Stori long bekgraun bilong yu.

Papa bilong mi em i man bilong wokim ol su, na mama i bin wok long fam. Tasol mi laik kamap saientis. Ol naispela plaua, ol pisin, na ol binatang i stap klostu long haus i kirapim tru tingting bilong mi. Mi pilim olsem wanpela man i gat bikpela savetingting i bin wokim ol dispela samting.

So oltaim yu bin bilip long Krieta?

Nogat. Taim mi liklik yet, mi bin kisim tupela tingting olsem God i stap o nogat. Papa bilong mi i dai long hat atek, na mi tingting, ‘Bilong wanem Krieta husat i bin wokim planti naispela samting i larim ol man i karim pen na hevi na i dai?’

Olsem wanem? Stadi bilong yu long saiens i helpim yu long kisim bekim?

Pastaim nogat. Taim mi kamap saientis bilong baioloji, mi kirap stadi long dai i save kamap olsem wanem, na hau ol sel long bodi bilong yumi i save bihainim stret taim bilong ol long i dai. Dispela em i narapela kain long taim ol sel i save dai nating na i kamapim sua samting long bodi bilong yumi. Inap longpela taim ol saientis i no bin tingim tumas dispela, maski em i bikpela samting long helt bilong yumi.

Bilong wanem em i bikpela samting long ol sel long bodi i mas i dai long taim stret?

Insait long bodi bilong yumi i gat planti trilion liklik sel em yumi no inap lukim long ai. Olgeta bilong ol i mas i dai na nupela i mas kamap na kisim ples bilong ol. Olgeta sel i no save stap laip wankain taim; sampela i save dai insait long sampela wik tasol na nupela i kamap na kisim ples bilong ol, sampela narapela sel i save stap laip sampela yia. Ol samting long bodi bilong yumi i mas wok gut tru na bai ol sel i dai na kamap nupela long taim stret bilong en.

 Wanem hevi inap kamap?

Sampela wok painimaut i soim olsem taim ol sel i no dai long taim stret bilong en, man inap kisim sik atraitis o sik kensa. Na taim ol sel i dai paslain long taim stret bilong en long dai, man inap kisim sik Pakinson o sik Alsaima. Mi save mekim wok painimaut bilong painim rot bilong oraitim ol dispela sik.

Stadi bilong yu long pasin bilong ol sel long i dai i mekim wanem long yu?

Em i paulim tingting bilong mi. I klia tru olsem wanpela man husat i laik bai yumi stap helti, i bin wokim dispela gutpela samting. Olsem na mi mekim yet dispela askim, Bilong wanem ol man i save karim pen na hevi na i dai? Mi no inap painim bekim bilong dispela askim.

Tasol yu bilip olsem wanpela man i bin wokim ol sel em ol i dai stret long taim bilong en.

Yes. Dispela samting i narakain tru, tasol em i kamapim klia olsem man i gat bikpela savetingting i bin wokim dispela samting. Mi bilip olsem savetingting bilong God i as bilong dispela samting. Mi yusim ol strongpela maikroskop bilong stadi long planti samting i save stiaim pasin bilong ol sel long i dai. I gat ol samting i save kirapim ol sel long i dai insait long sampela seken tasol. Na tu, ol sel yet i save mekim sampela samting na dispela i kilim ol i dai. God i bin wokim gut tru dispela samting, na em samting yumi kirap nogut tru long en.

Yu gat ol askim long God na pen na hevi. Olsem wanem yu bin painim ol bekim?

Long 1991, 2-pela Witnes Bilong Jehova i kam long haus bilong mi, na mi askim ol long bilong wanem yumi save dai. Ol i soim long mi tok Baibel i mekim: “Long rot bilong wanpela man tasol sin i kamap long graun. Na sin i bringim dai i kam.” (Rom 5:12) Sapos namba 1 man i no bin sakim tok bilong God, em inap i stap oltaim. Wantu mi luksave olsem dispela i stret wantaim save mi bin kisim long wok painimaut bilong mi. Mi kliagut olsem God i no bin wokim ol manmeri bilong i dai. Klostu olgeta sel bilong yumi i save kamap nupela gen long olgeta taim, olsem na yumi inap i stap oltaim.

Wanem samting i mekim na yu bilip olsem Baibel em i Tok Bilong God?

Mi kisim save long tok Baibel i mekim long God long Song 139:16, olsem: “Yu lukim mi taim mama i no karim mi yet. Mi no kamap yet long graun, tasol yu raitim pinis [“olgeta hap skin bilong mi,” NW] long buk bilong yu.” Mi wanpela saientis na mi save stadi long ol rait insait long ol jin i stap long ol sel bilong bodi bilong yumi. Olsem wanem man bilong raitim song i bin save long kain rait olsem? Taim mi kisim sampela save moa long Baibel, mi bilip moa yet olsem God i as bilong ol tok bilong en.

Wanem samting i bin helpim yu long kliagut long tok bilong Baibel?

Wanpela Witnes Bilong Jehova i tok em i ken stadi long Baibel wantaim mi. Long dispela rot mi kisim save long as na God i larim pen na hevi i stap. Na tu, mi lain olsem God bai “pinisim dai tru” olsem Baibel i tok. (Aisaia 25:8) Em bai isi tru long Krieta bilong yumi i mekim bodi bilong yumi i wok gutpela olgeta bambai yumi ken stap laip oltaim.

Olsem wanem yu bin yusim save bilong yu long Baibel bilong helpim ol narapela?

Mi kamap wanpela Witnes Bilong Jehova long 1995, na kirap long dispela taim na i kam mi bin serim save mi kisim long Baibel wantaim ol narapela. Olsem, wanpela wanwok bilong mi i bel hevi tru taim brata bilong em i suasaid. Lotu bilong wanwok i tok olsem God i no save fogivim man i suasaid. Tasol mi soim long em tok Baibel i mekim long kirap bek. (Jon 5:28, 29) Em i mekim gut bel bilong em long save olsem Man Bilong Wokim yumi i save tingim tru yumi. Long ol kain taim olsem, mi pilim olsem wok bilong autim ol tok i tru bilong Baibel i givim bikpela amamas long mi, winim wok bilong saiens!