Ndakazyalilwa mudolopo lya Székesfehérvár, mucisi ca Hungary, eeli dolopo lilizyibidwe kuba amakani manji aakaindi mumyaka iili 1,000 yainda. Pele cuusisya ncakuti, ndiciyeeyede zintu zyakanyonyooka akaambo kankondo yabili yanyika yoonse iyakacitika ciindi eeco.

Kuzwa kubwana, ndakakomezyegwa abanene alimwi abasyaanene. Ndakali kubayanda kapati—ikwaambisya banene ba Elisabeth. Bakandigwasya kuba alusyomo luyumu muli Leza. Kuzwa ciindi nondakali aamyaka yotatwe, ndakali kupaila abanene mupailo wiitwa kuti Mupailo wa Mwami. Nokuba boobo, ndakatalika kumvwisya ncowaamba mupailo ooyu nondakali amyaka yakuma 20.

Banene abasyaanene mbebakali kundilela kuzwa kubwana nkaambo bazyali bangu bakali kubeleka syikati amasiku, kabajisi makanze aakujana mali aakuula ŋanda mbotu. Nsondo yabili mumwezi uuli woonse mu Mujibelo, banamukwasyi boonse bakali kubungana akulida antoomwe. Eelo kaka ndakali kuzikkomanina ziindi eezi!

Mu 1958, bazyali bangu bakacijana ncobakali kuyanda, nkaambo bakacikonzya kuula ŋanda kutegwa swebo totatwe katukkala mumo. Kumamanino ndakatalika kukkala abazyali bangu—eeci cakandikkomanisya kapati! Nokuba boobo, nokwakainda myezi yotatwe, lukkomano ndondakajisi lwakamana cakutayeeyelwa. Bataata bakafwa abulwazi bwakkansa.

Ndakanyongana kapati. Ndiciyeeyede kandipaila kuti: “Leza ndakalomba kuti ubagwasye bataata. Ndilabayanda. Nkaambo nzi tiiwakaingula mipailo yangu?” Ndakali kuyandisya kuzyiba nkobakabede bataata. Ndakalibuzya kuti: ‘Sena baunka kujulu? Sena bafwida limwi cakuti tabakaponi alimwi?’ Ndakali kubanyomenena bana bamwi ibakajisi bamausyi.

Kwamyaka minji, ndakali kuunka kucuumbwe abuzuba. Ndakali kufwugama acuumbwe cabataata akupaila kuti: “Akaka Leza, ndiyanda kuzyiba nkobabede bataata.” Alimwi ndakali kupailila kuti ndizyibe ncotuponena.

Kandili amyaka iili 13, ndakatalika kwiiya mwaambo waci German. Ndakali kuyeeya kuti mbwaanga mabbuku aaci German manji, kwaabala kwakali kukonzya kundigwasya kujana bwiinguzi  kumibuzyo yangu. Mu 1967, ndakatalika kwiiya mudolopo lya Jena, aciindi eeco idolopo eeli lyakali mucooko ca German nkoili kujwe. Cabusungu ndakali kubala mabbuku aabasyaabusongo bana German, kwaambisya aayo aakali kwaamba bantu ncobaponena. Nokuba kuti ndakajana twaambo tukkomanisya, kunyina nokaba komwe kakandigwasya. Ndakazumanana kupailila bwiinguzi.

Mu 1970, ndakapiluka kucisi ca Hungary ooko nkotwakabonana aba Rose, mukaintu ngondakazookwata. Aciindi eeco cisi ca Hungary cakali mubweendelezi bwaci Kkomyunizimu. Kalitanalampa kuzwa notwakakwatana, mebo aba Rose twakazikuunka ku Austria. Makanze eesu akali aakulonga kuya ku Australia mudolopo lya Sydney, ooko baayisya nkobakali kukkala.

Kakutanainda ciindi cilamfwu, ndakajana mulimo ku Austria. Bumwi buzuba, mubelesima wakandaambila kuti ndilakonzya kubujana bwiinguzi bwamibuzyo yangu yoonse kuzwa mu Bbaibbele. Wakandipa mabbuku aali mbwaabede aakali kwaamba makani aamu Bbaibbele. Ndakaabala mabbuku aayo mukaindi kasyoonto kandijisi luyandisisyo lwakuzyiba zinji. Aboobo ndakabalembela lugwalo Bakamboni ba Jehova basikumwaya mabbuku aayo, kutegwa ndilombe mabbuku aambi.

Notwakali kwiibaluka buzuba bwamucado wesu ciindi cakusaanguna, mebo aba Rose twakaswaigwa a Kamboni uucili mwana-mwana waku Austria. Wakandiletela mabbuku ngondakalombede, kumane wakandilomba kuti katwiiya limwi Bbaibbele, eelyo ndakazumina. Mbwaanga ndakali kuyandisisya kwiiya, twakali kwiiya ziindi zyobilo ansondo—ciiyo cimwi acimwi cakali kutola mawoola aatandila kuli one.

Ndakaakkomanina kapati makani ngobakandiyiisya Bakamboni kuzwa mu Bbaibbele. Ciindi nobakanditondezya zina lya Leza lyakuti Jehova mu Bbaibbele lyangu lyaci Hungarian, ndakagambwa kapati. Nokuba kuti ndakali kuunka kucikombelo kwamyaka iili 27, kunyina buzuba nondakalimvwa zina lya Leza kalyaambwa. Ndakakkomana kujana bwiinguzi busalede bwamu Bbaibbele. Mucikozyanyo, ndakaiya kuti bafwide tabazyi cintu nociba comwe, bali mbuli muntu uuli muŋonzi zinji. (Mukambausi 9:5, 10; Johane 11:11-15) Alimwi ndakaiya cisyomezyo camu Bbaibbele canyika mpya oomo ‘lufwu molutakabi limbi.’ (Ciyubunuzyo 21:3, 4) Ndilangila kuyoobonana abataata alimwi, nkaambo munyika mpya “kuyooba bubuke bwabantu.”—Milimo 24:15.

Bakaintu bangu bakandisangana camoyo woonse kwiiya Bbaibbele. Twakayaambele cakufwambaana cakuti mumyezi buyo yobilo twakalimana kuliiya bbuku. Twakali kujanika kumiswaangano yoonse njobakali kuba anjiyo ba Bakamboni ku Ŋanda ya Bwami. Twakabotelwa kapati akaambo kaluyando, kugwasyanya alimwi alukamantano ndobajisi Bakamboni ba Jehova.—Johane 13:34, 35.

Mu 1976, mebo aba Rose twakapegwa cipepa cituzumizya kuunka ku Australia. Mbotwakasikila buyo ookuya, twakabayandaula Bakamboni ba Jehova akubajana. Mpoonya-mpoonya, Bakamboni bakooko bakatupa kulimvwa kwaanguluka. Mu 1978 twakabbapatizyigwa akuba Bakamboni.

Kumamanino ndakabujana bwiinguzi bwamibuzyo yakali kundikatazya kapati kwaciindi cilamfwu. Kuyungizya waawo, kwiinda mukuba acilongwe a Jehova Leza, ndajana bataata bainda kubota. (Jakobo 4:8) Bulangizi mbondijisi bwakuyoobonana alimwi abataata ibakandizyala munyika mpya, ncintu citaliboteli.—Johane 5:28, 29.

Mu 1989, twakayeeya kupiluka ku Hungary kutegwa tukakambaukile balongwe besu, banamukwasyi alimwi abamwi mbotwakali kuyoobonana limwi kujatikizya nzyotwakaiya. Twaba acoolwe cakubayiisya Bbaibbele bantu banji. Bantu bainda ku 70 kubikkilizya abamaama, batusangana mukukomba Jehova.

Ndakapaila kwamyaka iili 17 kutegwa ndijane bwiinguzi kumibuzyo yangu. Lino kwainda myaka iili 39, nokuba boobo ndicuujisi kupaila—pele lino ncondikonzya kwaamba ncakuti, “Ndakulumba Taata siluyando akaambo kakwiingula mipailo yakubwanike bwangu.”