Jesu wakafwa kutegwa bantu balekelelwe zibi zyabo akuyooba abuumi butamani. (Baroma 6:​23; Baefeso 1:7) Kuyungizya waawo, lufwu lwa Jesu lwakatondezya kuti muntu ulakonzya kuzumanana kusyomeka kuli Leza nomuba mumasunko aakatazya kapati.​—Bahebrayo 4:​15.

 Amulange-lange lufwu lwamuntu omwe mbolukonzya kuzuzikizya zintu zinji.

1.   Jesu wakafwa kutegwa ‘tulekelelwe zibi zyesu.’​—Bakolose 1:​14.

    Muntu wakusaanguna Adamu, wakalilondokede, nkokuti wakanyina cibi. Nokuba boobo, wakasala kuzangila Leza. Kutamvwida naa kubisya kwa Adamu, kwakabajatikizya bana bakwe boonse. Bbaibbele lyaamba kuti: ‘Banji bakaba basizibi kwiinda mukutamvwida kwamuntu omwe.’​—Baroma 5:​19.

    Jesu awalo wakalilondokede, pele kunyina naakabisya. Aboobo, wakaba ‘cipaizyo cakumanya zibi zyesu.’ (1 Johane 2:2) Mbubwenya kutamvwida kwa Adamu mbokwakapa bantu boonse kuti bayambukilwe cibi, alwalo lufwu lwa Jesu lwakagusya cibi kuli baabo bamusyoma.

    Munzila imwi, Adamu wakasambala bantu boonse kucibi. Kwiinda mukutufwida, Jesu wakatuula toonse. Akaambo kaceeci, “ikuti umwi wabisya, tulijisi mugwasyi kuli Taata, Jesu Kristo, imululami.”​—1 Johane 2:1.

2.   Jesu wakafwa “kutegwa muntu uuli woonse uumusyoma atanyonyoonwi, pele abe abuumi butamani.”​—Johane 3:​16.

    Nokuba kuti Adamu wakalengedwe kuti kapona kukabe kutamani, cibi cakamuletela cisubulo calufwu. Kwiinda muli Adamu, ‘cibi cakanjila munyika alufwu kwiinda mucibi, eelyo lufwu lwakasikila bantu boonse nkaambo boonse bakabisya.’​—Baroma 5:​12.

    Mukwiimpana, lufwu lwa Jesu tiilwakagusya buyo cibi, pele lwakagusya alufwu kuli baabo bamusyoma Jesu. Bbaibbele lyaamba kuti: “Mbubonya cibi mbocakeendelezya mbuli mwami antoomwe alufwu, mbubonya buyo alwalo luzyalo lwa Leza lweendelezye mbuli mwami kwiinda mubululami kutegwa kube buumi butamani kwiinda muli Jesu Kristo Mwami wesu.”​—Baroma 5:​21.

    Mubwini, bantu mazuba aano tabaponi kukabe kutamani. Nokuba boobo, Leza usyomezya kuti bantu baluleme uyoobapa buumi butamani alimwi uyoobusya bafwide kutegwa abalo bakagwasyigwe acinunuzyo calufwu lwa Jesu.​—Intembauzyo 37:29; 1 Bakorinto 15:22.

3.   Jesu “wakalicesya akumvwida mane kusikila kulufwu,” kutondezya kuti muntu ulakonzya kusyomeka kuli Leza nociba ciindi nasunkwa.​—Bafilipi 2:8.

    Nokuba kuti Adamu wakalilondokede, wakazangila Leza acaali akaambo kakuyandisya cintu catakali cakwe. (Matalikilo 2:​16, 17; 3:6) Mpoonya, sinkondonyina Leza, Saatani, wakaamba kuti kunyina uukonzya kuzumanana kusyomeka kuli Leza, kwaambisya kuti buumi bwakwe kabuli muntenda. (Jobu 2:4) Pele walo Jesu imwaalumi uulondokede wakamumvwida Leza akuzumanana kusyomeka kulinguwe mane buya akujaigwa lufwu lucisa. (Bahebrayo 7:​26) Eeci ncaakacita cakakasalazya kaambo kakuti: Muntu ulakonzya kuzumanana kusyomeka kuli Leza ciindi nasunkwa.

Mibuzyo iijatikizya lufwu lwa Jesu

•   Nkaambo nzi Jesu ncaakapenga alimwi akufwa kutegwa afwutule bantu? Nkaambo nzi Leza ncaatakakujokolola buyo kusinganya kwalufwu?

   Bbaibbele lyaamba kuti, ‘cakuvwola cacibi ndufwu.’ (Baroma 6:​23) Muciindi cakumusisa Adamu, Leza wakamwaambila kuti kutamvwida kusololela kulufwu. (Matalikilo 3:3) Ciindi Adamu naakabisya, Leza, “uutakonzyi kubeja,” wakacita kweelana ancaakaambide. (Tito 1:2) Adamu wakayambukizya bana bakwe cibi alimwi acakuvwola cacibi, ilufwu.

   Nokuba kuti bantu bakasinganizyigwa kuti kabafwa, Leza wakabalekelela ‘akaambo kaluzyalo lwakwe lunji kapati.’ (Baefeso 1:7) Oobu bubambe bwakunununa bantu kwiinda mukutuma Jesu kacili cinunuzyo cilondokede, bwakali bululami bwa Leza alimwi aluzyalo lwakwe lupati.

•   Ino Jesu wakafwa lili?

   Jesu wakafwa ‘awoola lyafwuka’ naa kuti kuma 3 koloko yakumazuba mubuzuba bwa Pobwe Lyakwiindilila lyaba Juda. (Marko 15:33-​37, bupanduluzi buyungizyidwe) Oomu mwakali mu Friday April 1, 33 C.E, kweelana amakkalenda aamazuba aano.

•   Ino Jesu wakafwida kuli?

   Jesu wakafwida “kubusena butegwa Busena bwa Cipapa Camutwe, ibutegwa Gologota mu Chihebrayo.” (Johane 19:17, 18) Busena oobu bwakali “kunze amulyango wamunzi” wa Jerusalemu mumazuba aa Jesu. (Bahebrayo 13:12) Kulibonya kuti busena oobu bwakali atala aamulundu nkaambo Bbaibbele lyaamba kuti bamwi bakali “kulangilila alaale” ciindi Jesu naakali kujaigwa. (Marko 15:40) Nokuba boobo, mazuba aano busena butegwa Gologota tabuzizyilwe eeni mpobwakabede.

•   Ino Jesu wakafwa buti?

   Nokuba kuti bantu banji baamba kuti Jesu wakafwida aciingano naa kuti mpanda, lyalo Bbaibbele lyaamba kuti: “Walo mwini wakabweza zibi zyesu mumubili wakwe aacisamu.” (1 Petro 2:​24) Balembi ba Bbaibbele bakabelesya mabala aa Chigiriki obilo kupandulula mpaakafwida Jesu, ibbala lyakuti stau·rosʹ alimwi alya xyʹlon. Basyaazibwene banji baamba kuti mabala aaya aamba cisamu comwe cili mbuli cipulanga cinyina mpanda.

•   Ino lufwu lwa Jesu lweelede kuyeeyegwa buti?

   Masiku lya Pobwe Lyakwiindilila lyaba Juda, Jesu wakatalisya pobwe abasikumutobela, mpoonya wakabalailila kuti: “Kamucita oobu lyoonse kutegwa kamundiyeeya.” (1 Bakorinto 11:24) Nikwakainda mawoola aali mbwaabede, Jesu wakajaigwa.

   Balembi ba Bbaibbele bakakozyanisya Jesu kucipaizyo cakali kupegwa ciindi ca Pobwe Lyakwiindilila. (1 Bakorinto 5:7) Mbubwenya mbuli Pobwe Lyakwiindilila mbolyakali kuyeezya bana Israyeli kuti bakanununwa kuzwa mubuzike, acalo Ciibalusyo Calufwu lwa Jesu Kristo ceelede kuyeezya Banakristo kuti bakanununwa kuzwa kucibi alufwu. Pobwe Lyakwiindilila, ilyakali kucitwa mu Nisani 14 kweelana akkalenda yamu Bbaibbele, lyakali kucitwa mwaka amwaka; abalo Banakristo bakusaanguna bakali kucita Ciibalusyo ciindi comwe amwaka.

   Mwaka amwaka, mudeeti yeendelana abuzuba bwa Nisani 14, bantu banji nyika yoonse balaibaluka lufwu lwa Jesu.