Ndakazyalilwa ku Ciudad Mante, busena bubotu bwaku Tamaulipas, Mexico. Bunji bwabantu bakkala mudolopo eeli, mbaabi alimwi balaalubomba. Pele cuusisya ncakuti, akaambo kabugwebenga busena oobu bwakali kuyoosya kapati.

Mebo ndakali wabili mukuzyalwa akati kabana basankwa bone. Bazyali bangu bakandibbapatizya ku Cikombelo ca Katolika, kumane ndakasangana kabunga kakwiimba ka parish. Ndakali kuyanda kumukkomanisya Leza akaambo kakuti ndakali kuyoowa kubetekwa alimwi akuumpwa mumulilo wahelo kukabe kutamani.

Nondakajisi myaka yosanwe, bataata bakazwa aŋanda. Eeci cakandipa kuba abuumba kapati akulimvwa kutyompwa. Tiindakacimvwisya cakabapa kuti batusiye mbwaanga twakali kubayanda kapati. Bamaama bakeelede kubeleka ciindi cilamfwu kutegwa batujanine ziyandika.

Eeci cakandibeda coolwe cakucileka cikolo akutalika kumvwana aabantu bakali bapati alindime. Bakandiyiisya kukonka, kufweba, kubba, alimwi akulwana kubelesya mfwaindi. Akaambo kakuti ndakali kuciyanda kubakoma bamwi, ndakaiya nzila ziindene-indene zyakulwana, alimwi akubelesya zilwanyo. Ndakaba mukubusi sinkondo. Kanji-kanji, ndakali kujatikizyigwa mukulwana kubelesya ntobolo, alimwi ziindi zinji ndakali kujanika ndibbide mubulowa kumwi kandifwumba bulamfwu munzila. Eelo kaka eeci cakali kubapa buumba bamaama bandijana boobo, bakali kundibweza akunditola kucibbadela cakufwambaana!

Nondakajisi myaka iili 16, mweenzuma uumwi wazina lya Jorge wakatuswaya. Wakatwaambila kuti ngumwi wa Bakamboni ba Jehova aboobo wakali kuyanda kutwaambila makani aayandika kapati. Wakatalika kupandulula nzyasyoma kubelesya Bbaibbele. Tiindakaningalibalide, aboobo ndakakkomana kwiiya zina lya Leza amakanze aakwe. Jorge wakatulomba kuti katwiiya Bbaibbele anguwe, aboobo twakazumina.

Ndakalemunukwa kapati kwiiya kasimpe kujatikizya mulilo wahelo—kuti taili njiisyo yamu Bbaibbele. (Intembauzyo 146:4; Mukambausi 9:5) Nondakazyiba boobo, ndakaleka kumuyoowa Leza munzila iiteelede. Muciindi caboobo, ndakatalika kumubona kuti ngu Taata siluyando uuyanda kubacitila zintu zibotu bana bakwe.

 Mbondakali kuyaabuzumanana kwiiya Bbaibbele, ndakabona kuti ndeelede kucinca bukkale bwangu. Ndakeelede kutalika kulicesya alimwi akucileka nkondo. Lulayo lulembedwe mulugwalo lwa 1 Bakorinto 15:33 lwakandigwasya kapati. Lwaamba kuti: “Kuyanzana abantu babyaabi kunyonganya zilengwa zibotu,” naa kweelana abupanduluzi buyungizyidwe, “kumvwana abantu babyaabi kupa kuti muntu aleke kulilemeka kabotu.” Ndakazyiba kuti, ikuti kandiyanda kucinca bukkale bwangu, ndakeelede kuleka kuyanzana aabantu bakali kundiyunga kucita zintu zibi. Aboobo, ndakacileka kuyanzana aabalongwe bakaindi akutalika kuyanzana abamumbungano ya Banakristo bakasimpe—bantu bakali kumana mazwanga kwiinda mukubelesya njiisyo zyamu Bbaibbele kutali kwiinda munkondo.

Cibalo acimbi camu Magwalo icakandinjila mumoyo nceeci cijanika mulugwalo lwa Baroma 12:17-19. Lwaamba kuti: “Mutapilusizyi muntu uuli woonse bubi. . . . Kamusoleka kusikila mpomugolela kukkala muluumuno abantu boonse. Mutapilusizyi muntu cibi, . . . nkaambo kulembedwe kuti: ‘“Ndime ndisubula; ndime nendiyoopilusya cibi,’ mbwaamba Jehova.’” Ndakazyiba kuti Jehova uyookumana kutalulama munzila njayanda alimwi aaciindi cakwe. Asyoonto-syoonto, ndakabuleka bukkale bwangu bwakuyandisya kulwana.

Tandikalubi cakacitika bumwi buzuba kumangolezya nondakali kujokela kuŋanda. Bakubusi bamukabunga kazigwebenga nkotwakali kulwana limwi kaindi bakatalika kunduuma, mpoonya musololi wabo wakanduuma kusyule, akwaamba kuti, “Kolivwuna we!” Aciindi eeci ndakapaila kuli Jehova, kumulomba kuti andigwasye kuliyumya kukulwanwa. Nokuba kuti moyo wakali kupya kapati kuti ndibalwane andime, pele ndakacikonzya kutija buyo. Buzuba bwakatobela twakaswaangana amusololi wakabunga aaka kabagwebenga kali alikke. Ndakanyema kapati akuyanda kumulwana, pele alimwi ndakamulomba Jehova kuti andigwasye kulijata. Cakandigambya ncakuti, mukubusi ooyu wakaboola kulindime akwaamba kuti: “Amundilekelele kujatikizya cakacitika jilo masiku. Masimpe ngakuti, ndiyanda kuba mbuli ndinywe. Ndiyanda kwiiya Bbaibbele.” Eelo kaka ndakakkomana akaambo kakuti ndakacikonzya kulijata! Aboobo, twakatalika kwiiya Bbaibbele anguwe.

Cuusisya ncakuti, bamukwasyi wangu boonse kunyina nobakazumanana kwiiya Bbaibbele aciindi eciya. Nokuba boobo, mebo ndakasala kuzumanana kwiiya Bbaibbele alimwi akutazumizya muntu uuli woonse naa cintu cili coonse kundilesya. Ndakalizyi kuti kuyanzana abantu ba Leza lyoonse kulakonzya kundiponya mumizeezo alimwi akundipa mukwasyi ngondakali kuyanda. Ndakazumanana kuyaambele kumuuya, mpoonya mu 1991, ndakabbapatizyigwa kuba Kamboni wa Jehova.

Ndakali mubi moyo, sikakomokomo, alimwi sinkondo. Pele Jwi lya Leza lyakandicinca cakumaninina. Lino ndilaambila muntu uuli woonse uuyanda kuswiilila mulumbe wamu Bbaibbele waluumuno. Ndakalijisi coolwe cakubeleka kandili mubelesi waciindi coonse kwamyaka iili 23 yainda.

Kwaciindi cili mbocibede, ndakabeleka mulimo wakulisungula kuofesi yamutabi ya Bakamboni ba Jehova ku Mexico. Kandicili kokuya, ndakayaanya ba Claudia, musimbi Munakristo muyumu, mpoonya twakakwatana mu 1999. Eelo kaka ndilamulumba Jehova akaambo kakundipa mweenzuma ooyu uusyomeka!

Twakabeleka antoomwe mumbungano iibelesya mwaambo wakutambaika waku Mexico, kugwasya basinke mwatwi kwiiya kujatikizya Jehova. Nokwakainda ciindi, twakatambwa kuya ku Belize kuyooyiisya bantu Bbaibbele mucisi eciya. Nokuba kuti twakaubya-ubaya buumi bwesu kuno, tulijisi nzyotuyandika kutegwa katukkomana. Tatukonzyi kubucinca akaambo kakuyanda cintu cimwi.

Mukuya kwaciindi, bamaama bakatalika alimwi kwiiya Bbaibbele mpoonya bakabbapatizyigwa. Awalo mupati wangu musankwa, amukaintu wakwe alimwi abana babo, lino bakaba Bakamboni ba Jehova. Beenzuma bamwi mbotwakali kumvwana limwi kaindi mbondakali kukambaukila abalo babelekela Jehova.

Cuusisya ncakuti, bamwi bamumukwasyi wangu bakafwa akaambo kakuti tiibakacinca bukkale bwabo bwakuyanda nkondo. Ikuti nindakazumanana abukkale mbubwenya obuya, ambweni andime nondalifwide. Ndilamulumba Jehova akaambo kakundikwelela kulinguwe alimwi akubakombi bakwe, balo ibakandiyiisya cakukkazika moyo alimwi acalubomba kubelesya njiisyo zyamu Bbaibbele mubuumi bwangu.