Kuyoowa Lufwu—Ino Inga Mwakuzunda Buti?
Bwiinguzi bwamu Bbaibbele
Cililuzi kuyoowa lufwu nkaambo ngusinkondoma alimwi tulabweza ntaamu zyeelede kutegwa tulikwabilile. (1 Bakolinto 15:26) Nokuba boobo, kuciindizya kuyoowa lufwu akaambo kanjiisyo zyakubeja naa kusyoma mizimo kupa bantu kuba “mubuzike mubuumi bwabo boonse.” (Bahebulayo 2:15) Kuzyiba kasimpe kuyoomupa kuleka kuciindizya kuyoowa lufwu—kuyoowa ikukonzya kumupa kubula lukkomano.—Johane 8:32.
Kasimpe kujatikizya lufwu
Bafwu tabazyi cintu cili coonse. (Intembauzyo 146:4) Tamweelede kuyoowa kuti munoomvwa kucisa naa kupenzyegwa mwaakufwa, nkaambo Bbaibbele likozyanisya lufwu kukoona.—Intembauzyo 13:3; Johane 11:11-14.
Bafwu tabakonzyi kutucisa. Nobaba bantu bakali basinkondo kaindi ‘balalyookezya akati kabafu.’ (Tusimpi 21:16) Ibbaibbele lyaamba kuti, “lusulo lwabo abbivwe lyabo, zyoonse zyafwidilila.”—Mukambausi 9:6.
Lufwu taali ngamamanino aabuumi bwesu. Kwiinda mububuke, Leza uyoobabusya bantu bafwide.—Johane 5:28, 29; Milimo 24:15.
Leza usyomezya ciindi ‘lufwu nolutakooyoobako limbi.’ (Ciyubunuzyo 21:4) Kujatikizya buzuba oobo, Ibbaibbele lyaamba kuti: “Balulami bayookona nyika, bayookala alinjiyo lyoonse,” kakunyina kuyoowa lufwu naaceya.—Intembauzyo 37:29.