Bbaibbele lilatwaambila cini ncocaamba kuzwidilila. Taliyiisyi kuti mbantu buyo basyoonto balaacoolwe ibakonzya kuzwidilila. Alimwi talyaambi mbuli mbwaamba mabbuku aambi kuti, ikuti naa watobela nzyoyeeya, zyoonse nzyoyanda ziyoocitika. Muzeezo ooyu—kanji-kanji ngobapegwa bana nobacili baniini—ulalangilwa kumutyompya.

Masimpe ngakuti, muntu uuli woonse ulakonzya kuzwidilila—pele kuyandika kubeleka canguzu. Amulange-lange njiisyo zitobela.

• NCOLYAAMBA BBAIBBELE:

  “Muntu uuyandisya mali takonzyi kukuta mali, ayooyo uuyandisya imbono takonzyi kukuta impindu.”—Mukambausi 5:10.

  NCOCAAMBA. Ikuba aazintu zinji tacaambi kuti muyookkutila. Muciindi caboobo, ciletela mapenzi. Ba Dr. Jean M. Twenge mubbuku lyabo litegwa Generation Me, bakalemba kuti: “Bantu ibayandisya mali balalangilwa kulibilika akutyompwa kwiinda bantu bayandisya kuba azilongwe ziyumu abantu bamwi. Buvwuntauzi kanji-kanji butondezya kuti mali taakonzyi kupa muntu kuba aalukkomano, nokuba kuti wajana zyoonse nzyoyanda, mali taapi kukkutila.”

  NCOMUKONZYA KUCITA. Amulibikkile mbaakani yakujana zintu zigwasya kapati kwiinda lubono. Jesu wakaamba kuti: “Amucenjele akulikasya kubulyato buli boonse, nkaambo nokuba kuti muntu kajisi zyintu zinji buti, ibuumi bwakwe tabuzwi kuzyintu eezyo nzyajisi.”—Luka 12:15.

•  NCOLYAAMBA BBAIBBELE:

  “Kulisumpula kulazulwida lunyonyooko, akamikami kali kunembo lyakuwa.”—Tusimpi 16:18.

  NCOCAAMBA. Kuyandisya kuba ampuwo alimwi akulisumpula tazikamugwasyi kuzwidilila. Alimwi buya, ibbuku litegwa Good to Great lyaamba kuti balupati-pati mumakkampani ibakatola ciindi cilamfwu kuzwidilila “inga balalicesya. Pele kweezyanisya amakkampani aamwi, balupati-pati ibabalilwa ku 66 pesenti bakali kulisumpula calo cakapa kuti kkampani izumanane kutaba ampuwo mbotu naa kuwa.” Ino twiiya nzi aawa? Twiiya kuti kubikkila buyo maano kuzintu nzyotuyandika kulakonzya kupa kuti tutazwidilili.

  NCOMUKONZYA KUCITA. Muciindi cakuliyandawida zina mbotu, amubelekele aakulicesya. Bbaibbele lyaamba kuti: “Ikuti naa umwi uyeeya kuti ulayandika kapati kakuli kunyina ambwabede, ulalyeena lwakwe mwini”—ooku takuli kuzwidilila!—Bagalatiya 6:3.

•  NCOLYAAMBA BBAIBBELE:

  ‘Taakwe cintu cibotu kwiinda eci: muntu . . . alikondezye mumilimo yakwe.’—Mukambausi 2:24.

  NCOCAAMBA. Ikuti kamubeleka kabotu milimo, muyookkomana kapati amulimo ngomucita. Mubbuku lyabo litegwa Teach Your Children Well, ba Madeline Levine bakalemba kuti: “Ikucita kabotu mucintu cimwi cipa kuti muntu alimvwe kuti wazwidilila alimwi kubeleka canguzu akuzumanana cipa kuti muntu acite kabotu.” Eeci cilabikkilizya akuliyumya ciindi zintu nozyakatazya.

  NCOMUKONZYA KUCITA. Amubeleke canguzu kutegwa muzwidilile, alimwi mutatyompwi ciindi nokuli buyumuyumu. Ikuti kamujisi bana, amubape (kweelana aciimo cabo alimwi anguzu nzyobajisi) coolwe cakulanganya mapenzi aabo. Mutanoofwambaani kulanganya mapenzi aabo oonse. Bakubusi balajana lukkomano lwini-lwini—akuba aluzyibo lukonzya kubagwasya baakukomena—ciindi nobaliyumya.

• NCOLYAAMBA BBAIBBELE:

  “Mubwa uucipona mubotu kwiinda mulavu uufwide.”—Mukambausi 9:4.

  NCOCAAMBA. Ikuti kamujisi mulimo, mulimo wanu weelede kuba cibeela cabuumi bwanu pele kutali buumi bwanu boonse. Sena muyoolimvwa kuti mwazwidilila ikuti kamucita kabotu mumulimo wanu pele kamuciswa-ciswa naa bamukwasyi wanu kabatamulemeki? Ibantu bazwidilila ncobeni balaulanganya kabotu mulimo wabo, buumi bwabo alimwi amukwasyi wabo.

  NCOMUKONZYA KUCITA. Kamulilanganya kabotu. Amujane ciindi cakupumuna. Tacigwasyi kubikkila kapati maano kumulimo kwiinda mukubikka buumi, mukwasyi, alimwi azilongwe muntenda. Ooku nkuzwidilila ikutali kwamasimpe.

• NCOLYAAMBA BBAIBBELE:

  “Balikkomene aabo bazyi kuti bayandika zyintu zyakumuuya.”—Matayo 5:3.

  NCOCAAMBA. Kwiiya Bbaibbele alimwi akutobela njiisyo zili mumo cilayandika kapati kutegwa muntu azwidilile ncobeni. Mubwini, Bakamboni ba Jehova banji bajana kuti kubikkila maano kuzintu zyakumuuya mubuumi bwabo kwacesya kulibilika nkobajisi kujatikizya zintu zyakumubili.—Matayo 6:31-33.

  NCOMUKONZYA KUCITA. Amwiiye mbolikonzya kumugwasya Bbaibbele kutegwa muzwidilile. Ikuti kamuyanda kwiiya zinji, mulakonzya kubalomba Bakamboni ba Jehova naa kuunka a Web site yesu ya www.mt1130.com.