MBOTUKONZYA KUMANA PENZI LYAKUSULAIKANA
3 | Amulugwisye Lusulo Mumizeezo Yanu
Njiisyo Yamu Bbaibbele:
“Amusandulwe kwiinda mukucinca mizeezo yanu, kutegwa muzyibe kuyanda kwa Leza, ikubotu, kutambulika alimwi kulondokede.”—BAROMA 12:2.
Ncocaamba:
Mbotuyeeya ncintu ciyandika kapati kuli Leza. (Jeremiya 17:10) Nokuba kuti tweelede kweeleba kwaamba naa kucita zintu izikonzya kutondezya muuya walusulo, kuli azimbi zinji nzyotweelede kucita. Penzi eeli lyakusulaika bamwi litalikila mumizeezo alimwi amumoyo. Aboobo tweelede kufwambaana kuleka kuyeeya zintu zili zyoonse izikonzya kutupa kuba alusulo. Ikuti naa twacita oobo, ndendilyo notukonzya ‘kusandulwa’ ncobeni akumana penzi lyakusulaika bamwi.
Ncomukonzya Kucita:
Amulilingule kutegwa mubone mbomuyeeya alimwi ambomulimvwa kujatikizya bamwi, kwaambisya aabo bamusyobo umbi naa ibazwa kucisi cimbi. Amulibuzye kuti: ‘Ino ndibabona buti? Sena mbondibabona ciyeeme abwini mbondibazyi? Naa ciyeeme alusalululo?’ Amutantamuke kweebelela naa kubala zintu a Intaneti zisumpula kusulaikana alimwi akulwana.
Jwi lya Leza lilakonzya kutugwasya kugwisya lusulo luli mumizeezo alimwi amumyoyo yesu
Talili lyoonse nocili cuuba-uba kuzyiba bwini mbotuyeeya alimwi ambotulimvwa. Pele Jwi lya Leza lilakonzya kutugwasya “kuzyiba mizeezo amakanze aamumoyo.” (Bahebrayo 4:12) Aboobo, amuzumanane kulibala cakusitikila Bbaibbele. Amweezyanisye zintu nzyoliyiisya amizeezo yanu, alimwi akusolekesya kusikila mpomugolela kuyeeya munzila iimukkomanisya Leza. Jwi lya Leza lilakonzya kutugwasya kugwisya lusulo ‘luyumu nta’ luli mumizeezo alimwi amumyoyo yesu.—2 Bakorinto 10:4, 5.
Andiza Inga Mwaakkomanina Ayaaya
IBBAIBBELE LILAKONZYA KUBACINCA BANTU
“Tandicili Silunya”
Ino ncinzi cakabakulwaizya ba Sébastien Kayira kuleka nkondo alimwi abukkale bwakutalilemeka?
IBBAIBBELE LILAKONZYA KUBACINCA BANTU
Ndakacileka Busikalumamba
Amubone mulumbe wamu Bbaibbele wuumbulizya mbowakabagasya ba Cindy kucinca bube bwabo.
