“Kuyandisya mali ngomuyanda wamisyobo yoonse yazyintu zibyaabi.” —1 Timoteyo 6:10.

NZYOBAAMBA BANTU

Mali ngomuyanda wazintu zyoonse zibyaabi.

NCOLYAAMBA BBAIBBELE

“Kuyandisya mali,” ikutali mali eeni, nkokuletela “zyintu zibyaabi.” Mu Bbaibbele, Mwami muvwubi Solomoni wakaamba zintu zyotatwe zibyaabi zibacitikila aabo bayandisya mali. Kulibilika: “Kukutisya kwamuvubi takumuzumizyi koona.” (Mukambausi 5:12) Kutakkutila: “Muntu uuyandisya mali takonzyi kukuta mali, ayooyo uuyandisya imbono takonzyi kukuta impindu.” (Mukambausi 5:10) Kusunkwa kutyola mulawo: “Uufwaamba kuvuba ulajana mulandu.”—Tusimpi 28:20.

‘Mali alakwabilila.’ —Mukambausi 7:12.

NZYOBAAMBA BANTU

Mali alakwabilila alimwi akupa kukkomana.

NCOLYAAMBA BBAIBBELE

Ikaambo kakuti mali alakwabilila alimwi apa kukkomana, ‘nkoongelezya kwalubono.’ (Maako 4:19) Nokuba boobo, “mali ngaacita zyoonse.” (Mukambausi 10:19) Mucikozyanyo, mali alakonzya kuula zintu ziyandika kutegwa muzumanane kupona, zintu mbuli zyakulya alimwi amisamu.—2 Batesalonika 3:12.

Mali alimwi alakonzya kumugwasya kulanganya mukwasyi wanu. Masimpe ngakuti, Bbaibbele lyaamba kuti: “Ikuti muntu katababambi kabotu bamukwasyi wakwe, ikapati aabo bamuŋanda yakwe, nkokuti walukaka lusyomo alimwi mubi kapati kwiinda muntu uunyina lusyomo.”—1 Timoteyo 5:8.

‘Usaangune kukkala ansi akubona mali aayandika.’—Luka 14:28.

NCOLYAAMBA BBAIBBELE

Amwaabelesye mali munzila iikkomanisya Leza. (Luka 16:9) Ncamaano kubelesya mali munzila iigwasya alimwi iisyomeka. (Bahebulayo 13:18) Kutegwa katupona kweelana amali ngotujana, ‘bukkale bwesu butabi bwakuyandisya mali pe.’—Bahebulayo 13:5.

Nokuba kuti Bbaibbele talikasyi kukweleta, litucenjezya kuti: “Sizikoloto ngumuzike wasikukolotya.” (Tusimpi 22:7) Amweelebe kuula zintu nzyomwatalibambilide kuula, nkaambo “uufwanzya makani ulajana bucete buyo.” (Tusimpi 21:5) Muciindi caboobo, ‘amubikke cimwi cintu ambali kweelana anzyomujisi’ alimwi amuyobole mali aakubelesya muzintu ziyandika kapati.—1 Bakolinto 16:2.

Ibbaibbele litukulwaizya ‘kuba baabi.’ (Luka 6:38) Bantu bayanda kukkomanisya Leza beelede kuba baabi, nkaambo “Leza uyanda muntu uupa kumwi kakkomene.” (2 Bakolinto 9:7) Aboobo, “mutalubi kucita zibotu akwaabana zyintu nzyomujisi abamwi, nkaambo Leza ulabotelwa azipaizyo zili boobo.”—Bahebulayo 13:16.