Cisyomezyo Cibotu Kapati Kuzwa Kukabala Kasyoonto ka Chihebrayo
Sena inga twaba masimpe kuti zisyomezyo zyoonse zya Leza ziyoozuzikizyigwa? Jesu wakali kusyoma oobo, alimwi njiisyo zyakwe zyakabapa kuba alusyomo baswiilizi bakwe. Amulange-lange cikozyanyo ncaakaamba mu Mulumbe wakwe Waacilundu, uulembedwe mulugwalo lwa Matayo 5:18: “Ncobeni ndimwaambila kuti, ncuuba-uba julu anyika kumana kwiinda kuti kabeela komwe kakabala kazwe ku Mulawo, kusikila mane zintu zyoonse eezyi zikacitike.”
Kabala kasyoonto kaalufabbeti ya Chihebrayo nkakuti י (yod), kalo kali nkabala kakusaanguna mu Tetragrammaton, mabala aaiminina zina lisetekene lya Leza, Jehova. * Kuyungizya amabala eeni alimwi amabala aa Mulawo wa Leza, balembi aba Farisi bakali kubona “kabeela komwe kakabala” kuti kalayandika kapati.
Jesu wakali kwaamba kuti julu anyika inga zyamana kwiinda kuti kabeela ka Mulawo katazuzikizyigwi. Pele Magwalo atwaambila kuti julu anyika zinooliko lyoonse mane kukabe kutamani. (Intembauzyo 78:69) Aboobo kaambo aaka kakali kutondezya kuti nokaba kabeela kasyoonto ka Mulawo kayoozuzikizyigwa.
Sena Jehova Leza ulabikkila maano kutuntu tusyoonto? Inzya. Amuyeeye kuti: Bana Israyeli bansiku bakaambilidwe kuti tabeelede kupwaya cifwuwa cili coonse cakabelele ka Pobwe Lyakwiindilila. (Kulonga 12:46) Ambweni aaka kakali kantu kasyoonto buyo. Sena bakalikazyi kaambo ncobatakeelede kupwaya cifwuwa cili coonse? Ambweni tiibakazyi. Nokuba boobo, Jehova Leza walo wakalizyi kuti kaambo aaka kakali kwiiminina businsimi bwakuti Mesiya takatyolwi cifwuwa cili coonse aakujaigwa acisamu cakupenzyezya.—Intembauzyo 34:20; Johane 19:31-33, 36.
Ino majwi aa Jesu atuyiisya nzi? Andiswe tulakonzya kusyoma cakumaninina kuti zisyomezyo zya Jehova Leza zyoonse ziyoozuzikizyigwa. Eelo kaka eeci ncisyomezyo cibotu kapati kuzwa kukabala kasyoonto ka Chihebrayo!
^ munc. 3 Kabala kasyoonto kaalufabbeti ya Chigiriki nkakuti iota alimwi kulibonya kuti kalakozyanya aka Chihebrayo kakuti י (yod). Mbwaanga Mulawo wa Musa wakalembedwe mu Chihebrayo, kweelede kuti Jesu wakali kwaamba kabala ka Chihebrayo.
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Luumuno Anyika—Ino Luyooboola Buti?
Amwiiye Leza mbwasyomezya kuleta luumuno munyika yoonse kwiinda mu Bwami bwakwe.
MIBUZYO YAMU BBAIBBELE YAINGULWA
Ino Jehova Nguni?
Sena ngu Leza wabantu wamusyobo omwe, mbuli bana Israyali?
BBAIBBELE LYA BUSANDULUZI BWANYIKA MPYA
Ino Bbaibbele Lisyomezya nzi Kujatikizya Ciyoocitika Kumbele?
Bulangizi bwandilyo bubotu bulakonzya kumugambya.
