PLANTI bilion man i bin ritim o harim stori bilong Baibel long hau yunives i bin kamap. Dispela stori we i bin stap 3,500 yia i kirap wantaim dispela tok olsem: “Bipo bipo tru God i mekim kamap skai na graun na olgeta samting i stap long en.”

Tasol planti man i no save olsem ol bikman bilong Kristendom, na tu, ol man husat i bilip olsem God i wokim graun insait long 6-pela de i gat 24 aua long en, ol i senisim tok Baibel i mekim long ol samting God i bin wokim na kamapim planti stori nating em Baibel i no as bilong en. Ol dispela stori i no stret wantaim ol tok bilong saiens. Maski ol dispela stori i no stap long Baibel, olkain stori olsem i mekim na ol man i ting ol tok bilong Baibel ol i stori nating.

Planti man i no save long stori bilong Baibel long ol samting God i bin wokim. Tasol Baibel i kamapim klia hau yunives i bin kamap na yumi ken bilip tru long ol tok bilong en. Na tu, ol dispela stori i stret wantaim wok painimaut bilong saiens. Bai yu amamas long kisim save long stori bilong Baibel long ol samting God i bin wokim!

Baibel i stori olsem Nambawan Bikpela em God i Gat Olgeta Strong i bin wokim olgeta samting. Em i husat na em i gat wanem ol pasin? Baibel i kamapim klia olsem Jehova i narapela kain long ol narapela god na ol god bilong ol lotu em planti man i save bihainim. Em i Man Bilong Wokim olgeta samting, tasol planti man i no save long Em.

• God em wanpela man i stap tru. Em i no wanpela strong nating we i no gat ol pasin bilong em, o em i flot nating i stap long yunives. Em i gat tingting, em i save pilim samting long bel, na em i tingting pinis long ol samting em i laik mekim.

• God i gat olgeta strong na savetingting. Dispela i kamap ples klia long olkain disain yumi lukim long ol samting i gat laip.

• God i wokim olgeta samting long heven na long graun. Olsem na i no stret em i gat bodi bilong ol man bikos Em yet i bin wokim olgeta samting na ol man tu. God em i spirit.

• God i no bin i stap long wanpela haptaim tasol. Oltaim em i stap na inap oltaim bihain em bai stap. Olsem na i no gat wanpela man i bin wokim em.

• God i gat nem na dispela nem i stap planti tausen taim long Baibel. Dispela nem em Jehova.

• God Jehova i laikim yumi ol manmeri na em i save lukautim yumi.

Baibel i tok God i wokim “skai na graun.” Dispela tok i no kamapim haptaim stret God i bin lusim long wokim yunives o hau em i wokim yunives. Tasol olsem wanem long bilip bilong ol man olsem God i wokim yunives insait long 6-pela de i gat 24 aua long en? Ol tingting kranki ol man i gat long ol stori bilong Baibel i as bilong dispela bilip na ol saientis i no sapotim. Skelim tok i tru em Baibel i mekim.

• Baibel i no sapotim tingting bilong ol man olsem God i bin wokim ol samting insait long ol de i gat 24 aua long en.

• Planti taim Baibel i yusim dispela tok “de” bilong makim ol narapela narapela haptaim. Sampela taim i no gat rot long save dispela haptaim i makim hamas aua o yia stret. Wanpela eksampel olsem em stori bilong Baibel long Buk Stat long God i wokim olgeta samting.

• Long stori bilong Baibel, dispela 6-pela de God i bin wokim ol samting i makim planti tausen yia.

• God i wokim pinis yunives na graun i no gat laip long en, bihain long en de namba 1 i kirap.

• I luk olsem dispela 6-pela de em ol longpela haptaim we God Jehova i redim graun bilong ol man i ken stap long en.

• Stori bilong Baibel long ol samting God i bin wokim i no pait wantaim tok bilong ol saiens long hamas yia yunives i bin stap.

Planti man em ol i no bilip long Baibel i wanbel long dispela tok olsem ol samting i gat laip i kamap long rot bilong ol samting i no gat laip. Ol i tok wanpela baktiria i save bruk tuhap i kamap na isi isi em i kamapim olgeta animal i gat laip em yumi lukim long nau. Dispela i makim olsem yumi ol man em bodi bilong yumi i save wok gut tru, yumi kamap long rot bilong ol baktiria, a?

Ol man husat i bilip long Baibel i bilip tu olsem ol samting i gat laip i kamap long rot bilong evolusen. Ol i bilip olsem God i kamapim namba 1 samting i gat laip long graun, na em i was gut na stiaim ol samting i kamap long rot bilong evolusen. Tasol Baibel i no mekim dispela tok.

• Baibel i stori olsem God Jehova i wokim olgeta kain diwai na animal samting, na tu, em i wokim man na meri em ol i gutpela olgeta na ol inap save long filings bilong ol yet, mekim pasin laikim, i gat savetingting, na mekim stretpela pasin.

• I gat ol senis i kamap long ol narapela narapela kain animal na diwai na gras samting God i bin wokim. Ol dispela senis i mekim na olgeta animal na diwai na gras samting insait long wanpela famili o grup a i no wankain olgeta. Planti taim ol i luk narapela kain tru.

• Tok bilong Baibel long ol samting God i bin wokim i no pait wantaim wok painimaut bilong saiens olsem i gat ol senis i kamap insait long famili o grup bilong wanpela kain animal o diwai o gras samting na dispela i mekim na ol i no luk wankain.

Long yia 1850 samting, wanpela saveman bilong Briten, Alfred Russel Wallace, i wanbel long tok bilong Charles Darwin long tingting bilong evolusen olsem ples ol samting i stap long en i save mekim sampela samting long jin bilong ol. Tasol dispela saveman bilong evolusen i bin tok: “Ol man i gat ai long lukluk na tingting bilong skelim na tingim gut ol samting, ol i ken tingim ol liklik sel tru, blut, graun olgeta, na i go inap long traipela yunives . . . , i soim olsem wanpela Man i gat bikpela save na tingting i stiaim ol samting.”

Klostu 2,000 yia paslain long Wallace i stap laip, Baibel i bin mekim dispela tok: “Kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong en i stap hait. Na ol i save long bikpela strong bilong en i stap oltaim na ol i save olsem tru tru em i God.” (Rom 1:20) Sampela taim yu mas lusim haptaim long tingim ol narakain gutpela samting God i wokim, olsem ol lip bilong gras samting i go inap long ol planti milion sta samting i stap long yunives. Yu inap lukim ol samting God i bin wokim na yu save olsem i gat Krieta i stap.

Ating bai yu askim olsem, ‘Sapos i gat God i gat pasin laikim i stap na em i bin wokim olgeta samting, wai na em i larim pen na hevi i stap? Ating em i no laik helpim yumi ol man? Wanem samting bai painim yumi long bihain?’ Baibel i kamapim planti narapela stori em ol tok i tru, tasol tingting bilong ol man na ol tok giaman bilong lotu i haitim dispela tok i tru long planti manmeri. Ol lain i bin wokim dispela nius, em ol Witnes Bilong Jehova, ol bai amamas long helpim yu skelim ol tok i tru bilong Baibel na yu inap kisim sampela save moa long Krieta na samting bai painim ol manmeri long bihain.