Kulilesya kubikkilizya kucikonzya

• kulindila

• kulijata muzintu

• kumanizya kucita zintu nzyomutakkomanini

• kubikkila maano kuzintu nzyobayandika bamwi kwiinda zyanu

Bana ibajisi bube bwakulilesya balakonzya kuzunda sunko, nokuba kuti inga kalilibonya kuti ncintu cikonzya kubakkomanisya. Mukwiimpana, bana ibatajisi bube bwakulilesya balalangilwa kuba bantu

• bakali

• bajisi penzi lyakutyompwa

• bafweba naa baciindizya kunywa bukoko naa kubelesya misamu iikola

• balya cilyaalye

Buvwuntauzi bumwi bwakatondezya kuti bana ibajisi bube bwakulilesya, kanji-kanji baakukomena inga banooli bantu batavwuli kuciswa-ciswa, batajisi penzi lyakubula mali alimwi ibatobela milawo. Buvwuntauzi oobu bwakapa kuti ba Angela Duckworth baku University of Pennsylvania, basyaabupampu mumakani aakuzyiba bantu mbobayeeya baambe kuti: “Bube bwakulilesya mbube buyandika kapati.”

Amwiiye kwaamba kuti peepe mpoonya amucicite ncomwaamba.

NJIISYO YAMU BBAIBBELE: “Kwaamba kwanu kuti ‘Inzya’ akube inzya, akuti ‘Peepe’ akube peepe.”—Matayo 5:37.

Bana basyoonto balakonzya kusunka bazyali kwiinda mukucita mambeke naa macece, ambweni nobali mubuleya. Ikuti bazyali babapa ncobayanda bana, bana bayoozumanana kucita oobu kufwumbwa ciindi nobayanda cintu cimwi.

Kulubazu lumwi, ikuti muzyali waamba kuti peepe alimwi tamupi ncayanda mwana, nkokuti mwana ulaiya kuti mubuumi, talili lyoonse notukonzya kuba azintu nzyotuyanda. Ba Dr. David Walsh bakalemba kuti: “Kwaamba masimpe, bantu ibazyiba kaambo aaka mbabakkomana kapati. Tacitondezyi luyando kupa bana kuyeeya kuti balakonzya kupegwa kufwumbwa ncobayanda.” *

 Ikuti kamutamupi cintu cili coonse ncayanda mwanaanu lino, ciyoomuubila ikulilesya kumbele ikuti naa wasunkwa kubelesya misamu iikola, kucita bwaamu naa kucita cintu cili coonse cikonzya kumuletela penzi walo naa bantu bamwi.

Amumugwasye mwanaanu kuzyiba cikonzya kucitika ikuti walilemeka kabotu alimwi aciindi naatalilemeka.

NJIISYO YAMU BBAIBBELE: “Kufwumbwa cintu muntu ncasyanga, ncencico eeco ncayootebula.”—Bagalatiya 6:7.

Mwanaanu weelede kuzyiba kuti kufwumbwa cintu ncacita kuli cikonzya kutobela alimwi akuti, ikuti tanaalilesya ulakonzya kucitikilwa zintu zibyaabi. Mucikozyanyo, ikuti mwanaanu kafwambaana kunyema, bantu bamwi ambweni inga batalika kumutantamuka. Kulubazu lumbi, ikuti kacikonzya kulijata ciindi nobamunyemya bamwi, nkokuti bantu banoomuyanda. Amumugwasye mwanaanu kuzyiba kuti zintu zinoomweendela kabotu ikuti kasoleka kulijata.

Amumuyiisye mwanaanu kuzyiba zintu ziyandika kapati.

NJIISYO YAMU BBAIBBELE: ‘Amusinizye zintu ziyandika kapati.’—Bafilipi 1:10.

Kulilesya tacaambi buyo kulijata kucita cibi; pele cilabikkilizya akucita cintu ciyandika, noliba leelyo nocitatukkomanisyi. Cilayandika kapati kuti mwanaanu aiye mbwakonzya kuzyiba zintu ziyandika kapati alimwi akusaanguna kucita nzizyo. Mucikozyanyo, weelede kusaanguna kucita zintu zyakucikolo katanaunka kukusobana.

Amube cikozyanyo cibotu.

NJIISYO YAMU BBAIBBELE: “Ndamupa citondezyo, kuti mbubonya mbondamucitila, kamucita mbubonya andinywe.”—Johane 13:15.

Mwanaanu uyoomubona mbomucita ikuti naa kwamucitikila cintu cibyaabi naa cimunyemya. Amuleke alibonene kuti zintu zyeenda kabotu ikuti naa katulilesya. Mucikozyanyo, ikuti mwanaanu wacita cintu cibyaabi, sena mulaciindizya kunyema naa mulalijata?