LUKLUK LONG OL STA: Sampela man i bilip olsem hap we sta i stap long en taim man i bon dispela i makim samting bai painim em long bihain. Ol i save ritim horoskop bilong painimaut wanem samting bai painim ol bihain na helpim ol long wokim ol disisen.

FENG SHUI: Ol narapela i bilip olsem sapos ol i disainim haus bilong ol long wanpela kain stail, dispela bai mekim na ol i kisim gutpela sindaun. Lo Wing a i stap long Hong Kong i tok: “Wanpela saveman bilong feng shui i tokim mi long putim wanpela spesel kristal long wanpela hap bilong stua bilong mi na dispela bai helpim mi long kisim planti mani moa.”

LOTUIM OL TUMBUNA: Sampela i bilip olsem ol i mas lotuim ol tumbuna bilong ol i dai pinis o ol god na bai ol i ken lukautim ol na givim blesing long ol. Van i stap long Vietnam i tok: “Mi bilip olsem taim mi lotuim ol tumbuna bilong mi, mi bai stap gut long nau na mi na ol pikinini bai gat gutpela sindaun long bihain.”

KAMAP NUPELA GEN LONG NARAPELA BODI: Planti man i bilip olsem taim wanpela man i dai, em i save kamap nupela gen long narapela bodi, dispela i save kamap gen na gen planti taim. Ol i bilip olsem ol gutpela samting o samting nogut i painim ol long nau, em bikos long ol samting i bin painim ol long narapela laip bilong ol long pastaim.

Planti i tingim kain bilip olsem i insait long wok bilong ol spirit nogut. Planti man i tok ol i no bilip long dispela kain pasin, tasol ol i save lukluk yet long ol mak long ol han, horoskop, Wija bot, kas tarot, na kain ol samting olsem. Ol i pilim olsem ating ol dispela pasin bai helpim ol long save long ol samting bai painim ol long bihain.

Yu ting ol man i trastim ol dispela bilip na pasin ol i gat gutpela laip na ol bai kisim gutpela sindaun long bihain?

Tingim stori bilong Hào, em i stap long Vietnam. Em i save lukluk long ol sta, mekim feng shui, na lotuim ol tumbuna na bai ol i stiaim em. Dispela i bin helpim em? Hào i tok, “Bisnis bilong mi i bagarap, mi gat bikpela dinau, kros pait i kamap insait long famili, na bel na tingting bilong mi i bagarap.”

Qiuming bilong Taiwan, em tu i bilip long pasin bilong lukluk long sta, kamap nupela gen long narapela bodi, bilip olsem God i makim pinis ol samting bai painim man, feng shui, na pasin bilong lotuim ol tumbuna. Bihain long em i skelim gut ol dispela samting, em i tok: “Mi luksave olsem ol dispela bilip na kastam ol i pait wantaim na i paulim tingting. Mi painimaut olsem ol tok ol man bilong lukluk long sta i kamapim, planti taim ol dispela tok i giaman. Long dispela bilip long man i kamap nupela gen long narapela bodi—sapos yu no inap tingim ol samting yu bin mekim long laip bilong yu bilong pastaim—hau bai yu inap senis na mekim ol gutpela samting long nupela laip bilong yu?”

Hào, Qiuming, na planti narapela i bin luksave olsem, ol dispela bilip olsem God i makim pinis ol samting bai painim man, pasin bilong lukluk long ol sta, lotuim ol tumbuna, o kamap nupela gen long narapela bodi, i no makim kain sindaun em yumi bai kisim long bihain. Yu ting dispela i makim olsem yumi no inap mekim sindaun bilong yumi i kamap gutpela long bihain?

Planti man i ting olsem bilong kisim gutpela sindaun long bihain, ol i mas wok strong long kisim bikpela skul na mani kago. Tasol wanem samting i kamap long sampela bilong ol em ol i wokim dispela disisen?