Cibalo icakamwaigwa mukabbuku kakazikwiitwa kuti Mulimo Wesu wa Bwami waku London wamu December 1937 cakajisi makani aasinsimuna aakuti “Nobasikumwaya ba Bwami mu Britain—Amusinsimuke!! Katwe kamwi kasyoonto ikapa kukkala aansi kuyeeya mucibalo eeci kakaamba kuti: “Kunyina Kuyaambele Ikwalibonya Mumyaka Iili 10 Yainda.” Eeci cakalibonya kweelana alipooti yamulimo iyakali acivwumbyo iyakatondezya mulimo mbowakabelekwa kuzwa mu 1928 kusikila mu 1937.

Ino ncinzi cakapede kuti mulimo wakukambauka uyaansi kapati mu Britain? Kuboneka kuti mbungano tiizyakali kuyaambele kwamyaka minji. Kuyungizya waawo, mutabi wakasalide kuti cilawo cakeelede kubelekwa buyo abapainiya ibasika ku 200, balo ibakali kubelekela muzilawo izyakali mumasena aakule, pele ikutali mumbungano. Aboobo mutabi wakaambila baabo ibakajisi makanze aakuba bapainiya mu Britain kuti tiikwakacili kuyandika bapainiya mucisi eeci pe, pele bakabakulwaizya kuunka kuyoobelekela kuzisi zimbi zyamu Europe. Cikkomanisya ncakuti, bapainiya banji bakazwa mu Britain akuunka kuzisi mbuli ku France, nokuba kuti bamwi tiibakauzyi kabotu mwaambo wakucisi nkobakali kuunka mane buya bamwi tiibakauzyi naaceya.

Cibalo cimwi mu Mulimo Wesu wa Bwami wamu 1937 cakabikka mbaakani yakubeleka mawoola aali 1 miliyoni mumwaka wa 1938! Eeyo mbaakani yakali kukonzya kuzuzikizyigwa kuti sikumwaya umwi aumwi wabeleka mawoola aali 15 amwezi mpoonya mupainiya umwi aumwi wabeleka mawoola aali 110. Kwakapegwa muzeezo wakupanga bubambe bwatubunga ibwakubeleka mawoola aali osanwe mumazuba aasalidwe alimwi akubikkila kapati maano kucita nyendo zyakupilukila, kwaambisya mukati kansondo ciindi cakumazuba.

Bubambe oobu bwakabakulwaizya kapati bantu banji. Ba Hilda Padgett * balayeeya aciindi eeciya kuti, “Ooku nkokukulwaizya nkotwakali kulangila kuzwa kumaofesi mapati, kwalo tobanji nkotwakali kulombozya, alimwi bubotu bwakalibonya mukaindi kasyoonto buyo.” Mucizyi E. F. Wallis wakaamba kuti: “Muzeezo wakubeleka mawoola osanwe mumazuba aasalidwe, bwakali bubambe bubotu kapati! Kunyina cintu cimbi icakali kukonzya kutuletela lukkomano kwiinda kutola lubazu mumulimo wa Mwami buzuba boonse? . . . Inga ndaamba kuti twakali kupiluka katukatede, pele twakalikkomene kapati.” Mukubusi wazina lya Stephen Miller wakabona mbowakalibindide mulimo, aboobo wakabweza ntaamu akaambo kakwaambilizya ooku. Wakali kuyanda kucita oobo mbwaanga wakalijisi coolwe cakucita boobo! Ulayeeya tukamu twabaabo ibakali kuccovwa macinga kabakambauka buzuba boonse alimwi ciindi cacilimo kumangolezya bakali kulizya makani aakalekkodwa. Bakali kukambauka cabusungu kwiinda mukweenda mumulongo kumwaya makani kubelesya zikwankwani alimwi bakali kucita bukambausi bwamumugwagwa kubelesya mamagazini.

Kuyungizya waawo Mulimo Wesu wa Bwami wakakulwaizya kuti: “Tuyanda bapainiya ibali 1,000.” Malailile mapya aajatikizya zilawo akali kwaamba kuti bapainiya tiibakacili kuyandika kubeleka kumasena aakule balikke pe, pele kuti bakeelede kubelekela antoomwe abasimbungano kutegwa babayumye-yumye akubakulwaizya. Ba Joyce Ellis balayeeya kuti, “Bakwesu banji bakatalika  kubona kuti bakeelede kucita bupainiya.” Baamba kuti, “Nokuba kuti ndakali buyo amyaka iili 13 aciindi eeco, makanze aangu akali aakucita bupainiya nkaambo eeco ncondakali kuyanda.” Ba Joyce Ellis bakaazuzikizya makanze aabo mu July 1940, kabajisi myaka iili 15. Ba Peter, balo ibakazyooba balumi babo bakaamvwa makani aakuti “Amusinsimuke” calo cakabapa kuti “batalike kuyeeya zyakucita bupainiya.” Mu 1940, kabajisi myaka iili 17, bakaccovwa makkilomita aali 105 kuya ku Scarborough kutegwa bakatalike mulimo wabo mupya wabupainiya.

Ba Cyril aba Kitty Johnson bali akati kabapainiya bapya ibakalyaabide kapati. Aboobo bakayeeya buyo kuti baisambale ŋanda azintu zyabo kutegwa bacikonzye kujana ziyandika mumulimo wabo waciindi coonse. Ba Cyril bakauleka mulimo wabo, alimwi kautanamana mwezi bakalilibambilide kale kutalika bupainiya. Bakaamba kuti: “Twakalisinizyide kuti ntaamu eeyi njotwakabweza yakaliluzi. Nkaambo twakaibweza cakuliyandila alimwi twakakkomana kucita boobo.”

Akaambo kakuti mweelwe wabapainiya wakayaambele mukulaba kwaliso, bakwesu ibakajisi mikuli bakayeeya nzila zyakugwasyilizya bapainiya aaba ibakali kuyaabuvwula. Ba Jim Carr, balo ibakali kubeleka mbuli mulangizi wabbazu mu 1938, bakatobela muzeezo wakujana maanda aaleenti aabapainiya mumadolopo. Tukamu twabapainiya twakakulwaizyigwa kukkala akubelekela antoomwe mubukambausi, calo cakapa kuti kutanoobelesyegwi mali manji. Ku Sheffield, bakajana ŋanda mpati yaleenti yalo iyakeelede kulanganizyigwa amukwesu umwi iwakasalidwe. Basimbungano ibakali kukkala mubusena oobo bakasanga mali alimwi azintu zimwi. Ba Jim balayeeya ategwa: “Boonse bakabelekela aantoomwe kuti bubambe oobu buzwidilile.” Bapainiya ibakali kubeleka canguzu ibali 10 mbabakali kukkala muŋanda eeyo kabajisi bubambe bubotu bwakumuuya. “Kulingaula magwalo abuzuba kwakali kucitwa mafwumofwumo kabatanalya” alimwi “bapainiya bakali kuunka kuzilawo zyabo zyakukambaukila mumasena aaindene-indene aamudolopo.”

Basikumwaya antoomwe abapainiya bakabelekela antoomwe kusika ambaakani yamawoola aali 1 miliyoni mu 1938. Malipooti atondezya kuti kwakali kuyaambele mumbazu zyoonse zyamulimo wakukambauka. Mumyaka iili yosanwe, basikumwaya mu Britain bakayungizyika munsi-munsi aziindi zyotatwe. Busungu bwakubikkila maano kumulimo wa Bwami bwakayumya bantu ba Jehova kuti balibambile myaka yankondo iyakali kulangilwa.

Mazuba aano, mweelwe wabapainiya mu Britain uciyungizyika, noiyaabuswena nkondo ya Leza ya Armagedoni. Mweelwe wabapainiya watanta kapati mumyaka iili 10 yainda, cakuti mu October 2015 wakasika ku 13,224. Bapainiya aaba balizyi kabotu kuti mulimo waciindi coonse njenzila iinda kubota yakubelesya maumi aabo.