HAUS SPAIDA (Parasteatoda tepidariorum) bilong Amerika i save wokim web bilong en long wanpela kain glu we i strong inap long pas strong long wol bilong haus o i no strong tumas long pas long graun na i save trapim ol binatang i wokabaut long graun. Hau na dispela spaida inap wokim web i strong na long wankain taim web i no strong tumas long seim glu tasol?

Tingim: Spaida i save wokim web bilong en i pas strong long wol, o rup samting na em i mekim olsem long rot bilong pasim planti tret long wol o rup bilong holim web na dispela i strong inap long trapim binatang i flai. Tasol ol saveman long University of Akron, Ohio, Amerika, i painimaut olsem pasin bilong spaida long wokim web long graun em i narapela kain. Web em i wokim long graun em i no pasim planti tret long graun long holim strong, dispela i mekim na taim binatang i trap long web em i isi long spaida i kamautim web na pulim web na binatang i kam long en.

Wanpela nius em University of Akron i kamapim i tok ol saveman husat i painimaut dispela save long ol haus spaida “i laik wokim wanpela kain glu wankain olsem bilong haus spaida we ol inap yusim long mekim kain kain wok.” Ol saientis i tingting long wokim glu bilong yusim long ol ben-eid bilong pasim sua, na tu, bilong pasim ol bun i bruk.

Yu ting wanem? Save bilong haus spaida long wokim glu we i gat strong na long wankain taim i no gat strong i kamap long rot bilong evolusen? O wanpela i bin wokim?