Mary na man bilong em John, a ol i stap long wanpela kantri we planti Filipino i kam wok long dispela kantri na em isi long autim gutnius long ol. Long taim bilong COVID-19 pendemik, Mary i kirapim Baibel stadi wantaim planti narapela em ol i stap long kantri bilong em, na tu, long ol narapela kantri. Hau em i mekim olsem?

Mary i save askim ol Baibel sumatin bilong em olsem, “Yu save long wanpela husat i laik stadi long Baibel?” Sapos ol i tok yes, em i save askim ol long introdusim em long ol. Taim em i mekim dispela simpol askim, planti taim dispela i save kamapim gutpela samting. Bilong wanem? Long wanem, planti manmeri husat i laikim Tok Bilong God, ol i amamas long serim save ol i kisim wantaim ol narapela wanfamili na ol pren bilong ol. Wanem samting i kamap taim Mary i givim dispela askim?

Jasmin em Baibel sumatin bilong Mary, em i introdusim Mary long 4-pela narapela em ol i laik stadi long Baibel. Wanpela bilong ol em Kristine, em i enjoim tru Baibel stadi bilong em, olsem na em i askim Mary long stadi wantaim em tupela taim long wanpela wik. Taim Mary i askim em sapos em i save long sampela em ol i laik stadi long Baibel, Kristine i tok, “Yes, mi bai introdusim ol pren bilong mi long yu.” Insait long sampela wik tasol, Kristine i introdusim Mary long 4-pela pren bilong em, em ol i laik stadi. Bihain Kristine i introdusim Mary long ol narapela pren bilong em, na sampela bilong ol i kirap long stadi na ol i introdusim Mary long ol narapela pren bilong ol.

Kristine i laik bai ol famili bilong em long Filipins i kisim save tu long Baibel. So em i toktok long pikinini meri bilong em Andrea. Pastaim Andrea i tingting olsem, ‘Ol Witnes ol i wanpela kalt lotu, ol i no save bilip long Jisas, na ol i save yusim tasol Olpela Testamen.’ Tasol bihain long wanpela stadi, em i luksave olsem tingting em i gat long ol Witnes i no stret. Long taim bilong stadi em i save tok, “Sapos Baibel i mekim dispela tok, orait em mas tru!”

Bihain Andrea i introdusim Mary long tupela pren bilong em na wanpela wanwok bilong em na ol tu i kirap long stadi. Na tu, Mary i no save olsem Angela—em anti bilong Andrea—husat i aipas, em i wok long putim yau long stadi bilong ol. Wanpela taim Angela i askim Andrea long introdusim em long Mary, na em i askim Mary long stadi wantaim em long Baibel. Angela i amamas long ol tok em i lainim. Insait long wanpela mun, em i holim planti skripsa long tingting na em i askim long stadi 4-pela taim long wanpela wik! Andrea i helpim Angela na em i kirap insait long ol  miting bilong kongrigesen long rot bilong vidio konferens.

Taim Mary i kisim save olsem Joshua em man bilong Kristine i wok long sindaun na putim yau long stadi bilong tupela, em i askim sapos Joshua i laik join long stadi. Joshua i tok: “Mi bai putim yau, tasol no ken givim wanpela askim long mi, sapos yu givim askim long mi, mi bai lusim na go.” Insait long 5-pela minit tasol bilong stadi, em i givim planti askim moa winim ol askim em Kristine i save kamapim na em i laik stori yet long ol tok bilong Baibel.

Wanpela simpol askim tasol Mary i kamapim i mekim na em i gat planti Baibel stadi. Em i stretim rot na bai ol wanbilip Witnes i helpim sampela bilong ol dispela Baibel sumatin. Mary i gat 28 Baibel stadi long 4-pela narapela narapela kantri.

Jasmin em fes sumatin bilong Mary em yumi stori long em long dispela ekspiriens, em i kisim baptais long Epril 2021. Kristine i kisim baptais long Me 2022, na em i go bek long Filipins bilong stap wantaim famili bilong em. Tupela narapela sumatin em Kristine i bin introdusim ol long Mary, tupela tu i baptais. Angela i kisim baptais sampela mun bihain, na nau em i mekim wok painia oltaim. Joshua em man bilong Kristine na pikinini meri bilong tupela Andrea, na sampela narapela Baibel sumatin, olgeta i wok long kamap strong long bilip.

Long taim bilong ol aposel, planti em ol i harim gutnius, ol i autim tok long ol wanfamili na ol pren bilong ol. (Jon 1:​41, 42a; Apo. 10:​24, 27, 48; 16:​25-33) I gutpela yu askim Baibel sumatin bilong yu na ol narapela husat i gat laik long harim tok olsem, “Yu save long wanpela husat i laik stadi long Baibel?” Sapos yu tu i kamapim kain simpol askim olsem, orait yu inap painim planti manmeri em ol i laik stadi long Baibel.