1. Sapos wanpela man i laik wokim haus, pastaim em i mas mekim wanem?

PIKSAIM long tingting olsem wanpela man i laik wokim haus. Em i save long wanem kain haus em i laik wokim. Yu ting i stret sapos em i kirap tasol na go long stua na baim ol saplai na kirapim wok? Nogat. Paslain long wok i kirap, i gat wanpela bikpela samting em i mas mekim—em i mas skelim gut hamas mani em bai tromoi bilong wokim haus. Wai? Em i mas save sapos mani bilong em inap long baim olgeta samting em i nidim bilong pinisim haus. Sapos em i skelim gut ol dispela samting paslain long em i wokim haus, em bai pinisim gut nupela haus bilong em.

2. Olsem Luk 14:27-30 i kamapim, yu mas skelim gut wanem samting paslain long yu kisim baptais?

² Olsem wanem? Yu laikim Jehova na tenkyu long em na dispela i kirapim laik bilong yu long kisim baptais? Sapos olsem, orait yu mas mekim wankain disisen olsem man i laik wokim haus. Wai na yumi inap tok olsem? Skelim tok bilong Jisas long Luk 14:27-30. (Ritim.) Jisas i stori long ol samting man i mas mekim taim em i kamap disaipel. Sapos yumi laik kamap disaipel bilong Jisas, yumi mas redi long karim hevi na lusim sampela samting—dispela em “pe” bilong stap disaipel. (Luk 9:23-26; 12:51-53) Olsem na paslain long yu kisim baptais, yu mas skelim gut olgeta samting yu mas mekim taim yu kamap disaipel. Taim yu mekim olsem, yu bai redi long mekim yet wok bilong God bihain long yu kisim baptais.

3. Long dispela atikol, yumi bai stori long wanem samting?

³ Taim yu kamap disaipel bilong Krais, yu ting gutpela samting bai kamap maski yu karim pen na hevi? Yes! Baptais i opim rot long yu inap kisim planti moa blesing long nau na long  bihain. Orait yumi ken stori long sampela bikpela askim long sait bilong baptais. Dispela bai helpim yu long bekim dispela askim, “Mi redi long kisim baptais?”

4. (a) Dediket em wanem samting? (b) Olsem Matyu 16:24 i kamapim, taim yu “givim baksait” long ol laik bilong yu yet, dispela i makim wanem samting?

⁴ Dediket em wanem samting? Paslain long yu kisim baptais, yu mas dediket. Taim yu dediket, dispela i makim olsem yu beten long Jehova na tokim em olsem yu bai yusim laip olgeta bilong yu long mekim laik bilong em inap oltaim oltaim. Taim yu dediketim yu yet long God, yu “givim baksait” long ol laik bilong yu yet. (Ritim Matyu 16:24.) Yu bilong Jehova, na dispela em wanpela spesel blesing. (Rom 14:8) Yu tokim em olsem kirap long nau na i go, yu bai daunim ol laik bilong yu na putim tingting olgeta long mekim wok bilong em. Taim yu dediket, yu mekim strongpela tok promis long God. Jehova i no fosim yumi long mekim kain tok promis olsem. Tasol em i laik bai yumi mas truim tok promis bilong yumi.—Sng. 116:12, 14.

5. Olsem wanem dediket i no wankain long baptais?

⁵ Olsem wanem dediket i no wankain long baptais? Taim yu dediket, dispela em samting yu yet i mekim na ol narapela i no save long en; em samting i kamap namel long yu na Jehova. Tasol taim yu kisim baptais, ol narapela bai save bikos ol lain i save kisim baptais long taim bilong kibung. Baptais bilong yu i soim olsem yu dediket pinis long Jehova. * Baptais i soim klia olsem yu laikim Jehova long bel olgeta, laip olgeta, tingting olgeta, na strong olgeta bilong yu na yu strongim tingting long mekim wok bilong em inap oltaim oltaim.—Mak 12:30.

6-7. Olsem 1 Pita 3:18-22 i kamapim, i gat wanem 2-pela risen na yumi mas kisim baptais?

⁶ Yu ting i gat gutpela risen na yumi mas kisim baptais? Tingim tok i stap long 1 Pita 3:18-22. (Ritim.) Taim Noa i wokim sip, dispela i soim olsem em i bilip long God, na olsem tasol taim yu kisim baptais, dispela i soim olsem yu dediket pinis long Jehova. Tasol yu ting i gat gutpela risen na yumi mas kisim baptais? Yes. Pita i kolim ol risen. Namba 1: Baptais i “kisim bek [yu].” Baptais inap kisim bek yumi sapos yumi soim olsem yumi bilip long Jisas, yumi bilip olsem em i dai bilong helpim yumi, na em i kirap bek na go long heven, na nau “em i stap long rait han bilong God.”

⁷ Namba 2: Taim yumi kisim baptais, “maus bilong bel bilong [yumi] i stap klin.” Taim yumi dediket long God na kisim baptais, yumi pas gut tru wantaim em. Yumi bin tanim bel tru na bilip long ofa bilong Jisas, olsem na God i fogivim yumi. Long ai bilong God, yumi inap stap olsem ol manmeri em maus bilong bel bilong ol i stap klin.

8. Wanem samting i mas stap olsem nambawan risen na yu laik kisim baptais?

⁸ Wanem samting i mas stap olsem nambawan risen na yu laik kisim baptais? Yu stadi gut long Baibel na yu kisim planti save long Jehova—yu kisim save long ol pasin na tingting bilong em. Yu pilim tru ol gutpela pasin bilong Em na dispela i kirapim yu long laikim em moa yet. Pasin bilong yu long laikim Jehova i mas stap olsem nambawan risen na yu laik kisim baptais.

9. Matyu 28:19, 20 i tok long kisim baptais long “nem bilong Papa na bilong Pikinini na bilong holi spirit.” Wanem mining bilong dispela tok?

⁹ Narapela risen na yu laik kisim baptais em olsem, yu kisim save long tok bilong Baibel na yu bilipim ol dispela tok. Tingim tok Jisas i mekim taim em i givim wok long yumi  long kamapim ol disaipel. (Ritim Matyu 28:19, 20.) Jisas i tok ol man i mas kisim baptais “long nem bilong Papa na bilong Pikinini na bilong holi spirit.” Wanem mining bilong dispela tok? Long bel olgeta, yu mas bilipim ol tok Baibel i mekim long Jehova; Pikinini bilong em, Jisas; na holi spirit. Ol dispela tok i gat bikpela strong na inap sutim tru bel na tingting bilong yu. (Hib. 4:12) Yumi ken skelim sampela bilong ol dispela tok.

10-11. Yu kisim pinis wanem ol stretpela save long God, na yu bilipim?

¹⁰ Tingim gen taim yu bin kisim save long ol dispela tok i tru: “Nem bilong [God], Jehova,” em i “God Antap Tru” na em i “bosim olgeta hap bilong graun,” na em wanpela tasol em “God tru.” (Sng. 83:18; Ais. 37:16) Em i Krieta bilong yumi, na em “wanpela tasol [i] save kisim bek ol man.” (Sng. 3:8; 36:9) Em i stretim rot bilong kisim bek yumi long sin na dai, na em i opim rot long yumi inap kisim laip oltaim long graun. (Jon 17:3) Taim yu dediket na kisim baptais, yu soim klia olsem nau yu kamap wanpela Witnes Bilong Jehova. (Ais. 43:10-12) Yu bai stap insait long bikpela lain famili em ol i stap long olgeta hap bilong graun na ol i amamas long holim nem bilong God na tokaut long en.—Sng. 86:12.

¹¹ Em gutpela blesing tru long yu inap kisim stretpela save long Papa bilong yu long rot bilong Baibel! Taim yu bilipim ol dispela tok, dispela bai kirapim laik bilong yu long dediket long Jehova na kisim baptais.

12-13. Yu kisim pinis wanem ol stretpela save long Pikinini Bilong God, na yu bilipim?

¹² Yu pilim olsem wanem taim yu kisim stretpela save long Pikinini Bilong God? Jisas em namba 2 man i winim olgeta narapela man long heven na graun—God tasol i gat bikpela namba moa winim em. Jisas i givim laip bilong em olsem ofa bilong baim bek yumi. Taim yumi mekim ol samting bilong soim olsem yumi bilip long ofa bilong Jisas, dispela bai opim rot long God inap fogivim yumi, na yumi inap kamap pren bilong God, na kisim laip oltaim. (Jon 3:16) Jisas em Hetpris bilong yumi. Long rot bilong ofa bilong em, em i laik kisim bek yumi na helpim yumi long pas gut wantaim God. (Hib. 4:15; 7:24, 25) Jisas i stap King long Kingdom Bilong God, na long rot bilong em Jehova bai mekim holi nem bilong Em, pinisim ol man nogut, na klostu nau em bai kamapim Paradais long graun na ol narapela blesing we bai i stap oltaim oltaim. (Mat. 6:9, 10; Rev. 11:15) Jisas i stap olsem gutpela eksampel yumi inap bihainim. (1 Pita 2:21) Em i yusim laip olgeta bilong em long mekim laik bilong God.—Jon 4:34.

¹³ Taim yu stadi long Baibel na yu bilipim save yu kisim long Jisas, dispela i kirapim yu long laikim em. Olsem na yu laik yusim laip bilong yu long mekim laik bilong God olsem Jisas i bin mekim. Dispela i mekim na yu laik dediket long Jehova na kisim baptais.

14-15. Yu kisim pinis wanem ol stretpela save long holi spirit, na yu bilipim?

¹⁴ Yu pilim olsem wanem taim yu kisim stretpela save long holi spirit? Holi spirit em strong bilong God, na em i no wanpela man. Jehova i yusim holi spirit long stiaim ol man long raitim Baibel, na holi spirit i save helpim yumi long kliagut na bihainim ol tok yumi ritim long Baibel. (Jon 14:26; 2 Pita 1:21) Long rot bilong holi spirit, Jehova i givim yumi “strong i winim strong bilong yumi ol man.” (2 Kor. 4:7) Holi spirit i strongim yumi long autim gutnius, sakim ol traim, daunim bel hevi, na sanap strong na karim hevi. Na tu, holi spirit i helpim yumi long bihainim ol naispela pasin, em “ol pasin holi spirit i kamapim.” (Gal. 5:22) God i redi long givim holi spirit long ol  manmeri i trastim em na askim long kisim holi spirit.—Luk 11:13.

¹⁵ Yumi stap bel isi bikos yumi save olsem ol manmeri bilong Jehova inap kisim helpim long holi spirit na bai ol inap mekim wok bilong God! Taim yu bilipim stretpela save yu kisim long holi spirit, dispela bai kirapim yu long dediketim yu yet long God na kisim baptais.

16. Yumi kisim wanem ol save long dispela atikol?

¹⁶ Taim yu dediket long God na kisim baptais, yu mekim wanpela bikpela samting. Olsem yumi stori pinis, yu mas redi long karim hevi na lusim sampela samting bilong yu yet. Tasol ol blesing yu kisim bai winim tru ol samting yu lusim. Baptais inap kisim bek yu, na maus bilong bel bilong yu inap i stap klin long ai bilong God. Nambawan bikpela risen na yu laik kisim baptais em olsem: Yu mas laikim tru God Jehova. Na tu, long bel olgeta, yu mas bilipim ol stretpela save yu kisim long Papa, Pikinini, na holi spirit. Taim yu skelim gen ol samting yumi stori pinis long en, yu bai tok wanem long dispela askim, “Mi redi long kisim baptais?”

17. Man i mas mekim wanem paslain long em i kisim baptais?

¹⁷ Sapos yu pilim olsem yu redi pinis long kisim baptais, dispela i makim olsem yu winim pinis sampela mak bilong strongim pasin bilong yu long pas gut wantaim Jehova. * Oltaim yu lusim haptaim na strong bilong yu long stadi long Baibel, olsem na yu kisim planti save pinis long Jehova na Jisas. Yu kisim pasin bilong bilip. (Hib. 11:6) Yu trastim tru ol tok promis bilong Jehova i stap long Baibel, na yu save tru olsem bilip bilong yu long ofa bilong Jisas inap kisim bek yu long sin na dai. Yu tanim bel pinis; yu sori tru long ol rong yu bin mekim, na yu beten askim Jehova long lusim ol rong bilong yu. Yu mekim bikpela senis long laip bilong yu; yu strongim bel na lusim ol pasin nogut na yu stat long bihainim ol pasin em God i laikim. (Apo. 3:19) Yu laik tru long tokim ol narapela long bilip bilong yu. Yu winim pinis mak bilong kamap pablisa i no baptais yet na yu stat long autim tok wantaim kongrigesen. (Mat. 24:14) Jehova i amamas long yu taim yu mekim ol dispela samting. Yu mekim bel bilong em i amamas tru.—Prov. 27:11.

18. Yu mas mekim wanem ol samting moa paslain long yu kisim baptais?

¹⁸ Paslain long yu kisim baptais, i gat sampela narapela samting yu mas mekim. Olsem yumi stori pinis, yu mas dediket long God. Taim yu yet i stap, beten long em na tok promis long em olsem yu bai yusim laip bilong yu long mekim laik bilong em. (1 Pita 4:2) Toksave long kodineta bilong lain elda long kongrigesen bilong yu olsem yu laik kisim baptais. Em bai tokim sampela elda long toktok wantaim yu. Plis no ken tingting planti. Ol dispela brata i save pinis long yu na ol i laikim yu.  Ol bai stori wantaim yu long sampela samting em yu kisim save pinis long en long Baibel. Ol i laik skelim sapos yu kliagut long ol dispela tok na yu save olsem dediket na baptais em ol bikpela disisen. Sapos ol i wanbel olsem yu redi pinis, ol bai toksave long yu olsem yu inap kisim baptais long neks kibung.

19-20. Yu mas mekim wanem ol samting moa bihain long yu kisim baptais? Hau bai yu inap mekim olsem?

¹⁹ Bihain long yu kisim baptais, yu mas mekim wanem? * Tingim olsem dedikesen em tok promis yu mekim long Jehova, na em i laik bai yu mas truim dispela tok promis. Olsem na bihain long yu kisim baptais, yu mas inapim dediket bilong yu. Hau bai yu inap mekim olsem?

²⁰ Pas gut wantaim kongrigesen bilong yu. Yu baptais pinis olsem wanpela disaipel bilong Krais, olsem na yu stap insait long bikpela lain famili bilong “olgeta wanbilip.” (1 Pita 2:17) Ol bratasista long kongrigesen em ol wanfamili bilong yu long sait bilong bilip. Taim yu go oltaim long ol miting, yu bai strongim pasin bilong yu long pas gut wantaim ol. Ritim Tok Bilong God long olgeta de na tingim tingim ol dispela tok. (Sng. 1:1, 2) Taim yu ritim sampela ves bilong Baibel, lusim sampela haptaim long tingim tingim na skelim gut ol tok yu ritim. Dispela bai helpim yu long pilim tru ol dispela tok. “Beten oltaim.” (Mat. 26:41) Taim yu beten na autim olgeta tingting na filings bilong yu long Jehova, yu bai go klostu moa long em. “Wok yet long painim Kingdom pastaim.” (Mat. 6:33) Yu inap mekim olsem taim yu tingim wok autim tok olsem bikpela samting long laip bilong yu. Taim yu autim tok long olgeta taim, bilip bilong yu bai stap strong, na yu inap helpim ol narapela tu long wokabaut long rot i go long laip oltaim.—1 Tim. 4:16.

21. Taim yu kisim baptais, dispela bai opim rot long wanem samting?

²¹ Taim yu dediket long Jehova na kisim baptais, dispela em nambawan bikpela disisen yu mekim long laip bilong yu. Em tru olsem yu bai karim hevi na lusim sampela samting. Tasol yu ting gutpela samting bai kamap? Yes! Maski yu karim pen na hevi, ol i “bilong sotpela taim na ol i no bikpela tumas.” (2 Kor. 4:17) Tasol taim yu kisim baptais, dispela bai opim rot long yu inap stap amamas long nau na yu inap kisim “laip tru” long bihain. (1 Tim. 6:19) Olsem na yu mas skelim gut olgeta samting na beten na bai yu inap save long bekim yu bai mekim long dispela askim, “Mi redi long kisim baptais?”