Mubuzyo wakuti sena Leza nkwali ulibonya mbuli kuti taukonzyi kwiingulwa naa kuti bantu banji tabaubikkili maano. Ba Hervé, ibakakomenena ku France baamba kuti: “Nokuba kuti tandili akati kabaabo batasyomi kuti Leza nkwali, tandili musyomi. Kulindime, nzila mbotu yakupona nkubelesya busongo bwangu. Eeci taciyandiki kusyoma muli Leza.”

Bamwi balakonzya kulimvwa mbuli ba John baku United States. Bakaamba kuti: “Ndakakomezyegwa abazyali batakali kusyoma muli Leza. Nindakacili mukubusi, tiindakazyi kuti Leza nkwali naa pe. Nokuba boobo, ziindi zimwi ndakali kwaayeeya makani aaya.”

Sena kuli nomwakalibuzyide kuti naa Leza nkwali, alimwi ikuti naa nkwali sena buumi bulaba ampindu? Ambweni kuli nomwakajana makani aakatazya kupandulula kuti muntu katasyomi kuti kuli Mulengi, mucikozyanyo makani aasayaansi aamba mbozibambidwe kabotu zintu ambozipa kuti buumi kabuliko alimwi abumboni bwakuti buumi tiibwakazwa kuzintu zitaponi.—Amubone kabbokesi kakuti “ Amulange-lange Bumboni.”

Amulange-lange mbwaayandika makani aambwa atala aawa. Ali mbuli zikwankwani zitondezya nkomukonzya kujana zintu ziyandisi. Ikuti mwajana bumboni busyomeka bwakuti Leza nkwali, amakani aasyomeka kujatikizya nguwe, inga mwagwasyigwa kapati. Amubone zikozyanyo zyone.

Ikuti naa buumi bulaampindu, tuyanda kuzyiba naa nimpindu nzi alimwi ambotujatikizyigwa. Nkaambo ikuti naa Leza nkwali pele tatuzyi kuti nkwali, nkokuti tulapona katutazyi kaambo kayandika kapati mububumbo.

Bbaibbele lyaamba kuti Leza Nkasensa kabuumi. (Ciyubunuzyo 4:11) Ino kuzyiba makani aaya inga catugwasya buti kupona buumi bulaampindu? Amulange-lange ncoliyiisya Bbaibbele kujatikizya makani aaya.

Akati kazilenge zyoonse zili anyika, bantu balilibedelede. Kweelana ancolyaamba Bbaibbele, Leza wakatulenga kuba mbuli nguwe, kutegwa katutondezya bube bwakwe. (Matalikilo 1:27) Kuyungizya waawo, Bbaibbele liyiisya kuti bantu balakonzya kuba balongwe ba Leza. (Jakobo 2:23) Kunyina cintu cikonzya kupa kuti katupona buumi bulaampindu kwiinda kuba acilongwe a Mulengi wesu.

Ino caamba nzi kuba mulongwe wa Leza? Balongwe ba Leza balakonzya kwaambaula anguwe kumugama. Alimwi usyomezya kuti uyoobaswiilila akubagwasya. (Intembauzyo 91:15) Mbwaanga tuli balongwe ba Leza, tulakonzya kuzyiba mbwayeeya kujatikizya makani manji. Eeci cilakonzya kupa kuti tujane twaambo twamasimpe kujatikizya mibuzyo iitukatazya mubuumi.

Mucikozyanyo, bantu bamwi cilabakatazya kusyoma muli Leza akaambo kamapenzi ngobabona munyika. Balabuzya kuti, ‘Nkaambo nzi Mulengi singuzuzyoonse ncazumizya mapenzi abubi?’

Bwiinguzi buli mu Bbaibbele mbwakuti tanaakali makanze aa Leza kuti bantu kabapenga. Ciindi bantu nobakalengwa, kwakanyina mapenzi. Noluba lufwu tiilwakali makanze aa Leza aakusaanguna kujatikizya bantu. (Matalikilo 2:7-9, 15-17) Sena eeci cilakatazya kusyoma? Sena makani buyo aakondelezya? Peepe. Ikuti naa kuli Mulengi singuzuzyoonse alimwi akuti luyando mbobube ibwiinda boonse mbwajisi, nkokuti oobu mbobuumi mbotukonzya kulangila kuti ulatupa.

Ino ncinzi cakaleta bukkale buliko sunu? Bbaibbele lyaamba kuti Leza wakalenga bantu kabajisi nguzu zyakulisalila. Tatuli malobboti, tatusinikizyigwi buya kumvwida Leza. Banabukwetene bakusaanguna, kwalo kwakazwa bantu boonse, bakasala kukaka busolozi bwa Leza. Muciindi cakusala kumvwida Leza, bakasala kutobela kuyanda kwabo beni. (Matalikilo 3:1-6, 22-24) Lino tulapenga akaambo kakusala kwabo.

Tulakonzya kuba aluumuno lwamumizeezo ikuti twazyiba kuti kupenga kwabantu taali makanze aa Leza. Nokuba boobo, tuyanda kukatalusyigwa kumapenzi. Tuyanda bulangizi bwakumbele.

Ciindi nobakazanga bantu, Leza wakasyomezya kuti mukuya kwaciindi, uyoozuzikizya makanze aakwe aakusaanguna kujatikizya nyika. Akaambo kakuti ngu singuzuzyoonse, kunyina cikonzya kumulesya kucita oobo. (Isaya 55:11) Lino-lino, Leza uyoobugusya bubi boonse bwaboola akaambo kakumuzangila, mpoonya makanze aakwe aakusaanguna kujatikizya nyika alimwi abantu ayoozuzikizyigwa.

Ino eeci inga caamba nzi kulindinywe? Amulange-lange zisyomezyo zyobilo buyo akati kazisyomezyo zinji zili kumbele Leza nzyaakaamba, izijanika mu Bbaibbele.

• LUUMUNO NYIKA YOONSE ALIMWI BUBI BWAGUSYIGWA. “Kusyeede kaindi kaniini buyo, ibantu babi tabakabi limbi pe; uyoolanga nkobakabede, pele tabakabiko pe. Pele babombe myoyo bayookona nyika, eelyo bayoobotelwa kapati muluumuno lunji.”—Intembauzyo 37:10, 11.

• MALWAZI ALIMWI ALUFWU ZYAGUSYIGWA. “Taakwe muntu naba omwe uukkala munyika uuyakwaamba kuti: ‘Ndaciswa.’” (Isaya 33:24) “Uyoolumena lufwu mane kukabe kutamani, alimwi Mwami Singuzuzyoonse Jehova uyoosindula misozi kumasyu oonse.”—Isaya 25:8.

Nkaambo nzi ncotukonzya kuzisyoma zisyomezyo zya Leza izili mu Bbaibbele? Akaambo kakuti zisyomezyo zinji zilembedwe mumo zyakazuzikizyigwa kale. Nokuba boobo, ibulangizi bwakuyookatalusyigwa kumbele tabugusyi makatazyo aaliko lino. Ino ndugwasyo nzi lumbi ndwapa Leza?

Leza ulatupa busolozi ibutugwasya ciindi camapenzi alimwi ambotukonzya kusala kabotu. Zyakusala zinji tazitujatikizyi kapati, pele zimwi zilakonzya kutujatikizya kwaciindi cilamfwu. Kunyina muntu uukonzya kutupa busongo bugwasya mbuli busongo mbwatupa Mulengi wesu. Cili boobo akaambo kakuti Jehova ulizyizyi zyoonse zyakacitika kale alimwi aziyoocitika. Kuyungizya waawo, ngo Kasensa kabuumi. Aboobo ulizyi nzyotuyandika.

Bbaibbele lijisi mizeezo ya Jehova Leza, mbwaanga wakasololela bantu baindene-indene kulemba mizeezo yakwe. Mu Bbaibbele, tujana majwi aaya: “Mebo, nde Jehova ndime Leza wako, ndime ndikuyiisya kuti ugwasyigwe, uukusololela munzila moyelede kweendela.”—Isaya 48:17, 18.

Nguzu zya Leza tazimani, alimwi ulilibambilide kubelesya nguzu zyakwe kutugwasya. Bbaibbele lipandulula Leza mbuli taata siluyando uuyanda kutugwasya. Lyaamba kuti: ‘Taata uuli kujulu uyakubapa muuya uusalala aabo ibamulomba!’ (Luka 11:13) Nguzu eezyi izizwa kuli Leza zilakonzya kutusolweda akutuyumya.

Ino inga mwalujana buti lugwasyo oolu kuli Leza? Bbaibbele liingula kuti: “Kufwumbwa ooyo uuswena afwaafwi kulinguwe weelede kusyoma kuti nkwali ncobeni akuti uba sikupa bulumbu kuli baabo bamuyandaula cabusungu.” (Bahebrayo 11:6) Kutegwa musinizye kuti Leza nkwali, mweelede kulanga-langa bumboni nyolikke.

Citola ciindi kujana kasimpe ka Leza, pele mulakonzya kugwasyigwa ikuti mwacita oobo. Amulange-lange cakuluula caba Xiujin Xiao, ibakazyalilwa ku China pele lino bakkala ku United States. Bakaamba kuti: “Nokuba kuti ndakali kusyoma njiisyo yakusanduka, ndakali kuyandisisya kulizyiba Bbaibbele. Aboobo ndakatalika kwiiya Bbaibbele a Bakamboni ba Jehova. Mumwaka wamamanino kandili kukkoleji, ndakajata bubi cakuti tiindakajisi ciindi cakwiiya Bbaibbele. Eeci cakandipa kutakkomana. Nondakatalika alimwi kubikkila maano kukwiiya Bbaibbele, ndakajana lukkomano.”

Sena mulayanda kwiiya zinji kujatikizya Mulengi wesu, Jehova Leza? Amujane ciindi cakuvwuntauzya nobeni.