Ino Ncinzi Cipa Kuti Bantu Kabacita Zyintu Zibi?

Kuli kaambo kamwi bantu nkobatakonzyi kukazya. Aaka kaambo nkakuti: Toonse tatulondokede alimwi tulalubizya akucita zyintu zikonzya kutupa kuliyeeya kumpela. Nokuba kuti kaambo aaka nkamasimpe, sena eeci ncecipa kuti bantu kabacita zyintu zibi nzyotulibonena naa nzyotwaambilwa buya muli sikapepele?

Nokuba kuti bantu tabalondokede, balizyi kuti kuli mpobeelede kusika mumakani aakulilemeka akuti bantu balakonzya kweeleba kucita zyintu zibi. Alimwi bantu banji balakonzya kuzumina kuti kuli kwiindana akati kakubeja akumwaamba zyintu zibi muntu, akati kakumucisa muntu kotazyi akumujaya muntu ngookanzide. Bunji bwaziindi zyintu zibi zilacitwa abantu mbotutayeeyeli kuti balakonzya kuzicita. Ino nkaambo nzi bantu ncobacitila zyintu zibi?

 Ibbaibbele lilaamba cipa kuti bantu kabacita zyintu nzyobazyi kuti nzibi. Amubone ncolyaamba.

▪ “Kunyanzya kulasondosya musongo.”—MUKAMBAUSI 7:7.

Ibbaibbele lilaamba kuti zimwi ziindi bantu balasungilizyigwa kucita zyintu zimwi akaambo kabukkale. Bamwi balacita zyintu nzyobayeeyela kuti zilakonzya kupa kuti mapenzi aabo amane. Bbuku lyakuti Urban Terrorism lyakaamba kuti, “bunji bwaziindi bantu babukila mfwulumende akaambo kakuti balicimidwe atwaambo twacisi amakani aamali.”

▪ “Kuyandisya lubono ngomuyanda wabubi boonse.”—1 TIMOTEO 6:10.

Kaambyo kamwi kaamba kuti, nobaba bantu bali kabotu balakonzya kwiityola milawo ikuti baulwa makulo. Bantu bamwi ibalibonya kuti bali kabotu, balakonzya kucinca akuba bakali kuti kakuli makani aajatikizya mali. Amuyeeye buyo milandu minji iicitwa akaambo kabulyatu—kuuninwa, bumpelenge, kubba bantu nokuba kujaya.

▪ “Milimo mibi tiifwambaani kubetekwa, aboobo myoyo yabantu ilakakatila kucita zibi.”—MUKAMBAUSI 8:11.

Lugwalo oolu lutondezya kuti bantu bajisi cilengwa cakucita kufwumbwa ncobayanda kuti babeendelezya kabatako. Oobu mbobacita bantu babalisya mootokala cakwiindilizya, babeja nobasunkwa, babba mali aamfwulumende abacita zyintu zibi ziinda waawa. Ikuti bantu batatobeli milawo kabatapegwi cisubulo naa kuti bantu kabatayoowi kujatwa, bantu batobela milawo balakonzya kucita zyintu nzyobatayeeyelwi kucita. Magazini yakuti Arguments and Facts yakaamba kuti, “babbi ibabba kakunyina kusubulwa, mbebapa kuti bantu buyo batalike kucita zyintu zibi kapati.”

▪ “Muntu ulatepaulwa na alengawidwa akoongwa kuzisusi zyakwe mwini. Eno zisusi zyamita buyo, zilazyala zibi, azyalo zibi zyakomena zilatumbuka lufu.”—JAKOBO 1:14, 15.

Bantu boonse balakonzya kuba amizeezo mibi. Abuzuba tulasunkwa azyintu zinji nzyotumvwa anzyotubona zikonzya kutupa kucita zibi. Ciindi Bbaibbele nolyakali kulembwa, Banakristo bakaambilwa kuti: “Taakwe lutepauzyo lumusikila cita mbuli matepauzyo ngibajana bantu lyoonse.” (1 Ba-Korinto 10:13) Nokuba boobo, ciya buyo kucintu ncotwasala kucita, kuzumanana kuciyeeya cibi naa kufwambaana kucileka kuciyeeya cintu eeco. Lugwalo lwa Jakobo lwaambwa atala lutucenjezya kuti, ikuti muntu walekela zisusi zibi ‘kumita,’ nkokuti citobela nkucita zyintu zibi.

 ▪ “Uuenda abasongo ulasongwaala, Pele muzwalani wabafubafuba ulabisizigwa.”—TUSIMPI 13:20.

Bantu mbotuyanzana limwi balakonzya kutupa kuti katucita zyintu zibotu naa zibi. Bunji bwaziindi bantu balacita zyintu nzyobatakali kuyeeyela kucita akaambo kabalongwe batali kabotu ibabapa kucita zyintu zibi. Mumwaambo wamu Bbaibbele, mabala aakuti “muzwalani wabafubafuba” aamba baabo batatobeli lulayo luli Mujwi lya Leza. Kufwumbwa naa tuli bapati naa bana, kuti bantu mbotuyanzana limwi kabatali kabotu, nkokuti batatobeli njiisyo zyamu Bbaibbele, tulalangilwa ‘kubisizyigwa.’

Ootu tupango twamu Bbaibbele alimwi atumbi tulapandulula cipa kuti bantu mbotutayeeyeli kabacita zyintu zibi alimwi zigambya. Nokuba kuti cilagwasya kuzyiba cipa kuti bantu kabacita zyintu zibi, mubuzyo ngwakuti: Sena zyintu zilakonzya kucinca kuba kabotu? Inzya ziyoocinca, akaambo kakuti Bbaibbele talipandululi buyo cipa kuti bantu kabacita zyintu zibi, pele lilasyomezya kuti micito ili boobu iyoomana. Ino lisyomezya nzi? Sena zyintu zibi zicitika munyika ziyoomana ncobeni? Cibalo citobela cilapa bwiinguzi.