NZYOBAAMBA BANTU

Bantu banji kubikkilizya abantu bakomba, balimvwa kuti kulwana kulazumizyigwa kuti muntu wakutalika. Alimwi bantu banji bayeeya kuti kulwana kutondezyegwa acipekupeku nkulikondelezya kuzumizyidwe.

NCOLYAAMBA BBAIBBELE

Afwaafwi adolopo lya Mosul, Iraq nkoili kumbo, kuli matongo aamunzi iwakali mupati aciindi cimwi—Nineve, munzi mupati Mubulelo bwa Asuri wakaindi. Aciindi munzi ooyu niwakali kucita kabotu, Bbaibbele lyakasinsima kuti Leza uyoopa kuti “munzi wa Nineve ube matongo.” (Zefaniya 2:13) Leza wakaamba kuti: “Ndiyoopa kuti ube cintu cigambya.” Ino nkaambo nzi? Nineve wakali “munzi uutila bulowa.” (Nahumu 1:1; 3:1, 6) Lugwalo lwa Intembauzyo 5:6 lwaamba kuti “Jehova ulabasesemwa basinkondo.” Leza wakacita kweelana amajwi aakwe, mbubwenya matongo aa Nineve mbwaapa bumboni.

Kulwana kwakatalisyigwa asinkondo mupati wa Leza alimwi abantu—Saatani Diabolosi, walo Jesu Kristo ngwaakaamba kuti “mujayi.” (Johane 8:44) Kunze lyaboobo, akaambo kakuti “nyika yoonse ili mumaanza aamubi,” bube bwakwe bulalibonya mumuuya uudumide ngobajisi banji kujatikizya kulwana, alimwi akuvwula kwamicito yakulwana iitondezyegwa acipekupeku. (1 Johane 5:19) Kutegwa tumukkomanisye Leza, tweelede kukusulaika kulwana alimwi akuyanda zintu nzyayanda Leza. * Sena eeci cilakonzyeka?

“Jehova . . . kufwumbwa muntu uuyanda nkondo ulimusulide.”—Intembauzyo 11:5.

NZYOBAAMBA BANTU

Kulwana kutondezya buyo mbobabede bantu, tabakonzyi kucinca.

NCOLYAAMBA BBAIBBELE

Amugusye ‘bukali, kunyema, bubi, majwi aakusampaula, alimwi amajwi aacisapi.’ Alimwi lyaamba kuti: “Amubusamunune buntu bwanu bwakaindi amicito yambubo, akulisamika buntu bupya.” (Bakolose 3:8-10) Sena cilakatazya kucita ncatwaambila Leza? Peepe. Bantu balakonzya kucinca. * Munzila nzi?

Nzila yakusaanguna nkuba aluzyibo lwini-lwini  lwa Leza. (Bakolose 3:10) Muntu uujisi moyo uumvwida ayiya kujatikizya bube bubotu bwa Mulengi wesu alimwi azyeelelo zyakwe, ulakwelwa kuli Leza muluyando alimwi uyanda kuti amukkomanisye.—1 Johane 5:3.

Nzila yabili ijatikizya mbotusala balongwe. “Utanoomvwani amuntu mukali alimwi utanikweendi amuntu uunyema-nyema buyo, kutegwa utaiyi nzila zyakwe akulinjizya mukakole.”—Tusimpi 22:24, 25.

Nzila yatatu ibikkilizya kuba abusongo. Amuzyibe kuti muuya wakuyandisya nkondo ncitondezyo cakuti tujisi penzi lipati lyakutalilesya. Mukwiimpana, basiluumuno balalijata. Lugwalo lwa Tusimpi 16:32 lwaamba kuti: “Muntu uumuka kunyema uli kabotu kwiinda muntu singuzu.”

“Amusungwaale kuyandaula luumuno abantu boonse.”—Bahebrayo 12:14.

NZYOBAAMBA BANTU

Bantu bali kulwana lyoonse alimwi banoolwana lyoonse.

NCOLYAAMBA BBAIBBELE

“Kusyeede kaindi kaniini buyo, ibantu babi tabakabi limbi pe . . . Pele babombe myoyo bayookona nyika, eelyo bayoobotelwa kapati muluumuno lunji.” (Intembauzyo 37:10, 11) Kutegwa afwutule babombe alimwi abasiluumuno, Leza uyoocitila balwani ncaakacita ku Nineve wakaindi. Eelyo kulwana takukanyonganyi limbi luumuno lunooli munyika!—Intembauzyo 72:7.

Ecino nceciindi cakumvwana a Leza kwiinda mukuba basiluumuno. Lugwalo lwa 2 Petro 3:9, lwaamba kuti: “Jehova . . . umukkazikila moyo nkaambo tayandi kuti muntu uuli woonse anyonyoonwe, pele uyanda kuti boonse bakonzye kweempwa.”

“Bayoofwula mapanga aabo kuba maamba aakulimya amasumo aabo kuba zyakukwezuzya zisamu.”—Isaya 2:4.