BERI bilong Pollia condensata i stap long planti hap bilong Afrika, na skin bilong en i gat strongpela blu kala we i no stap long ol narapela prut. Tasol dispela beri i no gat blu ing bilong kamapim kala. Hau na skin bilong en i gat blu kala?

Tingim: Aninit long skin bilong beri i gat ol liklik tret i slip stret long lain. Wanpela lain tret i stap antap long narapela lain tret na i kamapim stail i luk olsem sel bilong demdem. Ol dispela tret i no gat blu kala. Stail bilong wanpela lain tret long stap antap long narapela lain tret i kamapim blu kala. Bikpela hap long skin bilong beri i gat blu kala. Tasol sampela liklik kona bilong en i gat ol narapela kala olsem grin, pink, o yelo. Ol dispela kala i soim olsem stail bilong wanpela lain tret long stap antap long narapela lain tret i no wankain long ol narapela hap bilong beri. Sapos yumi skelim gut kala i stap long skin bilong ol beri, yumi bai luksave olsem ol hap hap kala i join wantaim na kamapim wanpela kala, kain olsem ol kala long skrin bilong kompiuta.

Pollia beri i no gat ing bilong kamapim kala, olsem na wankain kala bilong skin i save stap yet taim em i mau na pundaun. Maski sampela beri i stap winim 100 yia pinis, kala bilong ol i luk wankain olsem ol beri bilong nau! Ol saveman i tok, dispela beri i no bilong ol man long kisim olsem kaikai, tasol ol pisin i laikim tru dispela beri.

Ol saientis i skelim olsem stail bilong Pollia beri inap stiaim ol long wokim kala we i no inap pinis kwik, na tu, ol inap wokim ol gutpela pepa.

Yu ting wanem? Braitpela kala bilong Pollia beri i kamap long rot bilong evolusen? O wanpela i bin wokim?