Wakali Wamukwasyi wa Kayafa
Wakali Wamukwasyi wa Kayafa
Zimwi ziindi, basikuvwukkula zyintu zyakaindi balajana malembe aatondezya cacigaminina naa cakwiinda mumbali kuti zyintu zimwi zyakali zyamuntu umwi waambidwe mu Bbaibbele. Mucikozyanyo, mu 2011, basikwiiya zyamu Bbaibbele baku Israel bakamwaya makani aasinizya muntu umwi waambidwe mu Bbaibbele. Eeli lyakali bbokesi lyakaindi ilijisi myaka iili 2,000, ilibambidwe kabotu-kabotu mwalo mafuwa aamuntu mwaakali kubikwa nyama yakwe noyamana kubola.
Ibbokesi eeli lyakalembedwe kuti: “Miriamu mwana musimbi wa Yeshua mwana wa Kayafa, mupaizi waku Miziya kuzwa ku Beth ʹImri.” Mupaizi mupati mu Juda iwakajatikizyidwe mukubeteka alimwi akujaya Jesu wakali Kayafa. (Joh. 11:48-50) Syaazibwene mumakani aakaindi Flavius Josephus umwaamba kuti ngu “Josefa iwakali kwiitwa kuti Kayafa.” Kuboneka kuti bbokesi eeli lyakali lya umwi wabasazinyina bamupaizi mupati. Mbwaanga malembe aakali abbokesi ilyakajanwa musyule iliyeeyelwa kuti lyakali lyamupaizi mupati lwakwe limwaamba kuti ngu Yehosef bar Kayafa, naa Josefa, mwana musankwa wa Kayafa, * kweelede kuti Miriamu wakali wamukowa wa Kayafa munzila imwi.
Kweelana amakani ngobakajana bakabunga ka Israel Antiquities Authority (IAA), ibbokesi lya Miriamu lyakabwezyegwa kubabbi balo ibakalibba mucuumbwe cakaindi. Kulingaula cakuzekaula eeci alimwi azilembedwe ali ncico kutondezya kuti ncamasimpe.
Kuli acimbi cintu cipya ncotwiiya kuzwa kubbokesi eeli. Majwi aalembedwe aamba kujatikizya “Miziya,” oobu bwakali bulizyi bwamamanino akati kamalizyi aali 24 aabapaizi, ibakali kubelekela atempele mu Jerusalemu. (1 Mak. 24:18) Iba kabunga ka Israel Antiquities Authority (IAA), baamba kuti malembe aakali aacibbokesi eeci akayubununa kuti “mukwasyi wazyina lyakuti Kayafa wakaliswaangene abulizyi bwa Miziya.”
Malemba alimwi aamba Beth ʹImri. Kuli bupanduluzi bobilo bwacibeela eeci camalembe aaya. Iba kabunga ka Israel Antiquities Authority (IAA), baamba kuti “Bupanduluzi bwakusaanguna mbwakuti Beth ʹImri ndizyina lyamukwasyi wabupaizi—bana basankwa ba Imeri (Ezr. 2:36-37; Neh. 7:39-42) iluzubo lwabo lubikkilizya bamwi akati kabaabo bakali mumalizyi aa Miziya.” “Bupanduluzi bwabili mbwakuti [Beth ʹImri] mbusena nkwaakazyalilwa sikwaazwa naa mukwasyi wakwe woonse.” Kufwumbwa naa cili buti, bbokesi lya Miriamu lilapa bumboni bwakuti Bbaibbele lyaamba bantu beni ibakali kuzulilwa mumikwasyi iini.
[Bupanduluzi buyungizidwe]
^ munc. 3 Kujatikizya bbokesi lya Kayafa, amubone cibalo cijisi mutwe wakuti “The High Priest Who Condemned Jesus (Mupaizi Mupati Iwakaaba Jesu) mu Ngazi Yamulindizi ya Cingisi ya January 15, 2006, mapeeji 10-13.
[Cifwanikiso icili apeeji 30]
Cifwanikiso Cili Kusyule: Busena mwakali kuyobwedwa mabbokesi
[Kulumba]
Todd Bolen/BiblePlaces.com
[Kulumba]
Boaz Zissu, Bar-Ilan University, Israel
Andiza Inga Mwaakkomanina Ayaaya
TWAAMBO TUMWI
Zyakuvwukkula Zitondezya Kuti Mwami Davida Wakaliko Ncobeni
Bamwi basikukazya baamba kuti makani aamba Mwami Davida nkaano buyo, nkobakazyootalisya bantu mukuya kwaciindi. Ino basikuvwukkula zyakaindi bakajana nzi?
