MU Mujibelo, mu April 25, 2015, kwakacitika muzuzumo wanyika iwakajisi nguzu zisika ku 7.8-magnitude ku Nepal, icisi cizwide malundu icaku India nkoili kunyika. Muzuzumo wanyika ooyu wakacitika mubusena bulampa makkilomita aali 80 kunyika lwaambo mudolopo pati lya Kathmandu. Cuusisya ncakuti, bantu bainda ku 8,500 bakafwa, calo cipa muzuzumo ooyu waku Nepal kuti ube ngomuzuzumo iwakanyonyoona kapati akati kantenda izilicitikila. Maanda aainda kucisela ca 1 miliyoni akanyonyooka. Kuli Bakamboni ba Jehova ibali 2,200 ku Nepal, alimwi bunji bwabo bakali kukkala mubusena ibwakajatikizygwa amuzuzumo ooyu. Cuusisya ncakuti, Kamboni omwe abana bakwe bobilo bakafwa.

Kamboni umwi uutegwa Michelle, wakaamba kuti: “Muzuzumo wanyika wakacitika ciindi mbungano izili mumasena aakanyonyooka kapati nozyakali kucita miswaangano ya Bunakristo. Ikuti nowakacitika ciindi bantu banji nobakali kuŋanda, tacidoonekwi kuti bantu banji nobakalicisa kapati alimwi akufwa.” Ino nkaambo nzi aabo ibakali kumiswaangano ncobatakalicisa? Mbwaayakidwe Maanda aa Bwami ncecintu cakagwasya kapati.

Maanda aa Bwami aaliko mazuba aano ku Nepal, ayakidwe munzila mwaatakonzyi kunyonyooka akaambo kamuzuzumo wanyika. Ba Man Bahadur, ibali mumulimo wakuyaka Maanda aa Bwami, bakaamba kuti: “Kanji-kanji twalikubuzyigwa ikaambo ncotuyaka ntalisyo njumu kapati kakuli maanda aayakwa mpawo maniini buyo. Pele lino twabubona bubotu!” Nowakainda muzuzumo wanyika, Maanda aa Bwami akazumizyigwa kuti abe mayusilo. Nokuba kuti kwakacili tumizuzumo itwakacili kucitika nowakainda muzuzumo mupati, Bakamboni ba Jehova alimwi abasimukobonyina bakalimvwa kukwabililwa.

Cakufwambaana baalu Banakristo bakatalika kuyandaula basimbungano ibatakaliko. Kamboni umwi uutegwa Babita, wakaamba kuti: “Baalu bakabikkila kapati maano kulanganya mbungano kutali zintu zyabo. Twakakulwaizyigwa kapati kubona luyando luli boobu.” Nokwakainda buzuba bomwe kuzwa nowakacitika muzuzumo wanyika, bakwesu botatwe ibali mukkomiti iilanganya mulimo wa Bakamboni ba Jehova mu Nepal, antoomwe ababelesi beendeenda, naa balangizi bamabazu bakatalika kuswaya mbungano kutegwa babone ziyandika alimwi akugwasyilizya baalu bamumbungano eezyo.

Nokwakainda mazuba aali cisambomwe kuzwa nowakacitika muzuzumo wanyika, ba Gary Breaux, ibakazwa kumaofesi mapati aa Bakamboni ba Jehova ku United States, bakaboola ku Nepal antoomwe abakaintu babo ba Ruby. Ba Reuben ibamukkomiti yaambwa kale bakaamba kuti: “Akaambo kamanyongwe aakali mu Kathmandu alimwi atumizuzumo itwakacili kucitika nowakainda muzuzumo mupati, twakali kudooneka kuti naa Mukwesu Breaux ulacikonzya kusika. Pele wakaliyandide kusika—aboobo wakasika! Bakamboni bakubusena ooko bakalumba kapati akaambo kakuswaya kwakwe.”

Ba Silas, ibabelekela kuofesi ya Bakamboni mu Nepal bakaamba kuti: “Mbwaakatalika buyo kubeleka alimwi mafooni eesu, akatalika kulila syikati amasiku! Bakambonima nyika yoonse bakaliyandide kumvwa mbotupona. Nokuba kuti bamwi bakali kubelesya mwaambo ngotwatakali kukonzya kumvwa, twakazyiba kuti balatuyanda alimwi akuti bakaliyandide kutugwasya.”

Kwamazuba aali mbwaabede kuzwa nowakacitika muzuzumo, Bakamboni bakubusena ooku bakali kuleta zyakulya ku Ŋanda ya Bwami kutegwa balide antoomwe abaabo ibatakajisi. Kuyungizya  waawo, kwakabambwa Kkomiti Iigwasya Nokwacitika Ntenda, alimwi tiilyakalampa zintu zyakuligwasyilizya zyakatalika kusika kuzwa ku Bangladesh, India, alimwi a Japan. Mumazuba masyoonto buyo, kakamu kabasilisi Bakamboni kakasika kuzwa ku Europe akupanga kaanda mwakubelekela ku Ŋanda ya Bwami imwi. Bakatalika kubeleka cakufwambaana, ikutali kulanga buyo mbobakaliciside bantu kumubili akaambo kamuzuzumo, pele alimwi akubagwasya kuzyiba mbobakonzya kuliyumya kukupenga kwamumizeezo kuli koonse nkobakajisi.

Kaamba mbobakalimvwide bantu banji, mukaintu umwi uutegwa Uttara wakaamba kuti: “Muzuzumo wanyika ooyu wakali mubyaabi kapati alimwi wakali kuyoosya citaambiki. Pele nowakainda, twakalimvwa kuba acilongwe ciyumu amukwasyi wesu wakumuuya kwiinda kaindi.” Masimpe, muzuzumo wanyika kunyina nowakapa kuti luyando ndobajisi bantu ba Jehova kulinguwe alimwi akuli umwi amweenzinyina luceye. Muciindi caboobo, wakapa kuti luyando oolu luyume kapati.