CIWENA ngomunyama iwiinda kuba anguzu zyakuluma akati kabanyama boonse ibaliko mazuba aano. Mucikozyanyo, ciwena uukkala mulwizi lwamunyo uujanika kufwaafwi a Australia, ulijisi nguzu zyakuluma iziinda aziindi zyotatwe aali zyeezyo zyasyuumbwa naa munyama uuboneka mbuli siluwe. Nokuba boobo, mweebo waciwena ulafwambaana kumvwa ikuti wagumwa kwiinda muntu mbwakonzya kufwambaana kumvwa kuti wagumwa kumpela aakanwe. Ino eeci cikonzyeka buti mbwaanga lukanda lwaciwena nduyumu?

Mweebo waciwena ujisi tubeela tunji kapati itugwasyilizya ciwena kuzyiba kuti kuli camuguma. Sikuvwuntauzya Duncan Leitch naakamana kutulanga-langa tubeela ootu wakaamba boobu: “Kumpela kwakaseelo kamwi akamwi ikagwasyilizya kumvwa mbocili afwaafwi cintu inga kuzwida mukapulo ikali mucipapa camutwe.” Bubambe oobu bukwabilila tubeela-beela ituli mumweebo itukwabilila kaseelo alimwi bugwasyilizya kuti ciwena kacikonzya kumvwa zintu alimwi kumvwa ooku kulainda azibelesyo zimwi mbozikonzya kupima. Akaambo kaceeci, ciwena ulakonzya kwiindanya akati kacakulya azintu zitali cakulya izili mukanwa kakwe. Alimwi eeci ncecipa kuti ciwena uujisi twana twakonkonwa ino kacikonzya kutunyamuna mukanwa kakunyina kutupwaya. Mweebo waciwena ulagambya nkaambo ulijisi nguzu alimwi ulacikonzya kumvwa zintu mbozili afwaafwi.

Ino muyeeya buti? Sena mweebo waciwena wakabako akaambo kakusanduka naa wakalengwa buya?