“MI NO inap tru long autim tok long ol haus!” Wok bilong autim tok long ol man ol i no save long ol i bin kirapim planti nupela sumatin bilong Baibel long mekim kain tok olsem. Tasol man i mekim dispela tok, em man i save mekim ol pablik tok na wanpela tisa bilong Baibel ol i kolim olsem pilgrim.

Planti man em ol i save ritim Zion’s Watch Tower, ol i bin lusim lotu bilong ol na ol i laik tru long bung wantaim ol arapela husat i gat wankain laik long skelim ol tok i tru bilong Baibel. Nius Watch Tower i bin kirapim ol man long painim ol arapela husat i gat wankain bilip na ol i mas bung wantaim olsem wanpela grup bilong stadi long Baibel. Kirap long 1894, Sosaiti Was Taua i salim ol wasman raun i go bung wantaim ol grup i laik bai wanpela i kam visitim ol. Bihain ol i givim nem pilgrim long ol dispela wasman. Em ol man i save wok strong, na ol i makim ol bikos ol i gat pasin daun, ol i gat save long Baibel, mekim gut ol tok na wok tisa, na ol i bilip long pe bilong baim bek man. Ol i visitim ol grup inap 1-pela o 2-pela de tasol. Fes taim planti Sumatin Bilong Baibel i raun long autim tok, em taim ol i tilim pepa bilong singautim ol man long kam harim pablik tok bilong wanpela pilgrim. Pilgrim Hugo Riemer, bihain em i kamap memba bilong Gavening Bodi, i bin mekim pablik tok long wanpela skul na bihain em i bekim ol askim bilong Baibel i go inap biknait. Em i taiet na amamas, tasol em i tok miting i “naispela tru.”

Nius The Watch Tower i tok “nambawan gutpela wok” em ol visit bilong ol pilgrim i kamapim em long strongim “ol lain i bilip.” Bilong mekim olsem ol i mekim ol miting long haus bilong ol wanbilip. Ol Sumatin Bilong Baibel long ol hap i stap klostu, ol i kam na harim ol tok na mekim ol askim na kisim ol bekim. Bihain ol i kaikai. Taim Maude Abbott i yangpela gel, em i go long harim tok long moning, bihain ol i bung ausait we wanpela longpela tebol i stap. Maude i tok: “Planti gutpela kaikai i stap long tebol, olsem pik, kakaruk, kain kain bret, pai, na kek! Olgeta i kaikai planti, na long 2 klok mipela bung gen bilong harim narapela tok.” Tasol Maude i tokaut olsem, “Long dispela taim olgeta i aislip.” Longtaim pilgrim, Benjamin Barton, i tok: ‘Sapos mi bin kisim ol kaikai ol lain i givim mi, ating wok pilgrim bilong mi bai pinis longtaim.’ Bihain hetkota long Brooklyn i salim toksave long ol sista olsem mobeta ol i givim pilgrim ol nomol kaikai “em ol yet i save kaikai long olgeta de,” na stretim “hap we pilgrim i ken slip gut.”

Ol pilgrim i mekim gut wok tisa, ol i yusim ol piksa o arapela samting ol i gat bilong mekim tok i kirapim tru tingting bilong ol man. Ol tok bilong R. H. Barber “i save kirapim tru ol man.” W. J. Thorn, i mekim tok olsem “tumbuna papa bilong bipo tru.” Wanpela taim Shield Toutjian i raun long kar Model A Ford, na em i singaut, “Stopim kar!” Em i kalap i go daun long kar, na pikim  sampela plaua na kirap stori long ol samting Jehova i wokim.

Wok pilgrim i gat planti hatwok long en, moa yet long ol lain i gat bikpela krismas. Tasol nambawan samting i traim sampela, em senis i kamap long wok bilong ol. Nau ol i mas go pas long mekim wok autim tok long ol haus. Watch Tower bilong Mas 15, 1924, i tok “wanpela bikpela wok” bilong ol trupela Kristen em long “autim tok bilong Kingdom. Mipela salim ol pilgrim i go long mekim dispela wok.”

Sampela pilgrim i no amamas long dispela senis, ol i lusim wok, na sampela i kamapim lain lotu bilong ol yet. Robie D. Adkins i stori long wanpela pilgrim em hapman bilong mekim ol tok, dispela pilgrim i bel hevi na tok: “Mi save long autim tok long stes tasol. Mi no inap tru long autim tok long ol haus!” Brata Adkins i tok: “Narapela taim mi lukim dispela pilgrim, em long kibung long 1924, long Columbus, Ohio. Em i bel hevi na sanap wanpis aninit long wanpela liklik diwai, em i luk sori namel long planti tausen brata i amamas. Mi no bin lukim em gen. Sotpela taim bihain em i lusim oganaisesen.” Tasol “planti brata i amamas na karim ol buk i go long kar bilong ol,” ol i amamas long autim tok long ol haus.—Apo. 20:20, 21.

Planti pilgrim i givim bel tru long wok, maski pret bilong ol i wankain olsem ol man ol i wok long trenim ol. Pilgrim i mekim tokples Jeman, Maxwell G. Friend (Freshchel), i tok: “Dispela wok bilong pilgrim i kamapim planti blesing moa.” Pilgrim John A. Bohnet i tok klostu olgeta brata i amamas long autim tok bilong Kingdom. Em i tok, planti “i gat laik tru long go pas long dispela wok.”

Inap planti yia, ol brata i mekim wok olsem wasman raun i bin strongim ol brata na sista. Longtaim Witnes Norman Larson i tok: “Taim mi liklik mangi, mi luksave olsem wok pilgrim i karim gutpela kaikai. Ol i stiaim mi long gutpela rot.” I kam inap nau ol wasman raun i daunim laik bilong ol yet na helpim ol wanbilip long tok, “Mipela inap autim tok long ol haus!”

[Rait long pes 32]

Mipela i amamas tru taim pilgrim i kam!

[Piksa long pes 31]

Benjamin Barton i gat 170 stop long raun bilong em

[Piksa long pes 32]

Walter J. Thorn em i wanpela pilgrim ol i kolim olsem Paps bikos em i gat pasin olsem wanpela papa i bihainim Krais

[Piksa long pes 32]

J. A. Browne i go long Jameka long 1902 na mekim wok pilgrim bilong strongim 14 liklik grup

[Piksa long pes 32]

Wok pilgrim i strongim bilip na pasin wanbel bilong ol Kristen, na i helpim ol brata long pas gut wantaim oganaisesen