BAIBEL I TOK WANEM?
Samting i Painim Ol Man i Dai Pinis
Ol lotu i kamapim narapela narapela tingting long samting i painim ol man taim ol i dai. Tasol Baibel i helpim yumi long kisim stretpela save long dispela samting.
I gat wanpela hap bilong man olsem tewel i no save dai?
OL MAN I TOK
Planti man i bilip olsem i gat wanpela hap bilong man olsem tewel i no save dai. Na sampela i bilip olsem taim man i dai, em i save kamap nupela gen long narapela bodi. Na ol narapela i ting olsem taim man i dai, tewel bilong em i go long heven o helpaia.
BAIBEL I TOK
Yumi nogat wanpela tewel i no save dai. Planti taim Baibel i stori olsem taim man i dai, em i pinis olgeta. Profet Esekiel em wanpela bilong ol man God i makim long raitim Baibel i tok, wanpela rot bilong givim strafe long man em long kilim em i dai. Na tu, Baibel i tok taim man i dai, “bodi bilong [en] i dai pinis.” (Wok Pris 21:11) I klia tru olsem Baibel i no skulim yumi olsem ol man i dai pinis i gat tewel i no save dai.
“Man i mekim sin, em tasol bai i dai.”—Esekiel 18:20.
Yu ting man i gat tupela hap bilong en, olsem bodi na tewel?
OL MAN I TOK
Yumi gat tupela hap, em bodi na tewel. Olsem na taim man i dai, tewel i lusim bodi na i go stap long narapela hap.
BAIBEL I TOK
Baibel i stori long wanpela meri i karim “ol lain pikinini,” dispela i makim ol man i pulim win na ol i stap laip. (Stat 46:18) Baibel i no tok em i karim ol pikinini i gat tupela hap long ol, olsem bodi na tewel, nogat. Long Baibel, dispela tok “man” long tok Hibru inap makim “samting i gat laip.” Na sampela taim ol i yusim dispela tok bilong makim ol animal. Na tu, Baibel i stori olsem ol man i nidim kaikai bilong i stap laip. (Lo 12:20) Sapos man i gat tupela hap olsem bodi na tewel, orait tupela wantaim i mas kisim kaikai na pulim win bilong i stap laip. Long Baibel, dispela tok “man” i makim man i stap laip, na em inap wokim tingting na em i gat ol pasin bilong en.
Em i karim “ol lain pikinini . . . inap 16 olgeta.”—Stat 46:18.
Wanem samting i painim ol man i dai pinis?
BAIBEL I TOK
“Bai yu no inap mekim wok o tingting o kisim gutpela tingting na save long ples bilong ol man i dai pinis.” (Saveman 9:10) Na tu, Baibel i tok taim ol man i dai, “ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.” (Song 146:4) Ol man i dai pinis i no inap mekim wanpela samting, olsem na planti taim Baibel i tok i olsem ol i “slip tasol.”—Matyu 9:24.
BILONG WANEM EM I BIKPELA SAMTING?
Taim ol man yu laikim i dai, bai yu laik kisim save long bekim bilong ol dispela askim: Ol man i dai pinis i stap we? Ol inap helpim o mekim nogut long yumi? Yu ting ol i karim pen na hevi? Taim yumi kisim save long tok bilong Baibel olsem ol man i dai pinis i no inap mekim wanpela samting, bel bilong yumi i stap isi, long wanem, yumi save olsem ol man yumi laikim i dai pinis i no karim pen na hevi long wanpela hap. Na tu, yumi kisim bel isi long save olsem Jehova i tok promis long kirapim bek ol man i dai pinis long nupela taim long bihain, na bai yumi inap bungim ol.—Aisaia 26:19.
“Ol man i dai pinis, ol i no inap save long wanpela samting.”—Saveman 9:4, 5.
Ating Yu Bai Laikim Tu
WASTAUA
Tok Giaman Olsem God Em i Man Nogut
Planti i bilip olsem God i save givim strafe long ol man bilong mekim sin oltaim otaim. God i save mekim pasin nogut? Wanem samting i painim yumi taim yumi dai?
BEKIM BILONG OL ASKIM BILONG BAIBEL
Kirap Bek Em Wanem Samting?
Ating yu bai kirap nogut long husat bai kirap bek long bihain.
BEKIM BILONG OL ASKIM BILONG BAIBEL
Taim Man i Dai Em i Gat Wanpela Spirit i Stap Laip Yet?
Yu ting i gat wanpela spirit i stap insait long yu? Yu ting em bai stap laip yet taim yu dai?
