Long dispela atikol, yumi bin lainim olsem ol ensel na ol manmeri i insait long wanpela bikpela tok: em long mekim holi bikpela nem bilong Jehova. Bikpela tok i kamap long wok bos bilong Jehova—olsem wei bilong em long mekim wok bos i nambawan o nogat—dispela em i insait long mekim holi nem bilong em. Olsem tasol, sapos wanpela man i stap gut long God o nogat, dispela tu i insait long wok bilong mekim holi nem bilong God.

Long nau, wai na yumi tok olsem nem bilong Jehova na wok bilong mekim holi dispela nem em i nambawan bikpela samting? Yumi ken stori long 3-pela risen.

Namba 1, Satan i sutim tok long gutnem bilong Jehova long gaden Iden. Dispela askim Satan i givim long Iv i kirapim em long kisim tingting olsem Jehova i pasim sampela gutpela samting long ol na ol lo bilong Em i hatpela tumas. Bihain, Satan i paulim tok Jehova i mekim, i olsem em i tok God em i man bilong giaman. Long dispela rot, em i bagarapim gutnem bilong Jehova. Em i kamap “Devil,” dispela i makim “man bilong krungutim gutnem.” (Jon 8:44) Iv i bilipim ol tok giaman bilong Satan, olsem na em i sakim tok bilong God, long dispela rot em i no laik stap aninit long wok bos bilong God. (Stt. 3:1-6) I kam inap long nau, Satan i wok yet long bagarapim gutnem bilong God, em i mekim olsem long rot bilong kamapim ol tok giaman long Jehova em i wanem kain God. Ol man em ol i bilipim ol dispela kain tok giaman, em isi moa long ol i sakim tok bilong Jehova. Ol manmeri bilong God i tingim olsem tok giaman Satan i sutim long nem holi bilong Jehova, dispela em i samting nogut tru. Dispela tok giaman i as bilong ol pen na hevi na ol pasin nogut long dispela graun.

Namba 2, bilong helpim ol manmeri na ol ensel, Jehova i tingting strong long stretim gutnem bilong em na nem bilong em i ken i stap holi tru. Dispela em i nambawan bikpela samting tru long Jehova. Olsem na em i tok: “Tru tumas, mi bai mekim holi bikpela nem bilong mi.” (Ese. 36:23) Na Jisas i kamapim klia wanem samting i mas i stap nambawan samting long beten bilong olgeta wokman bilong Jehova, taim em i tok: “Nem bilong yu i mas i stap holi.” (Mat. 6:9) Planti taim Baibel i kamapim klia olsem em i bikpela samting long givim glori long nem bilong Jehova. Em hia sampela eksampel: “Givim glori long Jehova olsem i stret long nem bilong em.” (1 Sto. 16:29; Sng. 96:8) “Singim ol song bilong preisim nem bilong em i nambawan tru.” (Sng. 66:2) “Oltaim bai mi givim glori long nem bilong yu.” (Sng. 86:12) Wanpela taim Jisas i stap long tempel long Jerusalem, na em i tok long Jehova olsem: “Papa, litimapim nem bilong yu.” Na nek bilong Jehova i kam long heven na i tok olsem: “Mi litimapim pinis nem bilong mi na bai mi litimapim gen.”​—Jon 12:28. a

Namba 3, ol samting Jehova i tingting pinis long mekim bai stretim bek gutnem bilong em. Tingim dispela: Bihain long laspela traim i kamap long pinis bilong Wan Tausen Yia Bilong Krais i Stap King, wanem samting bai kamap? Long dispela taim, ol ensel na ol manmeri bai pilim olsem wanem long nem bilong Jehova? Bilong bekim dispela askim, yumi ken stori gen  long 2-pela bikpela samting i insait long wok bilong mekim holi nem bilong Jehova—pasin bilong ol man long stap gut long God na wok bos bilong God. Long dispela taim, yu ting ol manmeri em ol i bin soim pinis olsem ol i stap gut long God, ol i mas wok yet long soim olsem ol i stap gut long God? Nogat. Ol i gutpela olgeta na ol i winim pinis laspela traim. Long dispela taim, ol i kisim pinis laip oltaim. Na tu, bai i no gat wok long soim olsem wok bos bilong Jehova em i nambawan tru. Long dispela taim, ol ensel long heven na ol manmeri long graun bai i stap wanbel na ol bai stap daun long wok bos bilong Jehova. Tasol olsem wanem long nem bilong Jehova?

Long dispela taim, nem bilong Jehova bai i stap holi tru na i no gat wanpela samting bai bagarapim gutnem bilong em. Na nem bilong Jehova bai wok yet long stap olsem nambawan bikpela samting long ol ensel long heven na long ol manmeri long graun. Bilong wanem? Long wanem, ol bai lukim Jehova i wok yet long mekim ol narakain gutpela samting. Tingim dispela: Long dispela taim, Jisas bai daunim em yet na givim olgeta wok king i go long Jehova, na God bai “i stap het bilong olgeta samting.” (1 Kor. 15:28) Bihain long dispela, ol manmeri long graun bai amamas long kisim dispela pasin bilong “i stap fri i nambawan tru olsem bilong ol pikinini bilong God.” (Rom 8:21) Na Jehova bai inapim tru samting em i tingting pinis long mekim, em long bungim ol ensel long heven na olgeta manmeri long graun olsem wanpela bikpela famili i stap wanbel tru.​—Efe. 1:10.

Olgeta dispela samting bai mekim wanem long famili bilong Jehova long heven na long graun? Tru tumas, bai yumi gat strongpela laik yet long preisim naispela nem bilong Jehova. Man bilong raitim song Devit i tok: “Litimapim nem bilong God Jehova . . . Oltaim litimapim nem bilong em i nambawan tru.” (Sng. 72:18, 19) Inap oltaim oltaim, bai yumi wok yet long i gat ol gutpela risen long mekim olsem.

Nem bilong Jehova i kamapim klia ol pasin bilong em na ol gutpela wok bilong em. Na bikpela samting moa, nem bilong em i kirapim yumi long tingim pasin laikim bilong em. (1 Jon 4:8) Oltaim bai yumi tingim olsem Jehova i wokim yumi bikos em i laikim yumi, em i givim ofa bilong baim bek ol man bikos em i laikim yumi, na em i kamapim klia olsem wok bos bilong em i stretpela olgeta bikos em i laikim yumi. Tasol bai yumi wok yet long pilim pasin laikim bilong Jehova long yumi inap oltaim oltaim. Na inap oltaim oltaim, pasin laikim bilong em bai kirapim yumi long pas gut moa wantaim em olsem Papa bilong yumi na yumi bai singim ol song bilong preisim nambawan gutpela nem bilong em.​—Sng. 73:28.