Mwaka amwaka, bakubusi banji ibali mumikwasyi ya Bakamboni ba Jehova balabbapatizyigwa. Sena muyanda kubweza ntaamu eeyi? Ikuti naa mboobo, mweelede kusaanguna kuzyiba ncocaamba kulyaaba alimwi akubbapatizyigwa.

•  Ino lubbapatizyo ninzi?

•  Ino kulyaaba ninzi?

•  Nkaambo nzi kubbapatizyigwa ncokuyandika?

•  Nzyobaamba beenzinyoko

•  Makani aakubeja alimwi aamasimpe

 Lubbapatizyo ilwaambidwe mu Bbaibbele nkubbizyigwa mumeenda cakumaninina, kutali buyo kusansailwa meenda, alimwi kwiiminina cintu cimwi ciyandika kapati.

•   Kubbila mumeenda aciindi cakubbapatizyigwa citondezya buleya kuti tamuciliponeni nobeni.

•   Kuzwa mumeenda citondezya kuti mwatalika kupona buumi bupya bwakucita zintu zimukkomanisya Leza.

 Kwiinda mukubbapatizyigwa, mwaambilizya kubuleya kuti Jehova ngonguwe iweelede kubikka zyeelelo zyaciluzi acitaluzi, alimwi muzyibya buleya cikonke canu cakulisungula ikunoocita ncayanda Leza.

 Ncomweelede kuyeeya: Nkaambo nzi ncomunga mwayanda kutondezya kubuleya kuti munoopona buumi bwakumvwida Jehova? Amubone 1 Johane 4:19 alimwi a Ciyubunuzyo 4:11.

 Kamutanabbapatizyigwa, mweelede kulyaaba kamuli nyolikke kuli Jehova. Mubuti?

 Kwiinda mumupailo, mwaambila Jehova kuti mwasyomezya kumubelekela kukabe kutamani alimwi akuti munoocita ncayanda tacikwe makani acikonzya kucitika, naa ncobakonzya kusala bamwi.

 Kubbapatizyigwa kutondezya buleya kulyaaba nkomwakacita nomwakali nyolikke. Kunze lyaboobo, kwaambila bamwi kuti tamuciliponeni pele lino muzulilwa kuli Jehova.—Matayo 16:24.

 Ncomweelede kuyeeya: Nkaambo nzi buumi ncobubota ciindi nomwalyaaba kuli Jehova? Amubone Isaya 48:17, 18 alimwi a Bahebrayo 11:6.

 Jesu wakaamba kuti basikwiiya bakwe beelede kubbapatizyigwa. (Matayo 28:19, 20) Aboobo, lubbapatizyo luciyandika ku Banakristo mazuba aano. Alimwi buya, Bbaibbele lyaamba kuti lusololela kulufwutuko.—1 Petro 3:21.

 Nokuba boobo, mweelede kubbapatizyigwa akaambo kuti mulamuyanda Jehova akuti mulacibikkila maano cilongwe ncomujisi anguwe. Mweelede kuba amuuya ngwaakajisi sintembauzyo iwakalemba kuti: “Ino inga ndamupilusyila nzi Jehova kububotu boonse mbwaandicitila? . . . Ndilaita zina lya Jehova. Ndilazuzikizya zikonke zyangu kuli Jehova.”—Intembauzyo 116:12-14.

 Ncomweelede kuyeeya: Ino nzintu nzi zibotu nzyaakamucitila Jehova, alimwi inga mwamupilusyila buti nzinzyo? Amubone Deuteronomo 10:12, 13 alimwi a Baroma 12:1.