IBBAIBBELE LILAKONZYA KUBACINCA BANTU

“Ndakali kuyanda kuba mupaizi”

Akaluulwa aba Roberto Pacheco

MWAKA WAKUZYALWA: 1957

KUCISI NKWAZWA: MEXICO

MBWAAKABEDE KAINDI: NDAKALI KUCIKOLO CAKWIIYA BUPAIZI; SINKONDO

MBONDAKABEDE KAINDI: Ndakazyalilwa mukadolopo kasyoonto kaitwa kuti Texcoco. Aciindi eeco, migwagwa minji tiiyakali kabotu alimwi yakanyina taala. Tiicakali kugambya kubona bantu bazwa muminzi iilaafwaafwi kababoola ambongolo zyabo mudolopo kazinyamwide zyintu zyakusambala. Mukwasyi wesu wakali mucete kapati alimwi toonse antoomwe tobana twakali 9, mpoonya mebo ndakali wanamba 7. Kutegwa bajane mali aakugwasya mukwasyi, bataata bakali basikusuma mabbusu (guaraches). Pele bakafwa nindakajisi myaka iili 7 yakuzyalwa. Kuzwa ciindi eeco, baama cakali kubakatazya kujana zyakulya zyamukwasyi.

Basyaanene bakali kulizya violin (kaimbyo kali mbuli gita) alimwi mbabakali kweendelezya baimbi ibakali kwiimba nyimbo zyabukombi. Bunji bwabanamukwasyi wangu bakalicizyi kulizya ziimbyo. Baama bakali baimbi bamukkwaya yakucikombelo cesu, mpoonya baaisya bakali baimbi ba opera alimwi bakalicibwene mukulizya piyano. Twakali basungu muzyintu zyabukombi—ndakali kubeleka kandili mugwasilizyi wakucipaililo camulalilo, alimwi ndakali kuyanda kuba misyinali wamucikombelo ca Katolika. Aciindi nciconya, ndakali kuyandisya kweebelela mavidiyo aa karate. Akaambo kakuti ndakali kwaaebelela kapati mavidiyo aaya, cakapa kuti ndibe muntu uuyandisya kulwana.

Kudolopo lya Puebla, ndakatalika kwiiya zyabukombi kucikolo cakali mbuli cikolo cakwiiya bupaizi. Makanze aangu akali aakuti ndikabe mupaizi waba Katolika. Pele mumwaka wamamanino walwiiyo lwangu, cikombelo caba Katolika cakandityompya. Siite umwi wakacili mwana-mwana wakatalika kuyanda koonana andime. Ndakalizunda sunko eeli, pele eeci icakacitika cakapa kuti ndibe  aamuzeezo wakuyanda kukwata. Kuyungizya waawo, ndakabona kuti bapaizi banji bakali kupona buumi bwakuupaupa ameso. Mukuya kwaciindi, ndakaaleka makanze aangu aakuba mupaizi.

Ndakatalika kwiiya nyimbo ku National Conservatory of Music mudolopo lya Mexico City. Nindakamana cikolo, ndakakwata, alimwi twakaba abana bone. Ndakali kujana mali aakulanganya mukwasyi wangu kwiinda mukwiimba ciindi ca Misa ku Cikombelo ca Katolika.

Kuzwa buyo kumatalikilo, cikwati cesu cakali amapenzi. Mebo amukaintu wangu twakali kulwana, ikapati akaambo kabuzuba. Kusaanguna, twakali kunyemezyanya buyo, mpoonya twakatalika kulwana. Nikwakainda myaka iili 13, twakaandaana mpoonya nikwakainda ciindi twakalekana.

BBAIBBELE MBOLYAKANDICINCA: Bakamboni ba Jehova ndakabazyiba katutanaandaana amukaintu wangu. Bakamboni bobilo bakatuswaya akutulomba kuti tubandike Bbaibbele ambabo. Ndakali kuyeeya kuti ndakazyi zinji kujatikizya bukombi, aboobo ndakali kuyanda kubatondezya kuti kunyina ncobazyi. Ndakali kubabuzya mibuzyo iikatazya njindakali kuyeeya kuti inyina bwiinguzi. Pele cakandigambya ncakuti lyoonse bakali kundiingula kuzwa mu Bbaibbele. Ndakabona kuti anu kunyina ncondakazyi. Nokuba boobo, mukaintu wangu tanaakali kubayanda Bakamboni, alimwi mebo tiindakali kujana ciindi, aboobo bakacileka kutuswaya.

Nikwakainda myaka yosanwe, ndakatalika kukkala amukaintu uumbi, Elvira, ngotwatakakwetene mumulawo, mpoonya ndakaswaigwa a Bakamboni ba Jehova alimwi. Elvira tanaakali kubakazya Bakamboni, aboobo cakanduubila kwiiya Bbaibbele cakusitikila. Nokuba boobo, cakatola myaka minji kuti ndicince buumi bwangu.

Ndakabona kuti naa ndiyanda kukomba Jehova camoyo woonse, ndakeelede kucinca buumi bwangu. Cakusaanguna, ndakeelede kuleka mulimo wangu wakwiimba ciindi ca Misa ku Cikombelo ca Katolika, aboobo ndakeelede kuyandaula mulimo uumbi. (Ciyubunuzyo 18:4) Alimwi ndakeelede kulembya cikwati cesu a Elvira.

Cintu cakandikatazya kapati, nkwiiya kulijata aakunyema. Magwalo obilo aamu Bbaibbele akandigwasya kapati: Lugwalo lwa Intembauzyo 11:5, lutondezya kuti Jehova ulabasulaika bantu bayanda nkondo, alimwi alugwalo lwa 1 Petulo 3:7, lwakandiyiisya kuti, ikuti kandiyanda kuti Jehova kaswiilila mipailo yangu, ndeelede kunoomulemeka mukaintu wangu. Nindakazinzibala kuyeeya tupango ootu akupailila lugwasyo lwa Jehova, ndakatalika kucikonzya kulijata kunyema.

MBONDAGWASYIGWA: Lino ndilikkomene amukwasyi wangu. Ndilasola kubambulula cilongwe abana bangu mbondakazyala kumukaintu wakusaanguna alimwi akugwasya mukwasyi wangu kuzumanana kuyuma mulusyomo.

Nindakacili mwana, ndakali kuyanda kuyooba mupaizi alimwi akugwasya bantu. Lino ndilimvwa kuti buumi bwangu bulaampindu. Ndilajana mali aakulanganya mukwasyi wangu kwiinda mukuyiisya nyimbo. Ndilikkomene kuti Jehova wakandikkazyikila moyo, wakandipa coolwe cakucinca alimwi akuba muntu uuli kabotu!

[Cifwanikiso icili apeeji 8]

[Cifwanikiso icili apeeji 8]

[Majwi aakwelelezya sikubala aali apeeji 8]

Nindakali mugwasilizyi wakucipaililo camulalilo, ndakali kuyanda kuba misyinali wamucikombelo ca Katolika, pele ndakali kuyandisya kweebelela mavidiyo aa karate calo cakapa kuti ndibe muntu uuyandisya kulwana

[Majwi aakwelelezya sikubala aali apeeji 9]

Ibbaibbele lyakandiyiisya kuti, ikuti kandiyanda kuti Jehova kaswiilila mipailo yangu, ndeelede kunoomulemeka mukaintu wangu

[Cifwanikiso icili apeeji 9]