BANA Kazakhstan kuzwa kaindi bakali basimutuntuli. Kusikila sunu, beembezi bamwi bana Kazakhstan balalonga kuunka kumacelelo aaindene-indene kweelana aciindi camwaka. Ciindi cacilimo beembelela mumasena aamumalundu aatontola. Mpoonya mupeyo waswena, matanga aabo baatola kumasena aakasaala ikutakwe malundu.

Bana Kazakhstan bamwi bakkala mumadolopo aasumpukide. Nokuba boobo, bunji bwazilengwa zyabo, zyakulya alimwi azintu zyakupanga-panga zitondezya buumi mbobakali kupona bamasyaanyinakulu. Bana Kazakhstan balicibwene kweema, kwiimba alimwi akulizya nyimbo kubelesya ziimbyo zyabo.

Twaanda itwiitwa kuti yurt itwabasimutuntuli aaba ngemaanda ngobabelesya mubuumi bwabo. Beembezi balatukkomanina  twaanda ootu alimwi buya nobaba baabo ibakkala mudolopo balatubelesya ciindi nokucitika zintu zyaalubazu. Twaanda ootu alimwi tulabelesyegwa abantu ibaswaya masena. Twaanda ootu mbotulibonya mukati tutondezya bamakaintu bana Kazakhstan mbobali basungu muzyakusuma-suma, zyakupanga-panga alimwi akuluka minseme.

Mikwasyi yabana Kazakhstan iikkala muminzi, ijisi cilengwa cakuvwuba mabbiza. Bana Kazakhstan bajisi mabala aasika ku 21 ngobabelesya kwaamba mabbiza, alimwi bbala limwi alimwi lilijisi bupanduluzi bwandilyo, mpoonya kuli mabala aainda ku 30 aatondezya mibala yamabbiza. Bana Kazakhstan bacibona kuti, ikupegwa bbiza liboneka kabotu ncimwi cazipego zidula kapati alimwi icibikkilwa kapati maano. Mumasena imuli mafaamu, bana basankwa balayiisyigwa kukkwela mabbiza kabacili baniini.

Kweelana acilengwa cabana Kazakhstan, kweelede kuti ciindi nobalya kakuli anyama alimwi kaitabikkidwe tununkilizyo. Akati kazyakunywa nzyobayandisya kapati, kuli cakunywa ncobaita kuti koumiss icipangwa amukupa wamabbiza alimwi cakunywa eeci caambwa kuti cilijisi busani bunji alimwi acakunywa ncobaamba kuti shubat icipapa-papa calo icipangwa amukupa wankamela.

Mutabi wa Bakamboni ba Jehova waku Almaty ulatambula beenzu alimwi akubeenzyeenzya.