Ol marit i mas soim pasin bilong tok tenkyu na bai marit bilong ol i stap strong. Tasol planti man marit na meri marit i no tingim moa ol gutpela pasin bilong poroman bilong ol, na ol i no gat pasin bilong tok tenkyu. Long buk Emotional Infidelity, wanpela man bilong givim skultok long ol marit i tok planti i go lukim em i “tingting planti long ol samting em poroman marit i no mekim, na ol i no tingim ol samting i kamap. Ol i kam long ofis bilong mi long tokim mi long ol senis ol i mas mekim, na i no long ol samting i mas stap wankain. Popaia olgeta i mekim em ol i no kamapim pasin laikim long rot bilong tok tenkyu.”

Hau bai yu na poroman marit bilong yu i abrusim dispela hevi?

Pasin bilong tok tenkyu inap daunim sampela hevi bilong marit. Taim man marit na meri marit i wok strong long luksave na tok tenkyu long gutpela pasin bilong narapela narapela, dispela bai strongim pasin bilong ol long pas gut wantaim. Sapos ol marit i gat pasin bilong tok tenkyu, dispela inap daunim ol bikpela hevi bilong marit.

Ol meri marit. Buk Emotional Infidelity i tok: “Planti meri i save lusim tingting long bikpela wok man marit i mekim bilong lukautim famili.” Long sampela kantri, dispela hevi i save kamap long ol famili we man na meri wantaim i wok mani.

Ol man marit. Planti taim ol man i no save tingim hatwok meri i mekim bilong lukautim famili, olsem wok mani, mekim bikpela long ol pikinini, o ol wok bilong haus samting. Fiona * i marit inap 3-pela yia i tok: “Yumi olgeta i save mekim ol popaia, na taim mi popaia, mi bel hevi long mi yet. Olsem na taim man bilong mi i tok amamas long ol wok mi mekim long haus, mi luksave olsem em i laikim mi maski mi gat ol popaia. Na tu, mi save olsem i gat ol man i tingim mi na dispela i mekim mi amamas!”

Taim man o meri i pilim olsem narapela i no tingim em, dispela inap bagarapim pasin bilong stap gut long poroman marit. Meri marit Valerie i tok: “Taim poroman marit bilong yu i no tok tenkyu long yu, dispela inap mekim na yu pas moa long wanpela i soim olsem em i tingim yu.”

Luksave long ol gutpela pasin bilong poroman marit. Long dispela wik, luksave long ol gutpela pasin bilong poroman marit bilong yu. Na tu, luksave long ol gutpela wok poroman marit i save mekim long haus, ating em ol samting yu no tingim tumas. Long pinis bilong wik, raitim lista bilong (1) ol gutpela pasin bilong poroman marit bilong yu em yu laikim, na (2) ol samting poroman marit i mekim bilong helpim famili.—Stiatok bilong Baibel: Filipai 4:8.

Bilong wanem em bikpela samting long tingim ol gutpela pasin bilong poroman marit? Meri marit Erika i tok: “Bihain long yu marit inap sampela yia, em isi long yu no tingim ol gutpela pasin bilong poroman marit bilong yu. Yu lusim tingting long ol gutpela pasin bilong em na tingim moa ol popaia bilong em.”

Askim yu yet: ‘Mi save tingim ol gutpela wok bilong poroman marit bilong mi?’ Olsem, sapos man bilong yu i stretim ol samting arere long haus, yu ting em wok em i mas mekim na yu no tok tenkyu long em? Sapos yu wanpela man marit, yu ting ol wok meri i mekim bilong lukautim ol pikinini em samting em i mas mekim na yu no gat wok long tok tenkyu long em? Putim mak long luksave na tok tenkyu long olgeta gutpela wok poroman marit i mekim bilong helpim famili bilong yu.—Stiatok bilong Baibel: Rom 12:10.

Oltaim tok tenkyu. Baibel i tok: “Kamapim tenkyu bilong yupela,” olsem na ol pasin bilong yumi i mas soim olsem yumi tok tenkyu. (Kolosi 3:15) I gutpela long wok strong long kisim pasin bilong tok tenkyu long poroman marit bilong yu. Man marit James i tok: “Taim meri bilong mi i tok tenkyu long ol wok mi mekim, dispela i kirapim mi long mekim sampela moa wok olsem gutpela man marit na long strongim marit bilong mi.”—Stiatok bilong Baibel: Kolosi 4:6.

Ol marit husat i save tok tenkyu long narapela narapela i save strongim marit bilong ol. Man marit Micheal i tok: “Mi bilip olsem planti marit i ken stap strong sapos ol i gat pasin bilong tok tenkyu long poroman marit long ol gutpela pasin na wok em i mekim. Na taim ol hevi i kamap, ol bai i no inap tingting long lusim poroman marit, long wanem, ol bai tingim ol gutpela pasin bilong ol.”