SAMPELA MAN I TOK

Ol Rom i hangamapim Jisas long kruse em ol i wokim long tupela hap diwai, narapela diwai i slip antap long narapela diwai.

BAIBEL I TOK

Ol i nilim Jisas “long wanpela diwai” na kilim em i dai. (Aposel 5:30, Buk Baibel) Ol man bilong raitim Baibel i yusim tupela tok Grik bilong makim olsem Jisas i bin dai long pos o diwai. Buk Crucifixion in Antiquity i kamapim olsem tok Grik stau·rosʹ i makim “wanpela pos, na em i no wankain long kruse.” Na tok Grik xyʹlon long Aposel 5:30 i makim “wanpela hap diwai o wanpela hap pos em ol Rom i save nilim ol man long en bilong kilim ol i dai.” *

Na tu, Baibel i kamapim klia olsem taim ol Rom i kilim i dai Jisas, ol i bihainim lo bilong lain Israel bilong bipo. Lo i tok: “Sapos wanpela man i bin mekim bikpela rong na long dispela as ol i kilim em i dai na hangamapim bodi bilong em long wanpela pos, . . . bodi i hangamap i stap long diwai em i samting nogut long ai bilong God.” (Lo 21:22, 23) Kristen aposel Pol i toktok long dispela lo taim em i tok Jisas “i kisim ples bilong yumi na stap olsem man bilong bagarap, long wanem, Rait Holi i tok: ‘Olgeta man i hangamap long pos [xyʹlon], ol i man bilong bagarap tasol.’” (Galesia 3:13) Tok bilong Pol i kamapim klia olsem Jisas i dai long pos, na i no long kruse.

“Ol i hangamapim dispela man [Jisas] long wanpela diwai, na long dispela pasin ol i kilim em i dai.”—Aposel 10:39, Buk Baibel.

BAIBEL I TOK

Baibel i no stori olsem ol Kristen bilong pastaim i putim kruse olsem mak bilong lotu Kristen. Tasol long dispela taim, ol Rom i yusim kruse olsem mak bilong ol god bilong ol. Klostu 300 yia bihain long Jisas i dai, Empera Konstantin bilong Rom i yusim kruse olsem mak bilong ol ami bilong em, na bihain ol lotu i tok ol i Kristen i yusim kruse bilong mekim lotu.

Ol haiden i yusim kruse bilong lotu long ol god bilong ol, olsem na yu ting ol disaipel bilong Jisas bai yusim kruse long lotu long God tru? Nogat. Long wanem, ol i save olsem God i no orait long ol man i “wokim piksa” bilong wanpela samting na lotu long en, na tu, ol Kristen i mas “ranawe long pasin bilong lotuim imis.” (Lo 4:15-19; 1 Korin 10:14) “God em i wanpela Spirit” na yumi no inap lukim em. Olsem na ol Kristen bilong bipo i no bin wokim piksa bilong ol samting ol i lukim na bai ol inap i go klostu long God. Ol i lotu long em “long strong bilong holi spirit na long pasin i tru,” dispela i makim olsem holi spirit bilong God i stiaim ol na Baibel i as bilong olgeta tok ol i autim.—Jon 4:24.

“Ol man i lotu tru long Papa, ol bai lotuim em long spirit na long pasin i tru.”—Jon 4:23.

SAMPELA MAN I TOK

“I stret long rispek na givim ona long ol samting i stap olsem mak long wanpela man i dai bilong kisim bek yumi. . . . Sapos yumi givim ona long ol dispela samting, orait dispela i soim olsem yumi lotuim dispela man.”—New Catholic Encyclopedia.

BAIBEL I TOK

Ol Kristen i mas bihainim Jisas, long wanem, dai bilong em i opim rot long God i ken fogivim sin bilong ol, ol i ken go klostu long God, na ol inap kisim laip oltaim. (Jon 3:16; Hibru 10:19-22) Ol i mas mekim ol samting bilong soim olsem ol i bilip long Jisas. Baibel i tok: “Bilip i stap nating, na i no kamapim ol gutpela wok, orait dispela bilip i dai pinis.” (Jems 2:17) Olsem na ol Kristen i mas mekim wanem bilong soim olsem ol i bilip long Jisas?

Baibel i tok: “Pasin laikim bilong Krais i kirapim mipela, long wanem, mipela i save pinis olsem wanpela man i dai bilong helpim olgeta man . . . Em i mekim olsem bai ol man i stap laip ol i no ken bihainim laik bilong ol yet, nogat. Ol i mas bihainim laik bilong dispela man husat i kisim ples bilong ol na i dai na i kirap bek tu.” (2 Korin 5:14, 15) Pasin laikim bilong Krais i mas kirapim ol Kristen long mekim ol senis long laip bilong ol na bihainim pasin bilong em. Long dispela rot, ol i daun na bihainim Jisas na ol i no ting olsem ol i mas putim wanpela samting i stap olsem mak bilong lotu.

“Laik bilong Papa bilong mi i olsem, man i luksave long Pikinini na bilip long em, dispela man i mas kisim laip oltaim.”—Jon 6:40.