Kweelana a Bbaibbele, Mwami Davida wa Israyeli wakapona mumwaanda wamyaka wa 11 B.C.E. alimwi baluzubo lwakwe bakalela kwamyaka minji. Pele bamwi basikukazya baamba kuti, makani aamba kujatikizya Davida nkaano buyo nkobakazyootalisya bantu mukuya kwaciindi. Sena Mwami Davida wakaliko ncobeni?

 Mu 1993, sikuvwukkula zyakaindi wazina lya Avraham Biran ankamu yakwe bakajana cibeela cabbwe lyaku Tel Dan, Israyeli nkoili kunyika, icakajisi malembe aamba “zyamukwasyi wa Davida.” Malembe akalembwa mumwaambo waci Aramu mumwaanda wamyaka wa 11 B.C.E. Kulibonya kuti cakali cibeela cacibumbwa icakapangidwe abana Aramu, aakalembedwe majwi aakulidunda kujatikizya nkondo nzyobakazunda bana Israyeli.

 Cibalo cimwi mubbuku lyakuti Bible History Daily caamba kuti: “Kwakali basikukazya kujatikizya malembe aamba ‘Zyamukwasyi wa Davida’ . . . Nokuba boobo, bunji bwabasikwiiya zyamu Bbaibbele alimwi abasikuvwukkula zyakaindi tabadooneki kuti cibeela cabbwe lyaku Tel Dan mbumboni bwakuti Mwami Davida iwaambidwe mu Bbaibbele wakaliko ncobeni, cibeela cabbwe eeli cili akati kabumboni busyomwa bwazyakuvwukkula izyaamba makani aamu Bbaibbele aambidwe mu BAR [Biblical Archaeology Review].”