1, 2. Pita i laik tru long wanem samting i ken kamap taim Jisas i toktok long ol manmeri long Kaperneam? Tasol wanem samting i kamap?

 PITA i tingting planti na lukluk raun long pes bilong ol man i harim tok bilong Jisas. Ol i stap long sinagog long Kaperneam. Haus bilong Pita i stap long dispela taun; wok bisnis bilong em long kisim pis i stap long dispela hap, long hap not long nambis bilong Raunwara  Galili; planti pren bilong em, famili, na ol man em i save wok bisnis wantaim ol, i stap long dispela hap. Ating Pita i laik tru long ol man long hap bilong em i gat wankain tingting olsem em long Jisas, na ol tu i ken amamas tru long kisim save long Kingdom Bilong God long rot bilong dispela Bikpela Tisa. Tasol dispela samting i no kamap long dispela de.

² Planti i no putim yau moa. Sampela i toktok planti, na i no wanbel long tok Jisas i autim. Tasol samting i bagarapim moa yet bel bilong Pita em pasin bilong sampela disaipel bilong Jisas yet. Pes bilong ol i no lait moa bilong soim olsem ol i amamas long kisim nupela save long tok i tru, nogat. Nau pes bilong ol i drai, na ol i bel nogut. Sampela i tokaut olsem, tok bilong Jisas i mekim ol i kirap nogut. Ol i no laik harim tok bilong em moa, ol i lusim sinagog—na ol i no laik bihainim Jisas moa.​—Ritim Jon 6:60, 66.

3. Planti taim bilip bilong Pita i helpim em long mekim wanem?

³ Em taim nogut long Pita na long ol aposel. Pita i no kliagut long tok Jisas i bin mekim long dispela de. Em i luksave olsem sapos i no gat wanpela i kamapim mining bilong tok bilong Jisas, i gat as na ol man i no amamas long ol dispela tok. Pita bai mekim wanem? Dispela i no fes taim we traim i kamap long pasin bilong em long stap gut long Bikman bilong em; na em i no laspela taim dispela samting i kamap. Orait nau yumi laik save olsem wanem bilip bilong Pita i helpim em long winim ol traim na stap gut yet long Bikman bilong em.

4, 5. Olsem wanem ol samting Jisas i mekim i narapela kain long samting ol man i ting em bai mekim?

⁴ Planti taim Pita i kirap nogut long samting Jisas i mekim. Na planti taim, ol samting Bikman bilong em i mekim na ol tok bilong em i narapela kain long samting ol man i ting em bai mekim. Wanpela de paslain, Jisas i wokim mirakel na givim kaikai long planti tausen man. Olsem na ol manmeri i laik mekim em i kamap king. Tasol  planti i kirap nogut taim em i lusim ol, na tokim ol disaipel long kalap long bot na seil i go olsem long Kaperneam. Taim ol disaipel i raun long wara long nait, ol i kirap nogut gen long lukim Jisas i wokabaut antap long Raunwara Galili i raf, dispela i skulim Pita olsem bilip i bikpela samting.

⁵ Long moningtaim, ol i luksave olsem ol manmeri i bihainim ol i go long narapela sait bilong raunwara. I klia tru olsem ol i laik lukim Jisas i wokim mirakel na givim kaikai long ol, i no olsem ol i hangre long kisim save long ol tok i tru. Jisas i krosim ol bikos ol i tingting tasol long kisim ol samting bilong skin. (Jon 6:25-27) Ol i toktok yet long dispela samting long sinagog long Kaperneam, long dispela hap Jisas i kamapim gen sampela tok em ol i no ting em bai kamapim bilong skulim ol long wanpela bikpela tok i tru em ol i hatwok long kliagut long en.

6. Jisas i mekim wanem tok piksa? Ol man i harim tok bilong em i mekim wanem?

⁶ Jisas i no laik bai ol man i tingim em olsem rot bilong kisim kaikai bilong skin tasol, nogat. Em i laik bai ol i tingim em olsem helpim i kam long God, na laip bilong em olsem man long graun na dai bilong em inap opim rot long ol man i kisim laip oltaim. Olsem na em i kamapim wanpela tok piksa na tok em yet i olsem mana, dispela bret i kam daun long heven long taim bilong Moses. Sampela i no laik harim dispela tok, so em i kamapim narapela tok piksa i klia moa, em i tokim ol olsem bilong kisim laip, ol i mas kaikai bodi na dringim blut bilong em. Taim em i mekim dispela tok, ol i belhat nogut tru long em. Sampela i tok: “Em i mekim wanem kain tok? Husat inap putim yau long dispela tok?” Planti disaipel bilong Jisas i no bihainim em moa. a—Jon 6:48-60, 66.

7, 8. (a) Pita i no kliagut yet long wanem samting long wok bilong Jisas? (b) Pita i bekim wanem tok long askim bilong Jisas long ol aposel?

⁷ Pita bai mekim wanem? Ating em tu i kirap nogut long tok bilong Jisas. Em i no kliagut yet olsem Jisas i mas i dai bilong mekim laik bilong God. Tasol yu ting Pita i laik lusim Jisas olsem ol disaipel husat i bin lusim Jisas long dispela de? Nogat; wanpela bikpela samting i mekim na Pita i narapela kain long ol. Em wanem samting?

⁸ Jisas i lukluk i go long ol aposel bilong em na i tok: “Ating yupela tu i laik lusim mi na i go, a?” (Jon 6:67) Em i toktok long 12-pela aposel, tasol Pita i bekim tok. Planti taim em i mekim olsem. Ating Pita i gat bikpela krismas long ol. Maski i olsem, namel long ol aposel, Pita em man bilong toktok; em i no save surik long kamapim tingting bilong em. Long dispela taim em i kamapim tingting  bilong em long wanpela gutpela tok em planti man i save tingim: “Bikpela, bai mipela i go long husat? Ol tok bilong yu i bringim man i go long laip oltaim.”​—Jon 6:68.

9. Hau Pita i soim olsem em i stap gut long Jisas?

⁹ Ating yu pilim tru dispela tok, a? Pita i bilip long Jisas na dispela i helpim em long kisim wanpela gutpela pasin tru—em pasin bilong stap gut long Jisas. Pita i luksave olsem Jisas em dispela Seivia tasol Jehova i givim na Jisas inap kisim bek ol man long rot bilong ol tok bilong em—ol tok em i skulim ol man long en long Kingdom Bilong God. Pita i save maski i gat sampela samting em i no kliagut long en, i no gat narapela hap bilong kisim helpim sapos em i laik bai God i orait long em na em inap kisim blesing bilong laip oltaim.

10. Long nau, olsem wanem yumi inap bihainim pasin bilong Pita long stap gut long Jisas?

¹⁰ Yu tu i gat wankain tingting? Sori tru, planti manmeri long nau i tok ol i laikim Jisas, tasol ol i no stap gut long em. Bilong stap gut long Krais, yumi mas i gat wankain tingting olsem Pita long ol tok Jisas i skulim ol man long en. Yumi mas lainim gut ol dispela tok, kliagut long mining bilong en, na bihainim long laip bilong yumi—maski sampela taim yumi kirap nogut long ol dispela tok i no stret wantaim tingting o laik bilong yumi. Pasin bilong stap gut long Jisas em wanpela rot tasol bilong kisim laip oltaim em Jisas i laik givim long yumi.​—Ritim Buk Song 97:10.

11. Jisas i kisim lain bilong em i go long wanem longpela rot? (Lukim tu futnot.)

¹¹ Bihain liklik long dispela taim we ol i bisi tru, Jisas i kisim ol aposel na sampela disaipel na ol i bihainim wanpela longpela rot i go olsem long hap not. Maunten Hermon i gat ais antap long en, em i stap long hap not tru bilong Graun Bilong Promis, sampela taim ol man i stap long Raunwara Galili inap lukim dispela maunten. Taim dispela lain i wok long kam klostu, isi isi i luk olsem maunten i go bikpela moa, na ol i wokabaut i go antap long ol ples klostu long Sisaria Filipai. b Ol i stap long dispela naispela ples, we ol inap lukim planti hap bilong Graun Bilong Promis long hap saut, nau Jisas i givim wanpela bikpela askim long ol.

12, 13. (a) Wai na Jisas i askim ol manmeri long tingting bilong ol long em i husat? (b) Long tok Pita i mekim long Jisas, olsem wanem em i kamapim olsem em i bilip tru?

¹² Jisas i askim: “Ol manmeri i wok long tok mi husat tru?” Yumi  inap piksaim Pita i lukluk long ai bilong Jisas, na em i pilim tru pasin helpim na bikpela save bilong Bikman bilong em. Jisas i laik save long tingting bilong ol manmeri i harim tok bilong em, ol i gat wanem tingting long ol samting ol i lukim na harim. Ol disaipel bilong Jisas i bekim dispela askim, ol i kamapim gen sampela tingting kranki bilong ol man long Jisas em i husat tru. Tasol Jisas i laik save long sampela samting moa. Yu ting ol disaipel i pas gut wantaim em i gat wankain tingting kranki? Em i askim ol: “Tasol yupela yet i tok mi husat?”​—Luk 9:18-20.

¹³ Long dispela taim gen, Pita i bekim kwik tok. Em i kamapim klia tingting i stap long bel bilong planti man. Em i tok: “Yu dispela Krais, Pikinini bilong dispela God i stap laip.” Yumi ken piksaim Jisas i smail bilong soim olsem em i orait long Pita na tok amamas long em. Jisas i tokim Pita gen olsem em Jehova God—na i no ol man—i kamapim klia dispela bikpela tok i tru long ol man i bilip tru. Pita i luksave long wanpela bikpela tok i tru em Jehova i no kamapim yet—dispela Mesaia, o Krais, em longtaim pinis God i bin tok promis long salim i kam.​—Ritim Matyu 16:16, 17.

14. Jisas i givim wanem sampela bikpela wok long Pita?

¹⁴ Krais em dispela man bipo tok profet i kolim em olsem dispela ston ol kapenta i no laikim. (Sng. 118:22; Luk 20:17) Jisas i tingim ol dispela tok profet, na em i tokaut olsem Jehova bai kamapim kongrigesen antap long dispela bikpela ston, em nau tasol Pita i luksave long en. Na em i givim sampela bikpela wok long Pita insait long dispela kongrigesen. Em i no givim bikpela namba long Pita winim ol narapela aposel, olsem sampela i bin ting, nogat, em i givim bikpela wok long em. Em i givim “ol ki bilong Kingdom” long Pita. (Mat. 16:19) Em wok bilong Pita long opim rot i go long Kingdom Bilong God long 3-pela narapela narapela lain—pastaim long ol Juda, bihain long ol Samaria, na laspela long ol man bilong ol narapela lain, olsem ol lain i no Juda.

15. Wanem samting i kirapim Pita long krosim Jisas? Pita i tok wanem?

¹⁵ Tasol bihain Jisas i tok ol man i kisim planti samting, ol bai bekim planti samting, na dispela tok i kamap ples klia long samting i painim Pita. (Luk 12:48) Jisas i wok yet long kamapim ol bikpela tok i tru long Mesaia, dispela i makim tu pen na hevi em bai karim na dai bilong em long Jerusalem. Pita i bel hevi long harim dispela tok. Em i kisim Jisas i go long arere na krosim em: “Bikpela, marimari long yu yet, dispela samting i no ken kamap long yu.”​—Mat. 16:21, 22.

16. Jisas i stretim Pita olsem wanem? Yumi olgeta inap kisim wanem skul long tok bilong Jisas?

 ¹⁶ Pita i ting em i helpim Jisas, olsem na em i kirap nogut long bekim bilong Jisas. Jisas i givim baksait long Pita, na lukluk i go long ol narapela disaipel—ating ol tu i bin i gat wankain tingting—na Jisas i tok: “Satan, yu go baksait long mi! Yu laik pasim rot bilong mi. Tingting bilong yu i no wankain olsem tingting bilong God, nogat, tingting bilong yu i wankain olsem tingting bilong ol man.” (Mat. 16:23; Mak 8:32, 33) Tok bilong Jisas i bilong givim gutpela skul long yumi olgeta. Em isi tru long yumi bihainim tingting bilong ol man na i no bihainim tingting bilong God. Sapos yumi mekim olsem, maski yumi laik helpim narapela, yumi inap kamap olsem man i helpim laik bilong Satan na i no helpim laik bilong God. Pita i mekim wanem?

17. Tok bilong Jisas long Pita olsem “go baksait long mi” i makim wanem samting?

¹⁷ Ating Pita i luksave olsem Jisas i no tingim em olsem em i Satan dispela Devil. Jisas i no bin toktok long Pita long wankain pasin olsem em i bin toktok long Satan. Long Satan, Jisas i bin tok: “Yu klia!”; long Pita, em i tok: “Go baksait long mi.” (Mat. 4:10) Jisas i no sakim dispela aposel we em i lukim planti gutpela samting long em, tasol em i stretim tingting kranki bilong Pita long dispela samting. Em isi long luksave olsem Pita i mas lusim pasin bilong i stap long fran bilong Bikman bilong em olsem samting bilong pundaunim em, em i mas i go baksait long Jisas na stap olsem wanpela gutpela helpim bilong em.

18. Olsem wanem Pita i soim pasin bilong stap gut long Jisas? Hau bai yumi bihainim pasin bilong em?

¹⁸ Yu ting Pita i tok pait, kros, o bel hevi? Nogat; long pasin daun em i kisim tok bilong stretim em. Long dispela taim gen em i stap gut long Jisas. Olgeta man i bihainim Krais, sampela taim ol i mas kisim tok bilong stretim ol. Sapos yumi daunim yumi yet na kisim skul long tok bilong stretim yumi, dispela bai helpim yumi long go klostu moa long Jisas Krais na Papa bilong em, Jehova God.​—Ritim Provep. 4:13.

19. Jisas i mekim gen wanem narakain tok? Ating Pita i tingting long wanem samting?

¹⁹ I no longtaim na Jisas i mekim gen wanpela narakain tok: “Mi  tok tru long yupela olsem, sampela man i sanap long hia bai i no dai yet na ol bai i lukim Pikinini bilong man i kam olsem king.” (Mat. 16:28) Yumi ken ting olsem Pita i laik save tru long dispela tok. Wanem mining bilong dispela tok bilong Jisas? Ating Pita i tingting, nau tasol em i kisim strongpela tok bilong stretim em na nogut dispela i makim olsem em i no inap kisim dispela gutpela blesing.

20, 21. (a) Stori long visen Pita i lukim. (b) Olsem wanem toktok namel long tripela man long visen i helpim Pita long kisim stretpela tingting?

²⁰ Tasol klostu wanpela wik bihain, Jisas i kisim Jems, Jon, na Pita i go long “wanpela maunten i antap moa”—ating em Maunten Hermon, i stap 25 kilomita longwe long ol. Ating em nait, long wanem, ai bilong 3-pela man i hevi, tasol ol i strong long daunim slip. Tasol taim Jisas i beten, wanpela samting i kamap na dispela i rausim aislip bilong ol.​—Mat. 17:1; Luk 9:28, 29, 32.

²¹ Long ai bilong ol, bodi bilong Jisas i wok long senis. Pes bilong em i stat long sain, i go inap long pes i lait olsem san. Klos  bilong em i kamap wait na i lait. Orait nau tupela man i kamap na i stap wantaim Jisas, wanpela i makim Moses na narapela i makim Elaija. Ol i toktok wantaim em long “olsem wanem em bai go, em dispela samting i mas kamap long Jerusalem”—ol i toktok long indai na kirap bek bilong em. I klia tru olsem Pita i mekim tok kranki olsem dispela pen na hevi i no inap painim Jisas!​—Luk 9:30, 31.

22, 23. (a) Olsem wanem Pita i soim gutpela pasin? (b) Pita, Jems, na Jon i kisim wanem narapela blesing long dispela nait?

²² Pita i pilim olsem em i mas insait long dispela narakain visen—na ating em i laik bai dispela visen i stap longpela taim. I luk olsem Moses na Elaija i laik lusim Jisas. Olsem na Pita i tok: “Tisa, i gutpela mipela i stap long hia. Mipela i ken sanapim 3-pela haus sel, wanpela bilong yu, wanpela bilong Moses, na wanpela bilong Elaija.” Yumi save, dispela tupela man long visen i makim tupela wokman bilong Jehova em ol i dai longtaim pinis so ol i no nidim haus sel. Pita i no kliagut long tok em yet i mekim. Olsem wanem? Gutpela pasin bilong Pita i kirapim yu long laikim em?​—Luk 9:33.

²³ Long dispela nait, Pita, Jems, na Jon i kisim narapela blesing. Wanpela klaut i kamap na karamapim ol antap long maunten. Long dispela klaut wanpela nek i kamap—em nek bilong Jehova God! Em i tok: “Dispela em i Pikinini bilong mi, em man mi bin makim. Harim tok bilong em.” Orait nau dispela visen i pinis, na ol tasol i stap wantaim Jisas long maunten.​—Luk 9:34-36.

24. (a) Olsem wanem dispela visen long bodi bilong Jisas i senis i helpim Pita? (b) Olsem wanem yumi inap kisim helpim long dispela visen long bodi bilong Jisas i senis?

²⁴ Dispela visen long bodi bilong Jisas i senis em wanpela gutpela presen long Pita—na long yumi tu! Planti yia bihain em i stori long dispela gutpela samting em i lukim long dispela nait olsem piksa i makim Jisas bai kisim glori na kamap King long heven, Pita yet i wanpela bilong lain “i lukim long ai bilong [ol] yet, olsem em i bikman tru.” Dispela visen i bin strongim planti tok profet long Baibel na bilip bilong Pita long ol traim bai painim em bihain. (Ritim 2 Pita 1:16-19.) Em inap helpim yumi tu, olsem Pita, yumi laik stap gut long Bikman em Jehova i bin makim bilong bosim yumi, kisim skul long em, kisim tok bilong stretim yumi, na long pasin daun yumi bihainim pasin bilong em long olgeta de.