Sena Inga Mwamusyoma Leza?

AMWEEZEEZYE kuti mujisi mweenzinyoko ngomuyanda kapati, pele wacita cintu cimwi ncomutakonzyi kumvwisya. Bamwi batongooka akaambo kamicito yakwe alimwi akudooneka makanze aakwe kwiinda mukwaamba kuti mweenzinyoko ngusilunya. Sena inga mwafwambaana kuzumina ncobaamba bantu, naa inga mwalindila kuti mumvwe ncakonzya kwaamba mweenzinyoko? Ikuti katawo kutegwa apandulule mwini cakacitika, sena inga mwamulindila cakukkazyika moyo alimwi akumubona munzila iiluzi?

Kamutanaingula, inga mwayanda kuzyiba zinji. Mulakonzya kulibuzya kuti, ‘Ino ndimuzyi buti mweenzuma ooyu, alimwi ncinzi cipa kuti kandimuyanda?’ Oobo mboceelede kuba. Pele amuciyeeyele buyo: Sena inga tiitwabelesya nzila njiyonya eeyi kwiingula mubuzyo wakuti sena Leza ngusilunya?

Ambweni inga camukatazya kumvwisya zyintu zimwi Leza nzyaacita, naa mulakonzya kugambwa akaambo kazyintu nzyaazumizya kuti zicitike. Kuli bantu banji bakonzya kumwaambila kuti Leza ngusilunya alimwi akumukulwaizya kubona makanze aakwe kuti taali kabotu mbubwenya mbuli mbobabona balo. Sena munoomubona munzila yeelede kusikila ciindi nomuyoozyiba twaambo tumwi tujatikizyidwe? Bwiinguzi buyeeme atwaambo ntomuzyi kujatikizya Leza. Amulibuzye kuti, ‘Ino zyintu nzi zibotu nzyaandicitila Leza?’

Ikuti naa mujisi mapenzi mubuumi, mulakonzya kwaamba kuti Leza tali mulongwe mubotu. Pele amukkale ansi akuyeeya. Sena Leza nguumuletela mapenzi ngomujisi naa nguumucitila zyintu zibotu? Mbuli mbotwabona kale, Saatani ‘ngomweendelezi wanyika eeyi,’ kutali Jehova pe. (Johane 12:31) Aboobo, Saatani nguuleta mapenzi alimwi akutalulama kuli munyika iino. Alimwi sena inga tiimwazumina kuti kutalondoka kwesu alimwi azyintu zicitika nzyotutayeeyeli zipa kuti katupenga?

Kulubazu lumwi, ino zyintu nzi Leza nzyaacita? Ibbaibbele lyaamba kuti, Leza “nguwakalenga ijulu anyika”; milimo yakwe ilabikkilizya amibili yesu yalo ‘yakalengwa munzila iigambya’; alimwi akuti Jehova ngu “Leza uujisi buumi bwako mumaanza aakwe.” (Intembauzyo 124:8; 139:14; Daniele 5:23) Ino twaambo ootu toonse twaamba nzi?

Twaambo ootu twaamba kuti Mulengi wesu nguutupa buumi alimwi nguupa kuti katupona. (Milimo 17:28) Alimwi twaamba kuti cipego cabuumi, kubota kwazyintu zili munyika, bubotu bwaluyando alimwi azilongwe, bubotu bwakulya zilyo, kujatana mumaanza abayandwa besu, kuswiilila nyimbo, alimwi abubotu bwakununkizya maluba-luba—zyoonse eezyi nzipego kuzwa kuli Leza. (Jakobo 1:17) Sena inga tiimwazumina kuti zyoonse zilongezyo eezyi zipa kuti Leza abe mweenzuma ngotweelede kulemeka alimwi akusyoma?

Nokuba boobo, inga camuyumina kumusyoma Leza. Ambweni mulimvwa kuti tamuna kumuzyiba kabotu cakuti inga mwamusyoma. Eeco cilamvwika. Muzibalo eezyi zifwaafwi, inga tiitwaamba twaambo toonse tupa kuti bantu kabaamba kuti Leza ngusilunya. Pele sena inga tiicagwasya kusolekesya kumuzyiba kabotu Leza? * Tuli masimpe kuti, mukusolekesya kwanu muyoozyiba kasimpe kujatikizya Leza. Sena ngusilunya? Peepe: “Leza nduyando.”—1 Johane 4:8.

[Bupanduluzi buyungizidwe]

[Cifwanikiso icili apeeji 7]

Sena Leza nguumuletela mapenzi ngomujisi naa nguumucitila zyintu zibotu?