasilizya mukulangaula basikufwutuka nikwacitika muzuzumo wanyika naa ntenda iili yoonse. Basikuvwuntauzya bazyina lya Thomas Libby bakaamba kuti: “Mincini eeyi taikonzyi kubeleka mbweena bubeleka banyama aaba. Aboobo icikonzya kupa kuti muncini kaubeleka kabotu nkusumpula mboupangidwe.”

Ino Muyeeya Buti? Sena mucila wasyaantombela wakaba buyo akaambo kakusanduka kwazyintu? Naa wakalengwa buya?