Nzila Zikonzya Kupa Mukwasyi Kukkomana

Amubayiisye Kulilemeka Bana Banu

Loida, *muzyali mukaintu uukkala ku Mexico, wakati: “Bana bacikolo balapegwa makkondomu kucikolo kutegwa babone mbuli kuti bakubusi balakonzya koonana—kufwumbwa kuti kabakwabilidwe.”

Nobuko, muzyali mukaintu uukkala ku Japan, wakati: “Ndakabuzya mwanaangu musankwa kuti, ino inga wacita buti kuti yebo amusimbi wako mwajanika muli nyolikke? Wakaingula kuti tandizyi.”

ICIINDI mwanaanu musankwa naa musimbi naakacili musyoonto, sena mwakali kubona kuti muŋanda yanu kwakanyina zyakali kukonzya kuleta ntenda? Ndiza mwakali kuzivwumba ntambo zyamagesi, kusisa zibelesyo zibosya mbuli mbeli, cipeni alimwi akumukwabilila—zyoonse eezyi mwakalikuzicita kutegwa mwanaanu atalicisi.

Kukomezya mukubusi tacili cintu cuuba-uba pe. Aciindi eeci mulakonzya kamulibilika kuti, ndiza mwanaangu musankwa uleebelela zifwanikiso zibusya muzeezo wakoonana. Ndiza mwanaangu musimbi ulatuma zifwanikiso zyakwe zibusya muzeezo wakoonana muluwaile lwamumaanza. Alimwi mubuzyo umwi uukatazya kapati ngwakuti, ‘Sena mwanaangu mukubusi wakatalika kale micito yakoonana?’

Kubililizya Mbokutagwasyi

Bamwi bazyali bayanda kuti kababagatela bana babo bakubusi ciindi coonse akubona nzyobacita. Kwainda ciindi bunji bwabo inga bazyiba kuti kugatela bana munzila iili boobu cipa kuti bana babo batalike kusisa nzyobacita. Bana babo basankwa naa basimbi inga bacizyiba kusisa micito njoona bazyali njobatayandi bana babo kuti kabataciti.

Mubwini, kubililizya takugwasyi. Jehova Leza kwiina nabelesya nzila eeyi kuzilenge zyakwe kutegwa kazyimumvwida, andinywe nobazyali tamweelede kucita oobo. (Deuteronomo 30:19) Ino bana banu bakubusi inga mwabagwasya buti mumakani akulilemeka?—Tusimpi 27:11.

Nzila nguuba-uba nkuba amibandi iizumanana abana banu alimwi mweelede kutalika nobacili baniini. * (Tusimpi 22:6) Mpoonya mbobayaabukomena, amuzumanane kubandika abalo. Mbomuli bazyali, mwanaanu mukubusi weelede kuti kaajana kulindinywe makani aagwasya. Alicia musimbi uukkala ku Britain, wakaamba kuti: “Bunji bwabantu bayeeya kuti inga tuyanda buyo kubandika kubeenzuma  makani ajatikizya koonana,” pele aaya taali masimpe pe. Tulaakkomanina makani aaya kuti naa azwa kubazyali besu. Tulazisyoma nzyobaamba.

Ncociyandika kuba abukkale bubotu

Bana mbobayaabukomena, bayandika kubaambila makani akoonana kuleka kubasisa. Beelede kuba “amaano aayiisyidwe kwaandaanya ciluzi acitaluzi.” (Bahebulayo 5:14) Mubufwaafwi, beelede kuba abukkale bubotu—kulilemeka kweelana anzyobasyoma kujatikizya makani akoonana—akupona kweelana anzyobasyoma. Mbuti mbomukonzya kumuyiisya bukkale bubotu mwanaanu mukubusi?

Cakusaanguna, amulange-lange bukkale bwanu nobeni. Mucikozyanyo, mulakonzya kusyoma kuti bwaamu—koonana kwabantu batakwetene—ncibi. (1 Batesalonika 4:3) Kweelede kuti bana banu balizyi mbomwaabona makani aaya; alimwi balakonzya kuzubulula cibalo camu Bbaibbele caamba nzyomusyoma. Ikuti babuzyigwa, balakonzya kwaamba kuti koonana kwabantu batakwetene ncibi.

Pele zinji ziyandika kucita. Bbuku lyakuti Sex Smart lyaamba kuti bakubusi bamwi balakonzya kuzuminizya caatala-tala bazyali baabo nobabaambila makani akoonana. Alimwi lyakaamba kuti: ‘Bakubusi tabalimvwi kwaanguluka kutegwa baambe mbobayeeya. Ciindi nobalijana mubukkale mbobatayeeyeli inga balapenga mumizeezo akaambo kakuti tabazyi micito iili kabotu amicito mibyaabi, balanyongana mumizeezo nkaambo tabazyi mbobakonzya kucita.’ Aaka kaambo kalapandulula kabotu mbokuyandika kuba abukkale bubotu. Mbuti mbomukonzya kubagwasya bana banu bakubusi kuba abukkale bubotu?

Amubapandulwide makani abukkale bwanu bubotu. Sena mulasyoma kuti koonana nkwabantu buyo bakwetene? Kuti mbomusyoma oobo, amubapandulwide bana banu bakubusi cakwiinduluka-induluka. Kweelana ambolyaamba bbuku lyakuti Beyond the Big Talk, kuvwuntauzya kwakatondezya kuti “mumikwasyi bazyali mobabaambilila limwi bana babo bakubusi kuti tabayandi bakubusi kucita micito yakoonana, aaba bakubusi tabalangilwi kufwaambana kutalika micito yakoonana.”

Mbuli mbokwaambwa kale, kwiide kubaambila zyabukkale bubotu tacaambi kuti bana banu bayoobutobela bukkale bwanu bubotu. Nokuba boobo, kubaambila nzyomuyanda kuyoobagwasya bana kuzumanana kusala kabotu mumakani abukkale bwabo. Bahaazibwene bamwi bakaamba kuti, mukuya kwaciindi bakubusi nobayaabukomena inga balatalika kubwiiya bukkale bwabazyali babo, nokuba kuti ciindi nobakali kukubuka kunyina nobakazibelesya nzyomwakali kubambila.

AMUSOLE NZILA EEYI: Amwaambe makani akacitika ino-ino kutalisya mubandi kutegwa mwaambe bubotu bwakulilemeka. Mucikozyanyo, kuti naa kuli makani aakaambwa ajatikizya koonana, mulakonzya kwaamba kuti: “Ndiligambidwe kapati bamwi bamaalumi mbobatundulula bamakaintu mumakani aakoonana. Ino uyeeya kuti baijana kuli mizeezo iili boobu?”

Amubaambile masimpe kujatikizya makani aakoonana. Kubacenjezya kulayandika kapati. (1 Bakolinto 6:18; Jakobo 1:14, 15) Nokuba boobo, Bbaibbele lyaamba kuti koonana ncipego kuzwa kuli Leza, takali kakole kuzwa kuli Saatani. (Tusimpi 5:18, 19; Lwiimbo lwa Solomoni 1:2) Kubaambila buyo kuti koonana ncibi, kuyoopa kuti batazyibi masimpe aajanika mu Bbaibbele. Umwi musimbi waku France ulaazina lyakuti Corrina wakaamba kuti: “Bazyali bangu balakankaizya kapati caboola kumakani akoonana, eeci cakapa kuti nditalike kubona kuti koonana ncibi.”

Amubone kuti bana banu mwabaambila masimpe kujatikizya makani akoonana. Muzyali umwi waku Mexico ulaazina lya Nadia wakaamba kuti: “Ncondibaambila lyoonse bana bangu ncakuti koonana nkubotu, tacilubide pe, alimwi Jehova Leza wakapa bantu cipego eeci kutegwa kabalikkomanisya. Pele eeci ceelede kucitwa buyo mucikwati. Cipego eeci cilakonzya kutupa kukkomana naa kutuletela mapenzi kweelana ambotucibelesya.”

AMUSOLE NZILA EEYI: Ciindi ciboola mwaakubandika amwanaanu mukubusi kujatikizya makani aakoonana, amumanizye mubandi kwiinda mukumukulwaizya. Mutayoowi pe kumwaambila kuti koonana ncipego citaliboteli kuzwa kuli Leza ncakonzya kuyookkomanina kumbele aakukwata naa kukwatwa. Amutondezye kuti mulamusyoma mwanaanu mukubusi kuti ulakonzya kuzitobela zyeelelo zya Leza.

 Amumugwasye mwanaanu kubona mapenzi. Kutegwa basale kabotu mubuumi bwabo, bakubusi beelede kuzyiba nzyobakonzya kusala, mpoonya akubona bubotu abubi bwanzizyo. Mutayeeyi kuti kuzyiba buyo cibotu acibi kulizulide. Mukaintu Munakristo ukkala ku Australia ulaazina lyakuti Emma, wakaamba kuti: “Kulanga mbondakalubizya nondakali mukubusi, inga ndaamba kuti kuzyiba zyeelelo zya Leza tacaambi kuti ulazizumina. Kuzyiba bubotu bwa zyeelelo eezyo azikonzya kucitika kuti naa tiitwazitobela—ncociyandika kapati.”

Bbaibbele lilakonzya kutugwasya nkaambo bunji bwa milawo iili mumo ilakankaizyigwa kwiinda mukwaamba mapenzi aajanika akaambo kakucita cibi. Mucikozyanyo, lugwalo lwa Tusimpi 5:8, 9 lukulwaizya bakubusi kutija bwaamu “Kuti utapi bambi bulemu bwako.” Mbuli mbokutondezyedwe mutupango ootu, aabo batalika koonana kabatana kwata naa kukwatwa inga tabacilemekwi, tabacimubelekeli Jehova cakumaninina alimwi balalisampula. Alimwi eeci cibapa kuti batajani ngobakonzya kukwatana limwi uulaa bukkale bubotu. Kuzyiba ntenda zikonzya kucitika kumubili, mumizeezo alimwi akumuuya akaambo kakutatobela milawo ya Leza kulakonzya kumugwasya mukubusi kuti azumanane kwiitobela. *

AMUSOLE NZILA EEYI: Amubelesye zikozyanyo kumugwasya mwanaanu mukubusi kubona bubotu bwa zyeelelo zya Leza. Mucikozyanyo, mulakonzya kubuzya kuti: “Mulilo wakujisya mubotu kwiinda uumpa syokwe. Ino nkwiindana nzi kuliko amililo eeyi yobilo, alimwi mbuti mbomukonzya kweezyanisya bwiinguzi bwanu azyeelelo nzyatupa Leza kujatikizya makani akoonana?” Amubelesye lugwalo lwa Tusimpi 5:3-14 kutegwa mugwasye mwanaanu mukubusi kubona ntenda zijanika mukucita bwaamu.

Takao uukkala ku Japan uujisi myaka iili 18, wakaamba kuti, “Ndilizyi kuti ndeelede kucita cintu ciluzi, pele lyoonse nkulwana azisusi zyanyama.” Bakubusi balimvwa boobu balakonzya kuumbulizyigwa nkaambo tabali balikke pe. Awalo mwaapostolo Paulo —Munakristo wakali kusyomeka—wakaamba kuti: “Ndayanda kucita cibotu, icibi cili andime.”—Baloma 7:21.

Bakubusi beelede kuzyiba kuti kulwana azisusi zyanyama takuli kulubizya. Eeci inga cabagwasya kubona bukkale mbobayanda kuba ambubo. Cilakonzya kubagwasya kulibuzya mubuzyo wakuti, ‘Sena ndiyandika kucinca bukkale bwangu alimwi akuba muntu uusyomeka, wabulemu, naa sena ndiyanda kuba muntu uucita kufumbwa zyintu zicita bantu—muntu uuyandisya kucita nzyalombozya?’ Kuba abukkale bubotu kuyoomugwasya mwanaanu mukubusi kuwiingula kabotu mubuzyo ooyu.

[Bupanduluzi buyungizidwe]

AMULIBUZYE KUTI . . .

▪ Ino ncinzi citondezya kuti mwanaangu mukubusi ulijisi bukkale bubotu?

▪ Ciindi nondibandika a mwanaangu mukubusi kujatikizya makani aakoonana, sena ndimwaambila kuti koonana ncipego kuzwa kuli Leza naa nkakole kazwa kuli Saatani?

[Kabbokesi kali apeeji 20]

Bbaibbele Lyasyomeka Kwamyaka Minji

Bbuku lyakuti Parenting Teens With Love and Logic lyaakaamba kuti: “Malailile aali mu Bbaibbele kujatikizya makani akoonana acigwasya amazubaano. Mazubaano, bunji bwa bakubusi basulaika malailile aaya bajana mapenzi aindene-indene mbuli kumita kabatana kwatwa, bulwazi bwasikalileke amalwazi amwi aaboola akaambo kakoonana. Malailile aali mu Magwalo aamba kuti koonana nkwabanabukwetene buyo, . . . alagwasya kapati akaambo kakuti mbabazumizyidwe balikke.”