1, 2. Ncinzi ncaakacita Jesu mangolezya aamu Nisani 14, 33 C.E.? (Amubone cifwanikiso icili kumatalikilo aacibalo.)

KWASIYA, pele kulibonya mumuni wamwezi uuzwide mu Jerusalemu. Mangolezya aamu Nisani 14, 33 C.E. Jesu abaapostolo bakwe bamanizya kusekelela Pobwe Lyakwiindilila, kwiibaluka kufwutulwa kwabana Israyeli kuzwa mubuzike mu Egepita myaka iili 1,500 yainda. Kali abaapostolo bakwe basyomeka ibali 11, Jesu watalisya mulalilo waalubazu—walo unakwiibalusya lufwu lwakwe ilulangilwa kucitika lino-lino buzuba oobu kabutanamana. *—Mt. 26:1, 2.

² Jesu walumba mpoonya wapa baapostolo bakwe cinkwa citakwe bumena kumane waamba kuti: “Amubweze mulye.” Wabweza nkapu yawaini, alimwi walumba amane wabapa kati: “Amunywe mulinjiyo nyoonse.” (Mt. 26:26, 27) Jesu takoobapa cakulya cimbi pe, pele ulijisi zinji nzyayanda kwaambila basikumutobela basyomeka mubusiku oobu buyandika kapati.

3. Mibuzyo nzi njotutiilange-lange mucibalo eeci?

 ³ Oobu mbombubo Jesu mbwaakatalisya Ciibalusyo calufwu lwakwe, alimwi iciitwa kuti “Mulalilo wa Mwami.” (1Kor. 11:20) Kujatikizya Ciibalusyo, bamwi balakonzya kubuzya kuti: Nkaambo nzi ncociyandika kwiibaluka lufwu lwa Jesu? Ino mukamu alimwi awaini ziiminina nzi? Mbuti mbotukonzya kulibambila Ciibalusyo? Ino mbaani beelede kulya akunywa zitondezyo? Alimwi mbuti Banakristo mbobacita kweelana ancaamba Magwalo kujatikizya bulangizi bwabo?

4. Ncinzi cakakonzyeka kulindiswe kwiinda mulufwu lwa Jesu?

⁴ Mbotuli bana ba Adamu, twakakona cibi alimwi alufwu. (Rom. 5:12) Taakwe muntu uutalondokede uukonzya kupa Leza cinunuzyo cabuumi bwakwe naa cabantu bambi. (Int. 49:6-9) Nokuba boobo, kwiinda mulufwu lwakwe, Jesu wakapa muulo wacinunuzyo ceelede—mubili wakwe uulondokede alimwi abulowa bwakwe ibwakatika. Kwiinda mukupa mpindu yacinunuzyo kuli Leza, Jesu wakapa kuti tufwutulwe kuzwa kucibi alimwi alufwu alimwi akutambula cipego cabuumi butamani.—Rom. 6:23; 1 Kor. 15:21, 22.

5. (a) Ino tuzyi buti kuti Leza alimwi a Kristo balabayanda bantu? (b) Nkaambo nzi ncotweelede kujanika ku Ciibalusyo calufwu lwa Jesu?

⁵ Bubambe bwacinunuzyo butondezya kuti Leza ulabayanda bantu. (Joh. 3:16) Cituuzyo ca Jesu citondezya kuti Jesu awalo ulatuyanda. Katanaboola anyika, wakali “mubelesi uucibwene” wa Leza, Jesu wakali ‘kubayanda kapati bana babantu.’ (Tus. 8:30, 31) Kulumba Leza alimwi a Mwanaakwe kweelede kutukulwaizya kujanika ku Ciibalusyo calufwu lwa Jesu, kwiinda mukucita boobu tutobela mulawo wakuti: “Kamucita oobu lyoonse kutegwa kamundiyeeya.”—1 Kor. 11:23-25.

6. Ino cinkwa alimwi awaini zibelesyegwa lya Ciibalusyo tweelede kuzibona buti?

⁶ Naakatalisya Ciibalusyo, Jesu tanaakacinca cinkwa alimwi awaini munzila yamaleele kuba mubili wakwe wini naa waini kuba bulowa bwakwe bwini pe. Muciindi caboobo, kujatikizya cinkwa wakaamba kuti: “Eeci ciiminina mubili wangu.” Kujatikizya waini, wakaamba kuti: “Eeci ciiminina ‘bulowa bwangu bwacizuminano,’ bwalo buyootilwa akaambo kabanji.” (Mk. 14:22-24) Aboobo, cilalibonya kuti cinkwa alimwi awaini zyakeelede kubonwa kuti nzikozyanyo buyo.

7. Ino cinkwa cibelesyegwa lya Ciibalusyo ciiminina nzi?

⁷ Mubuzuba oobu buyandika kapati, kumangolezya aamu 33 C.E., Jesu wakabelesya cinkwa citakwe bumena icakasyeede nobakamana kulya Pobwe Lyakwiindilila. (Kul. 12:8) Mu Magwalo, bumena zimwi ziindi bwiiminina kutalondoka naa cibi. (Mt. 16:6, 11, 12; Lk. 12:1) Aboobo, cakali kuyandika kuti Jesu abelesye cinkwa citakwe bumena nkaambo cakali kwiiminina mubili wakwe uutajisi cibi. (Heb. 7:26) Aboobo, cinkwa camusyobo ooyu ncecibelesyegwa lya Ciibalusyo.

8. Ino waini wa Ciibalusyo wiiminina nzi?

⁸ Waini ngwaakabelesya Jesu mu Nisani 14, 33 C.E., wakali kwiiminina bulowa bwakwe, mbubwenya mbuli ncowiiminina waini uubelesyegwa lya Ciibalusyo mazuba aano. Kutegwa “zibi zyabantu banji zilekelelwe,” bulowa bwakwe bwakatilwa ku Gologota, ibusena ibwakali kunze aa Jerusalemu. (Mt. 26:28; 27:33) Akaambo kakuti cinkwa alimwi awaini wa Ciibalusyo ziiminina cituuzyo ca Jesu citaliboteli icakapegwa kubantu bamvwida alimwi akuti tulayanda kutondezya kulumba, cilayandika lwesu kutugama kulibambila Mulalilo wa Mwami.

9. (a) Nkaambo nzi ncociyandika kutobela mulongo wakubala Bbaibbele lya Ciibalusyo? (b) Ino mulimvwa buti kujatikizya Ciibalusyo?

⁹ Kwiinda mukutobela mulongo wakubala Bbaibbele lya Ciibalusyo uujanika mukabbuku ka Kulingaula Magwalo Abuzuba, tulakonzya kuzinzibala kuyeeya ncaakacita Jesu katanafwa. Kucita boobo kuyakutugwasya kulibambila mumyoyo yesu kujatikizya Mulalilo wa Mwami. * Mucizyi umwi wakaamba kuti: “Tulangila kujanika ku Ciibalusyo. Ncintu ciyaabwiinda kuba caalubazu mwaka amwaka. Ndiyeeya ciindi nobakafwa bataata mbondakali kubayanda kapati . . . eeci cindipa kuti ndilumbe kapati cinunuzyo. . . . Ndakalaazyi magwalo oonse alimwi ndakali kukonzya kwaapandulula! Pele lilikke nondakamvwa mbocicisa kufwidwa, ndendilyo nondakatalika kulumba mpindu yacinunuzyo.” Masimpe, ciindi notulibambila Ciibalusyo, inga cainda kubota kuti twayeeya mbotwaangununwa kuzwa kucibi alimwi alufwu kwiinda mucituuzyo ca Jesu.

10. Mbuti kulibambila Ciibalusyo mbokukonzya kuujatikizya mulimo wesu?

¹⁰ Kulibambila Ciibalusyo kulakonzya kubikkilizya akulibambila kuyungizya mulimo wesu munzila zimwi, ambweni kucita bupainiya bwakugwasyilizya mumwezi wa Ciibalusyo. Ciindi notutamba ziiyo zyesu zya Bbaibbele alimwi abamwi kujanika ku Mulalilo wa Mwami, tulakkomana kwaamba kujatikizya Leza, Mwanaakwe, alimwi azilongezyo nzyobayootambula aabo ibamukkomanisya akumutembaula Jehova.—Int. 148:12, 13.

11. Ino bana Korinto bamwi bakali kulya akunywa buti zitondezyo zya Ciibalusyo muunzila iiteelede?

¹¹ Ciindi nomulibambila Mulalilo wa Mwami, amulange-lange mwaapostolo Paulo ncaakalembela Banakristo kumbungano yaku Korinto. (Amubale 1 Bakorinto 11:27-34.) Paulo wakaamba kuti kufwumbwa uulya mukamu naa kunywa nkapu munzila iiteelede “unooli amulandu kujatikizya mubili alimwi abulowa bwa Mwami,” Jesu Kristo. Aboobo, munanike umwi aumwi weelede kuti “asaangune kulilingula abone naa uleelela,” mpoonya ndendilyo lilikke nakonzya kulya akunywa zitondezyo. Ikuti naa taacita oobo, “uliletela lubeta kwiinda mukulya akunywa.” Akaambo kakutalilemeka kabotu, bana Korinto banji ‘tiibakajisi nguzu alimwi bakalicisidwe, alimwi ibamwi bakali koona mulufwu’ lwakumuuya. Kuboneka kuti bamwi bakali kulya akunywa waini munji  kacitanacitika naa nocakali kucitika Ciibalusyo cakuti tiibakapakamene mumizeezo naa kumuuya. Kulya akunywa zitondezyo munzila eeyi iiteelede cakapa kuti batakkomaninwi a Leza.

12. (a) Ino Paulo wakakozyanisya Mulalilo kunzi, alimwi ino wakabacenjezya buti basikulya akunywa zitondezyo? (b) Ino sikulya asikunywa zitondezyo iwacita cibi cipati weelede kucita nzi?

¹² Paulo wakakozyanisya Ciibalusyo kucakulya cilidwa antoomwe abamwi, alimwi wakacenjezya basikulya kuti: “Tamukonzyi kunoonywida munkapu ya Jehova amunkapu yamadaimona; tamukonzyi kunoolida ‘atebulu lya Jehova’ alimwi aatebulu lyamadaimona.” (1 Kor. 10:16-21) Ikuti muntu uulya zitondezyo lya Mulalilo wa Mwami wacita cibi cipati, weelede kwaambila baalu kuti bamugwasye kumuuya. (Amubale Jakobo 5:14-16.) Kuti munanike ooyo watondezya “micelo yeendelana akweempwa,” nkokuti tatondezyi kuti unyansya cipaizyo ca Jesu kwiinda mukulya akunywa zitondezyo zya Ciibalusyo.—Lk. 3:8.

13. Nkaambo nzi ncociyandika kupailila bulangizi bwesu mbwatupede Leza?

¹³ Ciindi notulibambila lwesu kujatikizya Ciibalusyo, tuyakugwasyigwa ciindi notupaila akuzinzibala kuyeeya kujatikizya bulangizi mbwatupede Leza. Taakwe mubelesi wa Jehova uulyaabide alimwi asikutobela uusyomeka wa Mwanaakwe unga wayanda kunyansya cipaizyo ca Jesu kwiinda mukulya akunywa zitondezyo zya Ciibalusyo kuti naa katajisi bumboni bulimvwisya bwakuti Munakristo munanike. Aboobo, ino umwi inga wazyiba buti kuti uleelela kulya akunywa zitondezyo naa pe?

14. Ino kulya akunywa zitondezyo zya Ciibalusyo kujatikizyigwa buti acizuminano cipya?

¹⁴ Aabo ibalya akunywa zitondezyo zya Ciibalusyo munzila yeelede balisinizyide kuti bali mucizuminano cipya. Kujatikizya waini, Jesu wakati: “Inkapu eeyi yiiminina cizuminano cipya iciyeeme abulowa bwangu.” (1 Kor. 11:25) Kwiinda mumusinsimi Jeremiya, Leza wakaambila limwi kuti uyakubamba cizuminano cipya iciindene acizuminano ca Mulawo ncaakatangene abana Israyeli. (Amubale Jeremiya 31:31-34.) Leza watangana cizuminano cipya abana Israyeli bakumuuya. (Gal. 6:15, 16) Cizuminano eeci cilabeleka akaambo kacinunuzyo ca Kristo kwiinda mubulowa bwakwe bwakatika. (Lk. 22:20) Jesu ngo Simwiimaakati wacizuminano cipya, alimwi bananike basyomeka ibanjila mucizuminano eeci batambula lukono lwakujulu.—Heb. 8:6; 9:15.

15. Mbaani ibakanjizyigwa mucizuminano ca Bwami, alimwi ncoolwe nzi ncobalindila kuti bazumanana kusyomeka?

¹⁵ Bantu ibeelela kulya akunywa zitondezyo zya Ciibalusyo balizyi kuti bali mucizuminano cipya. (Amubale Luka 12:32.) Aabo ibakaba basikutobela Jesu bananike alimwi ibakakakatila kuli Jesu, kupenga mbuli mbwaakapenga, bakali kuyakutola lubazu mukulela anguwe kujulu. (Flp. 3:10) Akaambo kakuti bali mucizuminano ca Bwami, bananike basyomeka bayakulela a Kristo kabali bami kukabe kutamani. (Ciy. 22:5) Bantu bali boobu cakweelela balalya akunywa zitondezyo lya Mulalilo wa Mwami.

16. Amupandulule mubufwaafwi ncolwaamba lugwalo lwa Baroma 8:15-17.

¹⁶ Balikke aabo ibajisi bumboni bwamuuya bwakuti mbana ba Leza mbabeelede kulya akunywa zitondezyo zya Ciibalusyo. (Amubale Baroma 8:15-17.) Amubone kuti Paulo wakabelesya bbala lyamumwaambo waci Aramaic lyakuti “Abba,” ilyaamba kuti “O Taata!” Mwana ulakonzya kubelesya bbala eeli ciindi nabandika abausyi, nkaambo ndibbala litondezya luyando kubikkilizya akumvwana akati kamwana abausyi. Aabo ibakatambula ‘muuya uubapa kuba bana ba Leza’ mbana ba Leza kwiinda mumuuya.  Muuya wakwe ucitila bumboni amuuya wabo, ubapa kuzyiba kuti mbana ba Jehova bananikidwe. Takali buyo kaambo kakubula luyandisisyo lwakupona anyika pe. Balisinizyide kuti mbaasikukonanyina a Jesu mu Bwami bwakujulu kuti naa basyomeka kusikila kulufwu. Mazuba aano, kucili buyo basyoonto akati kabasikutobela Kristo ibali 144,000 ‘ibakananikwa kuli yooyo uusalala,’ Jehova. (1 Joh. 2:20; Ciy. 14:1) Kwiinda mumuuya uusalala, balalila kuti “Abba, Taata!” Eelo kaka balijisi cilongezyo cakuba aacilongwe a Leza!

17. Ino bananike bajisi bulangizi nzi, alimwi ino babubona buti?

¹⁷ Ikuti kamuli Munakristo munanike, makani aajatikizya bulangizi bwakujulu makani aayandika kapati ngomweelede kupailila lwanu kumugama. Ciindi Bbaibbele nolyaamba kujatikizya ‘kusyomezyegwa mucikwati’ kuli Sibwiinga wakujulu, Jesu Kristo, mulimvwa kuti majwi aaya abeleka kulindinywe, alimwi mulangila kuyooba cibeela ‘canabwiinga.’ (2 Kor. 11:2; Joh. 3:27-29; Ciy. 21:2, 9-14) Ciindi Leza kwiinda mu Jwi lyakwe natondezya luyando kubana bakwe bakumuuya, mulazumina kuti, “Majwi aaya aamba ndime.” Alimwi ciindi Jwi lya Jehova nolipa malailile kubana bakwe bananike, muuya uusalala ulamukulwaizya kumumvwida alimwi akwaamba mumoyo wanu kuti, “Eeci cibeleka kulindime.” Aboobo, muuya wa Leza ubelekela antoomwe amuuya wanu kucitila bumboni bwakuti mujisi bulangizi bwakujulu.

18. Ino ‘bambelele zimbi’ bajisi bulangizi nzi, alimwi mulimvwa buti kujatikizya mbubo?

¹⁸ Kulubazu lumwi, ikuti kamuli ‘bankamu mpati’ ‘yambelele zimbi,’ Leza wamupa bulangizi bwakupona anyika. (Ciy. 7:9; Joh. 10:16) Muyanda kuti mukapone kukabe kutamani mu Paradaiso, alimwi mulakkomana kuzinzibala kuyeeya ncolyaamba Bbaibbele kujatikizya kupona anyika. Mulangila kuyakukkomana muluumuno lunji kamuzingulukidwe amukwasyi wanu abantu baluleme. Mulangila ciindi bantu nobatanoopengi akaambo kanzala, bucete, kuciswa, lufwu alimwi amapenzi aambi. (Int. 37:10, 11, 29; 67:6; 72:7, 16; Is. 33:24) Mulombozya kutambula bantu ibayakubusyigwa kabajisi bulangizi bwakupona anyika kukabe kutamani. (Joh. 5:28, 29) Eelo kaka mulamulumba Jehova akaambo kakuti wamulongezya kwiinda mukumupa bulangizi bwakupona anyika! Nokuba kuti tamulyi akunywa zitondezyo, mulajanika ku Ciibalusyo kutondezya kulumba cituuzyo cacinunuzyo ca Jesu Kristo.

19, 20. (a) Ino bulangizi mbwamupede Leza inga bwaakuzuzikizyigwa buti kulindinywe? (b) Nkaambo nzi ncomuyanda kuyoojanika ku Mulalilo wa Mwami?

¹⁹ Naa bulangizi bwanu mbwaanyika naa mbwakujulu, bulakonzya kuyoozuzikizyigwa kulindinywe lilikke kuti naa mwatondezya lusyomo muli Jehova Leza, Jesu Kristo, alimwi amucinunuzyo. Kwiinda mukujanika ku Ciibalusyo, muyooba acoolwe cakuzinzibala kuyeeya bulangizi mbomujisi alimwi amboluyandika kapati lufwu lwa Jesu. Aboobo, amube amakanze aakuba akati kamamiliyoni aabantu ibayoojanika ku Mulalilo wa Mwami lyaakubbila zuba muli Bwasanu, April 3, 2015, ku Maanda aa Bwami alimwi amumasena aambi nyika yoonse mbwiizulwa.

²⁰ Kujanika ku Ciibalusyo inga kwapa kuti mucilumbe kapati cituuzyo cacinunuzyo ca Jesu. Kubikkila maano kuswiilila kumakani aayookananwa kuyoomupa kuti mutondezye luyando kuli basimukobonyoko kwiinda mukubaambila nzyomwaiya kujatikizya luyando ndwaakatondezya Jehova alimwi amakanze aakwe mapati kujatikizya bantu. (Mt. 22:34-40) Aboobo, amukasolekesye kuyoojanika ku Mulalilo wa Mwami.