Yu Save Long Dispela?
Wanem ol narapela evidens i soim olsem ol Israel i bin stap olsem ol sleiv long Isip?
Baibel i stori olsem bihain long lain Midian i kisim Josep i go long Isip, Jekop na famili bilong em i lusim Kenan na go long Isip. Ol i sindaun long hap bilong Isip em ol i kolim Gosen, long ples daun bilong Wara Nail. (Stt. 47:1, 6) Lain Israel i “wok long kamap planti hariap tru na ol i kamap strongpela lain moa.” Olsem na ol Isip i pret long ol Israel na fosim ol long mekim wok sleiv.—Kis. 1:7-14.
Ol man i tok bilas long dispela stori bilong Baibel na tok em wanpela stori nating. Tasol i gat ol evidens i soim olsem lain Semait * i bin mekim wok sleiv long Isip long bipo.
Ol saveman i digim graun na painim ol samting bilong ol taun bilong bipo long noten Isip. Saveman John Bimson i tok i gat evidens bilong 20 o moa setelmen bilong lain Semait long dispela hap bilong noten Isip. Na tu, saveman bilong Isip, James K. Hoffmeier i tok: “Namel long yia 1800 na 1540 B.C. samting, Isip i stap olsem ples em ol lain i mekim tok Semait long westen Esia i save amamas long i go sindaun long en.” Em i tok moa: “Dispela haptaim i wankain long taim bilong Abraham na i stret long haptaim na ol stori yumi ritim long Buk Stat.”
Ol i painim narapela evidens long sauten Isip. Wanpela pepa ol i wokim long pitpit namel long 2000 na 1600 B.C.E., i gat nem bilong ol sleiv husat i bin wok insait long wanpela haus long sauten Isip. Winim 40 nem long dispela lista em nem bilong lain Semait. Ol dispela sleiv o sevan i mekim wok bilong kukim kaikai, wivim tret, na ol narapela hatpela wok. Saveman Hoffmeier i tok: “Winim 40 Semait i wok insait long wanpela haus long Thebaid [sauten Isip], so ating namba bilong lain Semait long ples daun bilong Wara Nail i bikpela tru.”
Saveman David Rohl i tok, nem bilong sampela sleiv long dispela lista i “wankain stret long ol nem i stap long Baibel.” Sampela liklik hap bilong dispela rait i gat ol nem i wankain long ol nem olsem Isakar, Aser, na Sifra. (Kis. 1:3, 4, 15) Saveman Rohl i tok: “Dispela evidens i soim klia tru olsem lain Israel i bin stap olsem ol sleiv long Isip.”
Saveman Bimson i tok: “Ol samting bilong histori i sapotim tru stori bilong Baibel long ol Israel i bin stap kalabus long Isip na bihain ol i lusim kalabus.”
^ par. 4 Nem Semait i kam long nem Siem, em wanpela bilong 3-pela pikinini man bilong Noa. Ating ol tumbuna pikinini bilong Siem em lain Elam, lain Asiria, lain Kaldia, lain Hibru, lain Siria, na ol traib bilong Arap.
