Ba Smita, * bakajisi myaka yakuzyalwa iili 35 ibakali kukkala ku Dhaka, Bangladesh, bakajisi mpuwo yakuti mbaasiluyando alimwi uubikkila maano bantu. Bakazyibidwe kuti mbankutwe kumilimo alimwi akuti mbakaintu bakwetwe bacili bana-bana bakkomene bakali kuyandisya kugwasya bamwi kuzyiba zintu nzyobakaiya kujatikizya Leza. Pele icakabagambya kapati banamukwasyi alimwi abalongwe babo ncakuti ba Smita bakaciswa bulwazi bwakabajaya mumazuba buyo masyoonto!

Ba James abakaintu babo, banabukwetene bacili bana-bana bajisi myaka yakuzyalwa yakuma 30, abalo bakajisi mpuwo mbuli yaba Smita. Ciindi cimwi bakaunka mukuswaya balongwe babo ku West Coast yaku United States. Kunyina nobakajokela kwabo ku New York. Kabacili kooko, bakafwa muntenda yamumugwagwa, calo cakabapa kuusa bayandwa babo alimwi ababelesinyina.

Cilasalala kuti bubi akupenga zyavwula kapati mazuba aano. Inkondo ilajaya bantu buyo alimwi abasikalumamba. Bugwebenga alimwi akulwana kwabapenzya bantu banyina mulandu. Ntenda zijaya alimwi amalwazi alabasikila bantu boonse, kunyina makani aciimo camuntu naa buumi mbwapona. Ntenda zilicitikila zilajaya bantu banji cakutasalulula. Kusalulula alimwi akutalulama kulidumide kapati. Ambweni andinywe mwakajatikizyigwa kale amapenzi aaya.

Aboobo cileelela kubuzya mibuzyo mbuli yeeyi:

• Nkaambo nzi zintu zibyaabi ncozibacitikila bantu bali kabotu?

• Sena Leza nguweelede kupegwa mulandu akaambo kazintu eezyi?

• Sena zintu zibyaabi zilicitikila buyo naa mbantu bapa kuti kazicitika?

• Sena inga yaba Karma, nkokuti kupenga akaambo kazintu muntu nzyaakacita kaindi?

• Ikuti kakuli Leza Singuzuzyoonse, nkaambo nzi ncatabakwabilili bantu bali kabotu kunteda?

• Sena kuli nokuyooba buumi bunyina bubi akupenga?

Kutegwa twiingule mibuzyo eeyi, tuyandika kuzyiba bwiinguzi bwamibuzyo eeyi yobilo iiyandika kapati: Nkaambo nzi zintu zibyaabi ncozicitikila, alimwi ncinzi Leza ncayoocita?