Muteende wa New York Times wakaamba kuti: “Muntu uufweba upa kuti sikumulemba mulimo . . . asweekelwe mali aamwi aasika ku $5,816 amwaka mukwiimpana ayooyo uutafwebi.” Kweelana amakani ngobakaamba basikuvwuntauzya baku Ohio State University, basikulemba mulimo balasweekelwa mali aaya aamwi akaambo kakuti babelesi bafweba balalekezya-lekezya mulimo kutegwa bafwebe, kubabbadelela kucibbadela alimwi akulovwa kumulimo. Ikaambo kambi nkakutabeleka kabotu, ambweni akaambo kakuciswa-ciswa ikuboola ciindi muntu naaleka kufweba.

Ba Pope Francis bakaamba kuti: “Basololi bazikombelo alimwi abantu babo tabaciti zintu nzyobaamba, majwi aabo amicito ziliindene, eeci capa kuti mpuwo yacikombelo inyongane.”

Mfwulumende yaku Malaysia yakajata meja aabazovwu aalema mataani aali 24, meja aaya akali aabazovwu bainda ku 1,000, akalisisidwe akati kamapulanga. Aabo balanganya alimwi akukwabilila banyama bakaamba kuti ooyu ngomweelwe mupati kwiinda wameja aabazovwu ngobakajatide kale. Meja aabazovwu aaya akali kuzwa ku Togo mpoonya akali kuunka ku China.

Kweelana alipooti yakapegwa a Mbunga Iilanga Zyabuumi Munyika Yoonse mu 2012, yakatondezya kuti 63 pesenti yabantu bafwa, balafwa akaambo kamalwazi aayambukila mbuli sikalileke, kusoomona, ntuntumaanzi, kakweekwe alimwi amalwazi aabana.

Zisobano zikonzya kusobanwa kwiinda mukubelesya mafooni alimwi azibelesyo zimwi zyaduma kapati akati kabana. Zisobano zimwi zilakozyanya azisobano nzyobasobana mumaanda muuminwa njuka, alimwi tazikatazyi kusobana. Lipooti iyakapegwa amfwulumende yakacenjezya kuti zisobano zili boobu zilakonzya kupa bana kubona mbuli kuti kuuma njuka kulizumizyidwe “alimwi kumbele inga zyabapa kuyooba basikuuma njuka bakatazyide.”