Peepe, tatweelede. Ibbuku lyakuti New Catholic Encyclopedia lyaamba boobu kujatikizya milawo Leza njaakapa bana Israyeli: “Zibalo ziindene-indene zyamu Bbaibbele zitondezya kuti bukombi bwakasimpe bwa Leza tiibwakali kubikkilizya kukomba mituni.” Amulange-lange tupango ootu twamu Bbaibbele:

•  “Utalicitili cikozyano cibezedwe cacintu cili buti cili kujulu nanka cili ansi ano nanka cili mumaanzi kunsi anyika. Utazikotamini nekuba kuzimanina milimo, nkaambo ndime Jehova Leza wako, ndi Leza sibuzuba.” (Kulonga 20:​4, 5) Mbwaanga ngu Leza “sibuzuba,” takkomani kuti twatalika kukomba mituni, zifwanikiso, zikozyanyo, zibezedwe naa zitondezyo.

•  “Bulemu bwangu nsikooyoobupa umbi, akulemekwa kwangu nsikooyookupa zikozyano zifulidwe.” (Isaya 42:8) Leza tabuyandi bukombi bucitwa kwiinda mumituni. Ciindi bana Israyeli nobakasola kumukomba kwiinda mukubelesya moombe, Leza wakaamba kuti “babisya.”​—Kulonga 32:​7-9.

•   “Tatweelede kuyeeya kuti Leza uli mbuli ngolida, nsiliva naa bbwe, mbuli cintu cibezedwe eeco basyaazibwene ncobakaide kuyeeyela buyo akupanga.” (Milimo 17:29) Mukwiimpana abukombi bwakubeja, mwalo mobabelesya mituni ‘basyaazibwene njobakaide kuyeeyela buyo akupanga,’ Bbaibbele lyaamba kuti Banakristo beelede ‘kweenda mulusyomo, ikutali kweelana anzyobabona.’​—2 Bakolinto 5:7.

•   “Amwiitantamuke mituni.” (1 Johane 5:​21) Mumilawo iipedwe kubana Israyeli a Banakristo, Bbaibbele lilatondezya mumbazu zyoonse kuti njiisyo yakuti Leza ulaikkomanina mituni azitondezyo mubukombi njakubeja.