Makulo aamumfwulumende aambwa kuti, nkutazibelesya bweelede nguzu zyakweendelezya kutegwa muntu alijanine mpindu. Cilengwa eeci cakatalika kaindi loko. Mucikozyanyo, Bbaibbele lilijisi mulawo uukasya cisinkamulomo mumakani aalubeta, eeci citondezya kuti mucito ooyu wakalizyibidwe kale myaka iinda ku 3,500 yainda. (Kulonga 23:8) Nokuba boobo, makulo tacaambi buyo kutambula cisinkamulomo pe. Babelesi babuleya zimwi ziindi balabba zintu, balijanina mpindu kumilimo njobatapedwe, nokuba kubba mali kakunyina kusisikizya. Akaambo kazyuuno nzyobajisi, balakonzya kubelesya nguzu nzyobapedwe kukkomanisya balongwe babo alimwi abacibbululu munzila iiteelede.

Nokuba kuti makulo alakonzya kujanika mumbunga iili yoonse yabantu, kuboneka kuti makulo aamumfwulumende aliindide. Kweelana alipooti yamu 2013 ya Global Corruption Barometer iyakamwaigwa ambunga yaba Transparency International, yakaamba kuti bantu munyika yoonse baamba kuti imbunga zyosanwe ziindide kucita makulo nimbunga zyamapolitikisi, bamapulisa, babelesi babuleya, basikupanga milawo alimwi abasinkuta. Atulange-lange malipooti aamwi aatondezya kuti penzi eeli nkolili ncobeni.

• AFRICA: Mu 2013 ku South Africa, babelesi babuleya batandila ku 22,000 bakapegwa mulandu akaambo kakucita makulo.

• SOUTH AMERICA: Mu 2012, kucisi ca Brazil, bantu bali 25 bakapegwa mulandu akaambo kakubelesya mali aabuleya kutegwa balijanine mpuwo mutwaambo twacisi. Akati kabaabo bakapegwa mulandu, kwakali amuntu iwakali kulemekwa kapati ooyo iwakali kutobela mweendelezi wacisi eeco.

• ASIA: Mu 1995 mu Seoul, ku South Korea, bantu bali 502 bakafwa ciindi cintoolo cipati nocakakolomoka. Basikuvwuntauzya bakajana kuti balupati-pati badolopo eelyo bakaulwa makulo kutegwa bazumizye basikuyaka kubelesya samende uutali kabotu alimwi akutatobela milawo yabukwabilizi.

• EUROPE: Kweelana aba Cecilia Malmström bamukabunga ka European Commission Home Affairs Commissioner, bakaamba kuti: “[Makulo aacitika mu Europe] alagambya kapati, nkaambo kuboneka kuti basitwaambo twacisi tabalibambilide kulimana penzi eeli.”

Nciyumu kubantu kwaagusya makulo aacitika mumfwulumende. Basyaazibwene mumakani aakulwana makulo, ba Susan Rose-Ackerman bakalemba kuti, kutegwa kube kucinca kugwasya, “mfwulumende yeelede kucinca mboicita zintu.” Nokuba kuti penzi eeli liboneka kuti talikonzyi kumana, Ibbaibbele litondezya kuti kucinca kupati kulakonzyeka alimwi kuyoocitika ncobeni.