Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. God i promis long givim wanem kingdom long Jisas?

God i tok promis olsem wanpela tumbuna pikinini bilong King Devit bai sindaun long sia king bilong Em inap oltaim oltaim. Dispela tumbuna pikinini long tok profet em Jisas, na nau em i mekim wok olsem King long Kingdom Bilong God long heven.—Ritim Song 89:4; Luk 1:32, 33.

Taim Devit i bin stap mangi nating tasol, God i makim em long stap king bilong lain Israel, em ol manmeri bilong Jehova. Taim Devit i dai, Solomon, em man Jehova i bin makim, em i “kamap king bilong ol manmeri bilong Bikpela.” (1 Stori 28:4, 5; 29:23) Taim Solomon i dai pinis, planti man i bin mekim wok king long Jerusalem, tasol planti bilong ol i no stap gut long God. Bihain Jehova i larim ol ami bilong Babilon i bagarapim Jerusalem na rausim king bilong en. Dispela samting i bin kamap long yia 607 B.C.E. Kirap long dispela taim na i kam, i no gat wanpela king long lain bilong Devit i bin mekim wok king long Jerusalem.—Ritim Esekiel 21:27.

2. Wok king bilong Devit long Jerusalem we i makim Kingdom Bilong God, i bin stap nating inap hamas yia?

Bihain tasol long Jerusalem i bagarap, Jehova i tokim profet bilong em Daniel olsem Em bai makim wanpela king husat bai mekim wok king long heven na bosim graun. Wanem taim bai wok king bilong em i kirap?—Ritim Daniel 7:13, 14.

Daniel i stori long mining bilong wanpela driman we God i tok long katim wanpela traipela diwai i go daun, wankain olsem God i bin tok long wok king long Jerusalem bai pundaun na bagarap. Tasol as bilong diwai i mas stap yet insait long graun “inap long 7-pela yia,” na bihain em i ken kru gen. Baibel i tok olsem 3 na hap yia i makim 1,260 de, olsem na “7-pela yia” i makim 2,520 de. (Revelesen 12:6, 14) Long ol tok profet bilong Baibel, planti taim ol de i makim ol yia. (Namba 14:34) Olsem na Kingdom Bilong God bai stap nating inap 2,520 yia.—Ritim Daniel 4:10-17.

 3. Jisas i kamap King long wanem taim?

God i mekim Jisas i kamap King long heven long yia 1914, em 2,520 yia stret bihain long Jerusalem i bin bagarap. Namba 1 wok Jisas i mekim olsem King, em long rausim Satan na ol spirit nogut bilong em long heven. (Revelesen 12:7-10) Ol man i no bin lukim dispela samting long ai, tasol dispela samting i bin kamapim bikpela hevi long i stap bilong ol man. (Revelesen 12:12) Ol samting i bin kamap long 1914 na i kam inap long nau i kamapim klia olsem Jisas i bin kamap King long 1914.—Ritim Matyu 24:14; Luk 21:10, 11, 31.

4. Wok king bilong Jisas inap helpim yu olsem wanem?

Truim bilong ol tok profet i kamap tru long wok king bilong Jisas, dispela i kamapim klia olsem yumi ken bilip tru long Tok Bilong God. Klostu nau Jisas bai mekim wok long strong bilong em olsem king na pinisim olgeta pen na hevi bilong ol manmeri.—Ritim Song 72:8, 12, 13; Daniel 2:44.

Bilong kisim sampela save moa, lukim pes 216-218 bilong dispela buk em ol Witnes Bilong Jehova i wokim. Tru Tru Baibel i Tok Wanem?

[Sat long pes 16, 17]

(Bilong save ol dispela rait i stap we long pes, lukim buk o magasin)

Oktoba

607 B.C.E. ← 2,520 years → 1914 C.E.

1000 B.C.E. | 1 B.C.E. | 1 C.E. | 1000 C.E. | 2000 C.E.

← 606.25 years →← 1,913.75 years →

Kingdom long Jerusalem i bagarap

Yusim kalkuleta: 606.25 + 1,913.75 = 2,520

God i mekim Jisas i kamap strongpela King bilong bosim olgeta lain man