“Ibabi baakumena mbuli nsaku alimwi basimucita zibi boonse baakuvwulisya, eeci ciyoocitika kutegwa bakanyonyoonwe kukabe kutamani.”—INTEMBAUZYO 92:7.

Mbubwenya mbuli mbotwaiya kale mucibalo cainda, zintu zibi ziyaabwiindila buya. Pele eeci taceelede kutugambya. Kayi Bbaibbele lyakaambila limwi kulugwalo lwa 2 Timoteyo 3:1-5 kuti “kumazuba aamamanino” bantu bayakwiindila kubija. Ino kumazuba aamamanino aanzi? Nkokuti mazuba aamamanino aanyika eeyi yabantu batayandi kumumvwida Leza. Ino-ino, Leza uyoobanyonyoona boonse aabo ibatayandi kucinca nzila zyabo zibi. Mpoonya, balikke bantu bali kabotu, nkokuti aabo bamvwida Leza mbabayoosyaala anyika. Bbaibbele lyaamba kuti: “Balulami bayookona nyika, alimwi bayookkala alinjiyo lyoonse mane kukabe kutamani.”—Intembauzyo 37:29.

“Leza uupa luumuno ulapwayaula Saatani.”—BAROMA 16:20.

Ciindi Saatani, madaimona aakwe alimwi abantu babi boonse baakugwisyigwa munyika, kuyooba  luumuno anyika. Mulengi wesu usyomezya kuti: “Takukabi muntu naba omwe uuyoobayoosya.”—Mika 4:4.

“Tente lya Leza lili aabantu . . . Eelyo uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.”—CIYUBUNUZYO 21:3, 4.

Kupenga alimwi akuciswa ziyoomana nkaambo Leza uyoozibambulula zintu zyoonse nzyaakanyonganya Saatani, Adamu, Eva alimwi akutalondoka kwesu. Akaambo kaceeci, noluba lufwu ‘talukabi limbi pe.’ Bantu bamuyanda alimwi akumumvwida Mulengi wesu, bayoopona mane kukabe kutamani. Pele ino bayookkala kuli?

“Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—ISAYA 35:1.

Ciindi Leza aakugwisya bubi boonse, nyika iyooba paradaiso. Kunooli mapaakki manji aayebeka amagaadeni alimwi kuyooba zyakulya zinji. (Intembauzyo 72:16) Lwaanje, lwizi amilonga, tazinoojisi dooti alimwi zinoozwide zilenge zyuumi. Bbala lyakuti “busofwaazi” tatucinooliyeeyi akulyaamba. Bantu bayooyaka maanda aabo aabageme akukkala mulingawo. Alimwi kunyina muntu uutanoojisi ŋanda yakwe, uyoofwa nzala naa kuba mucete.—Isaya 65:21, 22.

“Kuyooba bubuke.”—MILIMO 24:15.

Sena inga mwayanda kuyoobabona alimwi bayandwa banu ibakafwa? Leza singuzuzyoonse uyoobabusya munyika ya Paradaiso. Muyoobazyiba alimwi abalo bayoomuzyiba. Amweezeezye buyo mbomuyookkomana alimwi abalo mbobayookkomana! Nkaambo nzi ncotukonzya kuba masimpe kuti eeci ciyoocitika ncobeni? Nkaambo kakuti Bbaibbele lilatupa zikozyanyo zyabantu bapati alimwi abana ibakabusyigwa, akubakamantanya alimwi amikwasyi yabo. Alimwi buya, kanji-kanji Jesu wakabusya bafwide bantu banji kabalangilila.—Luka 8:49-56; Johane 11:11-14, 38-44.