Kalitanalampa kuzwa ciindi bana Israyeli nobakanjila Munyika Yakasyomezyegwa myaanda yamyaka iili 35 yainda, Leza wakaamba kuti wakali kuyoobakwabilila ‘kumalwazi mabi’ ngobakazyi mu Egepita. (Deuteronomo 7:15) Nzila imwi mbwaakacita oobo nkwiinda mukubapa malailile kujatikizya bulondo akulesya kuti malwazi amwaike. Mucikozyanyo:

•   Milawo njobakali kutobela bana Israyeli yakali kwaamba kuti bakeelede kusamba akuwasya zisani.—Levitiko 15:4-27.

•   Kujatikizya tubi twabantu, Leza wakaambide kuti: “Mweelede kuba abusena kunze aankambi, ooko nkomukonzya kwiinka kuyooligwasya. Mweelede kuba acibelesyo cakusyisya, eelyo mwamana kuligwasya mweelede kuvwikkila tubi ooto.”—Deuteronomo 23:12, 13.

•   Bantu ibakali kuyeeyelwa kuti bajisi bulwazi buyambukila bakali kuzandulwa kuti bakkale balikke. Kutegwa bapiluke kubantu, aabo ibakapona kubulwazi bakeelede kuwasya zisani zyabo alimwi akusamba kutegwa baambwe kuti ‘balasalala.’—Levitiko 14:8, 9.

•   Kufwumbwa muntu iwaguma mutunta wakeelede kuzandulwa.—Levitiko 5:2, 3; Myeelwe 19:16.

 Milawo yabana Israyeli yakali kutondezya mizeezo yabusilisi alimwi abulondo basayaansi njobakali kuyoobelesya kumbele.

 Bunji bwabantu kuciindi cabana Israyeli tiibakalicizyi kubamba bulondo. Mucikozyanyo:

•   Matombe akali kusowelwa mumigwagwa. Maanzi aasofweede, zyakulya, alimwi amatombe aambi buyo zyakali kupa kuti busena busofwaale akupa kuti bantu banji baciswe alimwi abana banji kuti bafwe.

•   Basilisi bakaindi bakanyina luzyibo kujatikizya tuzunda. Bana Egepita bakali kubelesya busilisi bwakuyeeyela buyo mbuli bulowa bwatombela, mankotyo aasifundwe, mbeba ifwide, minsyu alimwi acinkwa civwundide. Tubi twabantu alimwi atwabanyama kanji-kanji bakali kutubelesya mubusilisi bwabo.

•   Tuzunda itwakali kubapa kuciswa bana Egepita bansiku bakali kutujana mumaanzi aasofweede amu Mulonga wa Nile alimwi amumifwolo yakutilaizya. Mbubwenya buyo, bana bavwanda banji mu Egepita bakali kufwa akaambo kakusoomona alimwi amalwazi aaboola akaambo kacakulya cinyongene.

 Kulubazu lumwi, bana Israyeli bakali kugwasyigwa akupona kabotu kwiinda mukutobela zyeelelo zili mu Mulawo wa Leza.