BA HILTON bakali kuciyandisya kapati cisobano cakulwana mfwaindi. Kabajisi myaka iili ciloba yakuzyalwa, bakali kulwana—mubusena bwakulwanina akumwi buyo. Ciindi nobakali kusekondali, bakali kweendeenda abeenzinyina kabayandaula muntu wakuuma. Bakaamba kuti: “Ndakali kubba, kuuma njuka, kweebelela zintu ziletela muzeezo wakoonana, kupenzya bamakaintu, akubelesya mabala mabi kubazyali bangu. Tiindakali kulilemeka cakuti bazyali bangu bakali kubona kuti kunyina cakali kukonzya kundicinca. Nondakamanizya cikolo cakusekondali ndakazwa aŋanda.”

Ciindi ba Hilton nobakajoka kuŋanda kakwiindide myaka iili 12, bazyali babo bakagambwa kapati! Bakali babombe, bakali kulilesya alimwi bakalijisi bulemu. Ino ncinzi cakapa kuti kube kucinca kugambya kuli boobu? Nobakali kooko nkobakaunkide, bakatalika kuyeeya kapati kujatikizya buumi mbobakali kupona. Alimwi bakalanga-langa Bbaibbele kutegwa babone naa lyakali kukonzya kubagwasya kucinca buumi bwabo. Bakaamba kuti: “Ndakazitobela nzyondakali kubala mu Bbaibbele, calo cakali kubikkilizya kuleka bukkale bwangu bwakaindi mpoonya akutobela lulayo luli mulugwalo lwa Baefeso 6:2, 3 lwakulemeka bazyali. Kwaciindi cakusaanguna mubuumi bwangu, ndakajana lukkomano lwini-lwini alimwi ndakapa kuti bataata abamaama bakkomane muciindi cakuusa!”

Cakuluula caba Hilton citondezya mboziyandika njiisyo zyamu Bbaibbele alimwi anguzu nzyozijisi zyakucinca muntu. (Bahebrayo 4:12) Atulange-lange njiisyo zimwi—kusyomeka, kulilesya, kusyomeka mucikwati alimwi aluyando—alimwi ambozikonzya kutupa kukkomana mubuumi.