INZYA, zimwi ziindi. Amubone cikozyanyo comwe. Lugwalo lwa Deuteronomo 24:14, 15 lwaamba kuti: “Toyelede kuunina mubelesi wako uupengede alimwi mucete, kufwumbwa naa ngumwi wabanabokwanu naa mweenzu uukkede muminzi yanu . . . Buyo-buyo ulakwiilila Jehova akaambo kanduwe, eelyo yebo ulaba amulandu.”

Makani aalembedwe kujatikizya kulomba mumakani aali boobo akacitika mumwaanda wamyaka waciloba B.C.E. Akajanika afwaafwi amunzi wa Asidodi. Ambweni akalembwa kujatikizya mubelesi wamumuunda andiza iwakaalilwa kupa cibeela camaila, makani aaya akalembedwe aacikaye canongo, kuti: “Mubelesi wako [ooyo uulomba] naakamana kubikka maila mazuba masyoonto aayinda, ba Hoshayahu ibana baba Shobay, bakaboola akubweza cisani camubelesi wako. . . . Babelesima boonse mbotwakali kubeleka limwi muzuba bayakwaasinizya makani aaya kuti mbondaamba mbombubo . . . Kunyina cibi cili coonse ncondakacita. . . . Ikuti naa mweendelezi ataboni kuti mukuli wakwe kubona masimpe kuti cisani camubelesi wakwe capilusyigwa kulinguwe, kacita oobo akaambo kaluzyalo! Tayelede kuumuna buyo pe, kakuli mubelesi wakwe tajisi cisani cakwe.”

Syaazibwene mumakani aakaindi Simon Schama wakaamba kuti kulomba ooku “kutwaambila zinji kutali buyo kuyandisisya kwamubelesi kuti apegwe [cisani cakwe.] Alimwi kutondezya kuti sikulomba kuli ncaakazyi kujatikizya mulawo wamu Bbaibbele, kwaambisya milawo iijanika mubbuku lya Levitiko a Deuteronomo kuli baabo ibakali kweendelezya mucete calunya.”