“Aalemekwe Leza kujulu lyamajulu alimwi anyika akube luumuno kubantu mbakkomanina.”—Luka 2:14, Bbaibbele lya Busanduluzi Bwanyika Mpya.

 “Akube bulemu kuli-Leza kujulu lyamajulu, Aalo ansi akube luumuno kubantu mbakondwa.”—Luka 2:14, The Bible in Tonga Lyamu 1963.

 Majwi aaya akutembaula, akaambwa abangelo aciindi Jesu naakali kuzyalwa, atondezya kuti aabo ibajisi lusyomo muli Jesu balakonzya kukkomaninwa a Leza alimwi akuba aluumuno.

 “Aalemekwe Leza kujulu lyamajulu.” Kwiinda mumajwi aaya, bangelo bakatondezya kuti Leza nguweelede kutambula bulemu boonse. Majwi aaya alimwi atondezya kuti kuzyalwa kwa Jesu alimwi amulimo wakwe anyika zyakali kuyoopa kuti Jehova a Leza alemekwe kapati. Mucikozyanyo, lyoonse Jesu wakali kupa kuti Leza alemekwe kwiinda muzintu nzyakali kuyiisya, mbuli ciindi naakaamba kuti: “Nzyondiyiisya tazili zyangu pe, pele nzizya yooyo wakandituma.” (Johane 7:16-18) Ciindi Jesu naakali kucita maleele, kanji-kanji bantu ibakali kulangilila “bakalemeka Leza.” (Luka 5:18, 24-26; Johane 5:19) Noluba lufwu lwa Jesu lwakapa kuti Leza alemekwe. Lwakajalula nzila yakuti Leza azuzikizye makanze aakwe aakuzuzya nyika abantu balulami alimwi ibayanda luumuno.—Matalikilo1:28.

 “Anyika akube luumuno.” Luumuno oolu talwaambi kuti kunoonyina nkondo. Lubikkilizya luumuno, naa luumuno lwamumizeezo lwalo lukonzyeka buyo kuti muntu kakkomaninwa a Jehova. Aalumbwe Jesu, akaambo kakuti lino bantu balakonzya kuba acilongwe a Leza. (Jakobo 4:8) Alimwi mbwali Mwami wa Bwami Leza, Jesu uyakuleta luumuno lwini-lwini alimwi lutakamani nyika yoonse.—Intembauzyo 37:11; Luka 1:32, 33.

 “Kubantu mbakkomanina.” Mabala aaya aamba bantu Leza mbakkomanina akaambo kalusyomo lwabo lwini-lwini mulinguwe alimwi ayooyo ngwaakatuma, Jesu. Pele taambi kuti Leza unootondezya bubotu bwakwe kubantu boonse, tacikwe makani ambobacita zintu alimwi taambi zintu zibotu nzyobacita bantu. Busanduluzi bumwi bwama Bbaibbele, mbuli lya The Bible in Tonga, Lyamu 1996, yaamba mabala aaya kuti “akati kabaabo bamukondelezya.” Nokuba boobo, malembe aakaindi aa Chigiriki alauzuminizya muzeezo uuli mu Bbaibbele lya Busanduluzi Bwanyika Mpya alimwi abusanduluzi bwama Bbaibbele aaliko lino atondezya kuti luumuno kubantu Leza mbakkomanina.—Amubone “ Luka 2:14 Kuzwa Muma Bbaibbele Aamwi.”

 Luka caandaano 2 citondezya matalikilo aabuumi bwa Jesu anyika. Naakazyalwa, Mungelo wakalibonya kubeembezi balo “ibakali musyokwe kabeembela butanga bwabo masiku.” b (Luka 2:4-8) Mungelo wakaambila beembezi ‘makani mabotu aakali kuyoobakkomanisya,’ aakuti: “Sunu mumunzi wa Davida, mwazyalilwa mufwutuli, nkokuti Kristo Mwami.” (Luka 2:9-11) Beembezi bakaambilwa nkobakali kuyoomujana mwana muvwanda, mpoonya bakalibonena bangelo banji kabatembaula Leza. Nobakasika ku Betelehemu, beembezi bakajana Maria a Josefa kabali antoomwe amuvwanda Jesu. (Luka 2:12-16) Nobakamana kwaamba cakabacitikila, beembezi bakajokela kubutanga bwabo, “kabatembaula akulemeka Leza akaambo kazintu zyoonse nzyobakamvwa akubona.”—Luka 2:17-20.

 Amweebelele kavidiyo aaka mubone mufwaafwi izili mubbuku lya Luka.