Kwakali mwaalumi umwi wakajisi zyuute zicisa kapati kutalikila kumutwe kusikila kumaulu alimwi wakali kuvwula kukkala mubbunta lyamulota. Amweezyeezye buyo kasinteme, kali alikke alimwi katajisi nguzu zyakutanda nzinini azyuute zyakwe. Ulikkede mubbunta lyamulota kutondezya kuusa alimwi ulalikwezya kubelesya lukaye. Wakali muntu uulemekwa kapati, pele lino waba muntu-muntu buyo! Balongwe bakwe, basimukobonyina, abacibbululu boonse bakamutantamuka. Bantu boonse, kubikkilizya abana bakaleka kumulemeka. Aboobo wakatalika kuyeeya kuti Leza wakwe Jehova, awalo waba silunya, pele tanaakaluzi kuyeeya boobo.—Jobu 2:8; 19:18, 22.

Mwaalumi ooyu wakali Jobu. Leza wakaamba boobu kujatikizya nguwe: “Kunyina muntu naba omwe uuli mbuli nguwe munyika.” (Jobu 1:8) Nokwakainda myaka minji, Jehova wakacili kumuyeeya Jobu kuti uli akati kabamaalumi bakaluleme.—Ezekieli 14:14, 20.

Sena andinywe muli mubukkale bukatazya? Kuti naa mboobo, cibalo caamba Jobu cilakonzya kumuyumya-yumya kapati. Alimwi cilakonzya kumugwasya kuzyiba bube mbwayandika mubelesi wa Leza uuli woonse, nkokuti bube bwakusyomeka. Bantu balatondezya kuti balasyomeka kuli Leza ciindi nobazumanana kucita kuyanda kwakwe nomuba mubukkale bukatazya. Amuleke twiiye zinji kuli Jobu.

Kulibonya kuti Jobu kafwide kale, ndendilyo mwaalumi uusyomeka Musa naakalemba makani aamba zyabuumi bwa Jobu. Kasololelwa amuuya, Musa wakalemba kutali buyo zintu zyakamujatikizya Jobu aano anyika pele alimwi azyakali kucitika kujulu.

Kumatalikilo aacibalo, tubala kuti Jobu wakalibukkede alimwi wakalikkomene mubuumi. Wakali kulemekwa munyika yoonse ya Uzi—cisi ca Arabia nkocili kunyika. Wakali kubabikkila maano bapengede alimwi akubakwabilila aabo batakali kukonzya kulikwabilila. Jobu alimwi abakaintu bakwe bakali abana bali kkumi. Kwiinda zyoonse, Jobu wakali kucibikkila maano cilongwe ncaakajisi a Jehova. Wakali kuyandisya kukkomanisya Jehova mbubwenya mbuli mbobakacita bamukowa wakwe ba Abrahamu, Izaka, Jakobo alimwi a Josefa. Mbubwenya mbuli basikale aaba, Jobu wakali mupaizi mumukwasyi wakwe, lyoonse wakali kupa zituuzyo kutuulila bana bakwe.—Jobu 1:1-5; 31:16-22.

Musa naakamana kupandulula mbobwakabede buumi bwa Jobu kumatalikilo, wakatalika kupandulula zyakali kucitika kujulu. Aboobo twiiya zintu nzyaatakazyi Jobu. Bangelo ba Jehova basyomeka bakaliimvwi kumbele lya Leza, mpoonya mungelo uuzangide Saatani wakaboola akubasangana. Jehova wakalizyi kuti Saatani tanaakali kumuyanda Jobu, aboobo wakabandika anguwe kujatikizya kusyomeka kwa Jobu. Cakusinizya Saatani wakati: “Sena Jobu uyoowa Leza kakunyina kaambo? Sena yebo tonoomuyakila lukwakwa lwakumukwabilila ilumuzingulukide walo abamuŋanda yakwe kubikkilizya azintu zyoonse nzyajisi?” Saatani tabayandi bantu basyomeka. Ciindi nobazumanana kusyomeka cakumaninina kuli Jehova Leza balatondezya kuti Saatani tajisi luyando. Aboobo Saatani wakayuminina kwaamba kuti Jobu tanaakali kubelekela Leza akaambo kakuti ulamuyanda. Wakaamba kuti, ikuti Jobu wasweekelwa zintu zyoonse nzyajisi ulakonzya kumutukila Jehova kalangilila!—Jobu 1:6-11.

Jobu tanaakazyi cakali kucitika, pele Jehova wakamupede coolwe cakuti atondezye kuti Saatani mubeji. Saatani wakazumizyigwa kunyanga Jobu zintu zyoonse nzyaakajisi. Mpoonya wakaambilwa kuti atasoli kujata buumi bwakwe. Kuzwa waawo, Saatani wakatondezya mbwaakali mubi moyo. Mubuzuba bomwe, zintu zinji zibyaabi zyakamucitikila Jobu. Wakatambula mulumbe wakuti zivwubwa zyakwe, kutalikila kuŋombe ambongolo, mpoonya mbelele kumane nkamela zyoonse zyakafwa mukaindi kasyoonto buyo. Ciindile kubija, beembezi abalo bakajaigwa. Sikuleta makani umwi wakaamba kuti ‘mulilo wakazwa kuli Leza’ nkokuti lulabo, nguwakajaya nkamu imwi. Jobu kacinyongene azintu zyakali kucitika, nkokuti kufwa kwabantu naa zivwubwa, cintu cibyaabi kwiinda cakacitika. Bana bakwe bali kkumi nobakabungene muŋanda yamupati, kwakaboola guwo lyakabbubbula akunyonyoona ŋanda, abana bakwe boonse!—Jobu 1:12-19.

Cilakatazya kapati kweezyeezya mbwaakalimvwa Jobu. Wakazapula zisani zyakwe, akugela masusu mpoonya wakaliwaala aansi. Mane buya Jobu wakayeeya kuti Leza wakalimupede mpoonya lino wamunyanga. Cilasalala kuti Saatani wakabelesya bucenjezu kupa Jobu kuyeeya kuti ntenda zyoonse eezyi zyakali kuzwa kuli Leza. Nokuba boobo, Jobu kunyina naakamutukila Leza kweelana ambwaakaambide Saatani. Muciindi caboobo, Jobu wakati: “Alizumanane kutembaulwa izina lya Jehova.”—Jobu 1:20-22.

Saatani wakanyema kapati cakuti tanaakayanda kulekela waawo pe. Wakaboola alimwi kumbele lya Jehova bangelo nobakabungene. Aciindi eeci Jehova alimwi wakamutembaula Jobu akaambo kakusyomeka ciindi naakasunkwa a Saatani. Pele Saatani wakati: “Lukanda kulukanda. Muntu uyoopa zintu zyoonse nzyajisi kutegwa avwune buumi bwakwe. Pele lino, kotandabika janza lyako ujate zifwuwa anyama yamubili wakwe, ulabona ulakutukila kolangilila.” Saatani wakalisinizyide kuti, ikuti Jobu waciswa kapati wakali kuyoomutukila Leza. Kasyomede kuti Jobu uyoozumanana kusyomeka, Jehova wakazumizya Saatani kupa kuti Jobu aciswe, pele kutali kumujaya.—Jobu 2:1-6.

Tiilyakalampa, Jobu wakaba mubukkale ibwaambidwe kumatalikilo aacibalo. Amuyeeye buyo mbwaakalimvwide mukaintu wakwe. Uli mubuumba akaambo kakufwidwa bana bakwe bali kkumi, lino mulumi wakwe kaciswa ceetezya, pele takonzyi kumugwasya! Moyo wakwe kaucisa akaambo kabuumba, wakaambila Jobu kuti: “Sena aino ucisyomeka? Komutukila Leza kutegwa ufwe buyo!” Mukaintu wa Jobu tanaakali kukonzya kwaamba majwi aaya kuti zintu kazili kabotu. Aboobo Jobu wakabona kuti mukaintu wakwe waambaula mbuli muntu mufwuba-fwuba. Nokuba kuti mukaintu wakwe wakaambaula munzila iitali kabotu, Jobu tanaakazumina kumutukila Leza wakwe. Alimwi kunyina naakabisya mumajwi aakwe.—Jobu 2:7-10.

Sena mulizyi kuti cibalo eeci ceetezya, pele cakacitika ncobeni cilamujatikizya andinywe kumugama? Amubone kuti Saatani wakadooneka kusyomeka kwabantu boonse ikutali buyo kwa Jobu alikke pe. Wakati: “Muntu uyoopa zintu zyoonse nzyajisi kutegwa avwune buumi bwakwe.” Munzila imwi, Saatani waamba kuti kunyina uukonzya kusyomeka cakumaninina. Waamba kuti nywebo tamumuyandi ncobeni Leza, akuti mulakonzya kumukaka kutegwa mulifwutule. Mubwini Saatani waamba kuti mulaliyanda mbubwenya mbuli nguwe! Sena muyootondezya kuti ulabeja? Umwi aumwi wandiswe ulijisi coolwe cakucita boobo. (Tusimpi 27:11) Lino atubone sunko lyakatobela.

Baalumi botatwe ibakamuzyi Jobu (Bbaibbele libaamba kuti mbeenzinyina) bakaamvwa mapenzi aakwe, aboobo bakapanga lweendo kutegwa bakamuumbulizye. Nobakamubona kulaale, kunyina nobakamuzyiba akaambo kakuti wakalicimvwide, alimwi lukanda lwakwe lwakali kusiya akaambo kacilwazi, cakuti tanaakacili Jobu ngobakazyi bantu. Baalumi aaba botatwe, Elifazi, Bilidadi alimwi a Zofari bakalicengeezya kuti beetezyegwa kapati, bakoongolola kulila akuwaala mavwu amitwe yabo. Mpoonya bakakkala munsi lya Jobu kakunyina kwaamba cintu cili coonse. Kwansondo, syikati amasiku bakakkala kakunyina kwaamba jwi noliba lyomwe. Inga tiitwaamba kuti kuumuna ooku kwakali kwakuumbulizya Jobu pe, nkaambo tiibakamubikkila maano alimwi tiibakamubuzya cili coonse kujatikizya bukkale bwakwe, pele cilikke ncobakazyi ncakuti wakalicimvwide.—Jobu 2:11-13; 30:30.

Kumane Jobu wakaile kuutalisya buyo mubandi. Wakatondezya mbwaakacimvwide kucisa kwiinda mukusinganya buzuba mbwaakazyalwa. Alimwi wakaamba kaambo kapati kakapede kuti apenge boobu. Wakali kuyeeya kuti Leza ngowakamuletela mapenzi aaya! (Jobu 3:1, 2, 23) Nokuba kuti Jobu wakajisi lusyomo luyumu, ncaakali kuyanda buyo nkuumbulizyigwa. Ciindi balongwe bakwe aaba nobakatalika kwaambaula, wakayeeya kuti cakali kwiinda kubota nobakaumuna buyo.—Jobu 13:5.

Elifazi, walo uuyeeyelwa kuti ngowakali mupati kuli boonse alimwi akuli Jobu, wakatalika kwaambaula. Mpoonya abeenzinyina bakamusangana. Mubufwaafwi inga twaamba kuti bakayungwa amizeezo yakwe yakalubide. Zimwi nzyobakaamba baalumi aaba inga zyalibonya mbuli kuti zyakali buyo kabotu nkaambo bakali kwaamba makani ngobavwula kwaamba bantu banji, makani mbuli aakuti Leza ulisumpukide kapati, ulabasubula bantu babi alimwi akubalongezya aabo basyomeka. Pele kuzwa buyo kumatalikilo majwi aabo akatondezya kuti bakali kuupaupa buyo ameso. Elifazi wakali kulibonya mbuli kuti wakaliluzi kwiinda mukwaamba kuti, ikuti naa Leza ulabasubula bantu babi, mpoonya Jobu ulapenga, ino nkaambo nzi ncapenga? Kweelede kuti kuli cibi ncaakacita.—Jobu 4:1, 7, 8; 5:3-6.

Tacigambyi kuti Jobu tanaakaazuminizya makani aayo. Wakakaka cakaanzambwene. (Jobu 6:25) Pele baalumi aaba botatwe bakasinizya kapati kuti kuli cibi ncaakacita Jobu ncaakali kusisa, aboobo wakali kweelela kupenga boobu. Elifazi wakatamikizya Jobu kuti ulalisumpula, ngusizibi alimwi tayoowi Leza. (Jobu 15:4, 7-9, 20-24; 22:6-11) Zofari wakaambila Jobu kuti aleke kunoocita zibi akuzikkomanina zibi eezyo. (Jobu 11:2, 3, 14; 20:5, 12, 13) Mpoonya Bilidadi wakaamba cintu cibyaabi kapati kwiinda boonse. Wakaamba kuti bana ba Jobu bakacita cibi, aboobo bakali kweelela kufwa!—Jobu 8:4, 13.

Baalumi aaba babyaabi bakacita cintu cimwi cakaindila kubija. Tiibakaamba buyo kuti Jobu tanaakali kusyomeka cakumaninina kuli Leza, pele alimwi bakaamba kuti kusyomeka kuli Leza takugwasyi! Mumajwi aakwe aakusaanguna, Elifazi wakaamba kuti wakabona cilenge camuuya citalibonyi alimwi ciyoosya kapati. Naakabona daimona eelyo, wakaamba majwi mabyaabi kapati aakuti: Leza “tabasyomi babelesi bakwe pe, alimwi ulabapa milandu bangelo bakwe.” Kwiinda mumajwi aayo, wakatondezya kuti bantu tabakonzyi kumukkomanisya Leza! Kumane Bilidadi wakaamba kuti Leza tanaakali kukukombelela kusyomeka kwa Jobu mbubwenya mbwatakonzyi kukombelela mvwunyu kuti kaisyomeka kulinguwe.—Jobu 4:12-18; 15:15; 22:2, 3; 25:4-6.

Sena kuli nomwakaumbulizya kale muntu uuli mumapenzi aataambiki? Tacili cuuba-uba. Pele tulakonzya kwiiya zinji kubalongwe ba Jobu babyaabi kwaambisya kujatikizya ncotuteelede kwaamba. Mumajwi aabo aatalivwulili ngobakaamba alimwi akuyeeya kwabo kutaluzi, baalumi aaba kunyina nobakaamba zina lya Jobu nobakali kubandika anguwe. Tiibakabikkila maano mbwaakauside alimwi tiibakayanda kumweendelezya calubomba. * Aboobo ikuti muntu ngomuyanda kauside, amusole kumusangalizya, kumubikkila maano alimwi akumutondezya luzyalo. Amumugwasye kuba alusyomo luyumu muli Leza, luzyalo lwakwe, luse abululami. Oobo mbwaakali kukonzya kucita Jobu kubalongwe bakwe nibakali mbabo ibakali mubukkale bwakwe. (Jobu 16:4, 5) Ino Jobu wakacita buti ciindi baalumi aaba nobakazumanana kumusunka akaambo kakusyomeka kwakwe?

Mwaalumi ooyu weetezya wakalityompedwe kale ciindi mubandi ooyu nowakatalika abaalumi aaba botatwe. Kuzwa kumatalikilo wakaambide kuti zimwi ziindi wakali ‘kwaamba caambaambe’ alimwi wakali kwaamba boobo akaambo kakuti ‘wakalipengede mumoyo.’ (Jobu 6:3, 26) Tulakonzya kumumvwisya. Wakaamba majwi aaya akaambo kakuti wakalityompedwe kapati. Kunze lyaboobo, majwi aakwe atondezya kuti tanaakali kumvwisya zyakali kucitika. Akaambo kakuti mapenzi akaboola cacibukilambuta alimwi akali kulibonya kuti masalamuzi, Jobu wakayeeya kuti Jehova ngowakaatalisya. Kuli makani mapati aakajatikizyidwe ngaatakazyi Jobu, aboobo akaambo kakuti kunyina ncaakazyi wakali kwaamba buyo caambaambe.

Nokuba boobo, Jobu wakali mwaalumi wakajisi lusyomo luyumu kapati. Bumboni bulalibonya mumajwi ngaakaamba ciindi naakali kubandika abaalumi aabaya botatwe, nkokuti majwi aamasimpe, mabotu alimwi aayumya-yumya kulindiswe mazuba aano. Ciindi naakaamba kujatikizya zilenge zigambya, wakaamba zintu nzyotwatakali kukonzya kuzyiba ikuti Leza naatakamwaambila. Mucikozyanyo wakaamba Jehova kuti ‘waanzikide nyika aatakwe cintu,’ makani ngobatakazyi basayaansi kwamyaanda yamyaka. * (Jobu 26:7) Alimwi ciindi Jobu naakali kwaamba makani aabulangizi bwakwe bwakumbele, wakaamba bulangizi mbobakajisi baalumi bambi ibakali kusyomeka. Jobu wakali kusyoma kuti nokuba kuti wafwa, Leza wakali kuyoomuyeeya akuyoomubusya kuti akapone alimwi.—Jobu 14:13-15; Bahebrayo 11:17-19, 35.

Ino mbuti lino kujatikizya makani aakusyomeka? Elifazi abeenzinyina bobilo bakazumanana kwaamba kuti tacikwe makani nokuba kuti muntu ulasyomeka kuli Leza naa pe. Sena Jobu wakauzumina muzeezo ooyu wakubeja? Peepe! Jobu wakalisinizyide kuti kusyomeka kuli Leza kulayandika kapati. Wakaamba cakusinizya kujatikizya Jehova kuti: “Ulazyiba kuti nsijisi kampenda.” (Jobu 31:6) Kuyungizya waawo, Jobu wakazyiba kuti beenzinyina botatwe bakali kuyanda buyo kusunka lusyomo lwakwe. Eeci cakapa kuti Jobu aambe majwi aatalivwulili aakapa kuti baalumi aabaya botatwe baumune buyo.

Jobu wakamvwisya kuti kusyomeka kwakwe kwakali kubujatikizya buumi mbwaakali kupona. Aboobo wakazumanana kusyomeka muzintu zyoonse nzyaakali kucita. Mucikozyanyo, wakaitantamuka mituni yoonse, wakabeendelezya caluzyalo alimwi akubalemeka bamwi, wakazumanana kusalala mukulilemeka, kucibikkila maano cikwati cakwe; alimwi kwiinda zyoonse wakazumanana kulyaaba kuli Leza wakasimpe uli alikke, Jehova. Nkakaambo kaako Jobu wakali kukonzya kwaamba kuzwa ansi aamoyo kuti: “Kusikila ndikafwe, tandikaleki kusyomeka pe!”—Jobu 27:5; 31:1, 2, 9-11, 16-18, 26-28.

Sena kusyomeka mukubona kuti kulayandika mbubwenya mbwaakali kukubona Jobu? Tacizulide kwaamba buyo amulomo kuti ndilasyomeka, pele mbubwenya mbuli Jobu tweelede kutondezya kuti tulasyomeka kwiinda mumicito. Tulatondezya kuti tulilyaabide camoyo woonse kuli Leza kwiinda mukumumvwida alimwi akucita ciluzi buzuba abuzuba, nociba ciindi notuyaanya mapenzi. Ikuti naa twapona munzila eeyo, mbubwenya mbuli mbwaakacita Jobu, tuyoopa kuti Jehova akkomane akupa kuti Saatani ause. Eeyi nenzila yiinda kubota yakwiiya lusyomo lwa Jobu!

Aaya taali ngamamanino aamakani aa Jobu. Wakaluba cintu cakali kuyandika kapati, aboobo wakabikkila maano kumpuwo yakwe yakuti wakaliluleme muciindi cakusumpula bululami bwa Leza. Wakali kuyandika kululamikwa alimwi akupegwa lugwasyo lwakumuuya. Alimwi wakacili mubuumba, cakuti wakali kuyandika luumbulizyo lwini-lwini. Ino ncinzi Jehova ncaakali kuyoocita kumwaalumi ooyu uusyomeka? Mubuzyo ooyu uyooyingulwa mucibalo citobela caamba makani aa Jobu.