Leza uyanda kuti mumuzyibe kabotu, mube acilongwe anguwe, mpoonya akumuyanda alimwi akumubelekela camoyo woonse. (Matayo 22:37, 38; Jakobo 4:8) Buumi bwa Jesu azyintu nzyaakayiisya zilakonzya kumugwasya kwiiya mbomukonzya kucita kuyanda kwa Leza. (Johane 7:16, 17) Jesu tanaakali kwaamba buyo kujatikizya kuyanda kwa Leza—pele wakapona kwelana anzyaakali kuyiisya. Alimwi buya, Jesu wakaamba kuti makanze aakwe mubuumi ‘tanaakali aakucita kuyanda kwakwe, pele kuyanda kwayooyo wakamutuma.’—Johane 6:38.

Sena ndiyandika citondezyo camaleele kutegwa ndizyibe makanze ngajisi Leza kujatikizya buumi bwangu?

 Peepe, akaambo kakuti Bbaibbele lijisi mulumbe wa Leza kubantu. Lilijisi nzyomuyandika kutegwa ‘kamulibambilide cakumaninina kubeleka mulimo mubotu uuli woonse.’ (2 Timoteyo 3:16, 17) Leza uyanda kuti mulibelesye Bbaibbele alimwi ‘akubelesya maano’ kutegwa mwiiye kuyanda kwakwe.—Baloma 12:1, 2; Baefeso 5:17.

Sena ncobeni inga ndacikonzya kucita kuyanda kwa Leza?

 Inzya, inga mwacikonzya, nkaambo Bbaibbele lyaamba kuti: ‘Milawo ya Leza tiiminyi.’ (1 Johane 5:3) Eeci tacaambi kuti kutobela milawo ya Leza lyoonse ncuuba-uba. Pele mpindu nzyomukonzya kujana zilainda akusolekesya koonse nkomweelede kucita. Jesu mwini wakaamba kuti: “Ibakkomene mbaabo baswiilila jwi lya Leza akulicita!”—Luka 11:28.